Chapter 3: The Pandava heroes slain in the war

आख्याता मामकास्तात निहता युधि पाण्डवैः ।
हतांश्च पाण्डवेयानां मामकैर्ब्रूहि सञ्जय

ākhyātā māmakāstāta nihatā yudhi pāṇḍavaiḥ |
hatāṃśca pāṇḍaveyānāṃ māmakairbrūhi sañjaya

कृतिनो युधि विक्रान्ता महासत्वा महाबलाः ।
सानुबन्धाः सहामात्या गाङ्गेयेन निपातिताः

kṛtino yudhi vikrāntā mahāsatvā mahābalāḥ |
sānubandhāḥ sahāmātyā gāṅgeyena nipātitāḥ

नारायणा वल्लवाश्च रामाश्च शतशो परे ।
अनुरक्ताश्च वीरेण भीष्मेण युधि पातिताः

nārāyaṇā vallavāśca rāmāśca śataśo pare |
anuraktāśca vīreṇa bhīṣmeṇa yudhi pātitāḥ

समः किरीटिना सङ्ख्ये वीर्येण च बलेन च ।
सत्यजित्सत्यसन्धेन द्रोणेन निहतो युधि

samaḥ kirīṭinā saṅkhye vīryeṇa ca balena ca |
satyajitsatyasandhena droṇena nihato yudhi

पाञ्चालानां महेष्वासाः सर्वे युद्वविशारदाः ।
द्रोणेन सह सङ्गम्य गता वैवस्वतक्षयम्

pāñcālānāṃ maheṣvāsāḥ sarve yudvaviśāradāḥ |
droṇena saha saṅgamya gatā vaivasvatakṣayam

तथा विराटद्रुपदौ वृद्वौ सहसुतौ नृपौ ।
पराक्रमन्तौ मित्रार्थे द्रोणेन निहतौ रणे

tathā virāṭadrupadau vṛdvau sahasutau nṛpau |
parākramantau mitrārthe droṇena nihatau raṇe

यो बाल एव समरे सम्मितः सव्यसाचिना ।
केशवेन च दुर्धर्षो बलदेवेन चाभिभूः

yo bāla eva samare sammitaḥ savyasācinā |
keśavena ca durdharṣo baladevena cābhibhūḥ

परेषां कदनं कृत्वा महद्रणविशारदः ।
परिवार्य मदामात्रैः षड्भिः परमकै रथैः ।
अशक्नुवद्भिर्बीभत्सुमभिमन्युर्निपातितः

pareṣāṃ kadanaṃ kṛtvā mahadraṇaviśāradaḥ |
parivārya madāmātraiḥ ṣaḍbhiḥ paramakai rathaiḥ |
aśaknuvadbhirbībhatsumabhimanyurnipātitaḥ

कृतं तं विरथं वीरं क्षत्रधर्मे व्यवस्थितम् ।
दौःशासनिर्महाराज सौभद्रं हतवान्रणे

kṛtaṃ taṃ virathaṃ vīraṃ kṣatradharme vyavasthitam |
dauḥśāsanirmahārāja saubhadraṃ hatavānraṇe

पटच्चरनिहन्ता च महत्या सेनया वृतः ।
अम्बष्ठस्य सुतः श्रीमान्मित्रहेतोः पराक्रमन्

paṭaccaranihantā ca mahatyā senayā vṛtaḥ |
ambaṣṭhasya sutaḥ śrīmānmitrahetoḥ parākraman

आसाद्य लक्ष्मणं वीरं दुर्योधनसुतं रणे ।
सुमहत्कदनं कृत्वा गतो वैवस्वतक्षयम्

āsādya lakṣmaṇaṃ vīraṃ duryodhanasutaṃ raṇe |
sumahatkadanaṃ kṛtvā gato vaivasvatakṣayam

बृहन्तः सुमहेष्वासः कृतास्त्रो युद्वदुर्मदः ।
दुःशासनेन विक्रम्य गमितो यमसादनम्

bṛhantaḥ sumaheṣvāsaḥ kṛtāstro yudvadurmadaḥ |
duḥśāsanena vikramya gamito yamasādanam

मणिमान्दण्डधारश्च राजानौ युद्धदुर्मदौ ।
पराक्रमन्तौ मित्रार्थे द्रोणेन युधि पातितौ

maṇimāndaṇḍadhāraśca rājānau yuddhadurmadau |
parākramantau mitrārthe droṇena yudhi pātitau

अंशुमान्भोजराजस्तु सहसैन्यो महारथः ।
भारद्वाजेन विक्रम्य गमितो यमसादनम्

aṃśumānbhojarājastu sahasainyo mahārathaḥ |
bhāradvājena vikramya gamito yamasādanam

सामुद्रश्चित्रसेनश्च सह पुत्रेण भारत ।
समुद्रसेनेन बलाद्गमितो यमसादनम्

sāmudraścitrasenaśca saha putreṇa bhārata |
samudrasenena balādgamito yamasādanam

अनूपवासी नीलश्च व्याध्रदत्तश्च वीर्यवान् ।
अश्वत्थाम्ना विकर्णेन गमितौ यमसादनम्

anūpavāsī nīlaśca vyādhradattaśca vīryavān |
aśvatthāmnā vikarṇena gamitau yamasādanam

चित्रायुधश्चित्रयोधी कृत्वा च कदनं महत् ।
चित्रमार्गेण विक्रम्य विकर्णेन हतो मृधे ।

citrāyudhaścitrayodhī kṛtvā ca kadanaṃ mahat |
citramārgeṇa vikramya vikarṇena hato mṛdhe |

वृकोदरसमो युद्धे वृतः केकयजो युधि ।
केकयेन च विक्रम्य भ्राता भ्रात्रा निपातितः

vṛkodarasamo yuddhe vṛtaḥ kekayajo yudhi |
kekayena ca vikramya bhrātā bhrātrā nipātitaḥ

जनमेजयो गदायोधी पार्वतीयः प्रतापवान् ।
दुर्मुखेन महाराज तव पुत्रेण पातितः

janamejayo gadāyodhī pārvatīyaḥ pratāpavān |
durmukhena mahārāja tava putreṇa pātitaḥ

रोचमानौ नरव्याघ्रौ रोचमानौ ग्रहाविव ।
द्रौणेन युगपद्राजन्दिवं सम्प्रातितौ शरैः

rocamānau naravyāghrau rocamānau grahāviva |
drauṇena yugapadrājandivaṃ samprātitau śaraiḥ

नृपाश्च प्रतियुध्यन्तः पराक्रान्ता विशाम्पते ।
कृत्वा नसुकरं कर्म गता वैवस्वतक्षयम्

nṛpāśca pratiyudhyantaḥ parākrāntā viśāmpate |
kṛtvā nasukaraṃ karma gatā vaivasvatakṣayam

पुरुजित्कृन्तिभोजश्च मातुलौ सव्यसाचिनः ।
संग्रामनिर्जिताँल्लोकान्गमितौ द्रोणसायकैः

purujitkṛntibhojaśca mātulau savyasācinaḥ |
saṃgrāmanirjitām̐llokāngamitau droṇasāyakaiḥ

अभिभूः काशिराजश्च काशिकैर्बहुभिर्वृतः ।
वसुदानस्य पुत्रेण त्याजितो देहमाहवे

abhibhūḥ kāśirājaśca kāśikairbahubhirvṛtaḥ |
vasudānasya putreṇa tyājito dehamāhave

अमितौजा युधामन्युरुत्तमौजाश्च वीर्यवान् ।
निहत्य शतशः सूरानस्मदीयैर्निपातिताः

amitaujā yudhāmanyuruttamaujāśca vīryavān |
nihatya śataśaḥ sūrānasmadīyairnipātitāḥ

मित्रवर्मा च पाञ्चाल्यः क्षत्रधर्मा च भारत ।
द्रोणेन परमेष्वासौ गमितौ यमसादनम्

mitravarmā ca pāñcālyaḥ kṣatradharmā ca bhārata |
droṇena parameṣvāsau gamitau yamasādanam

शिखण्डितनयो युद्धे क्षत्रदेवो युधाम्पतिः ।
लक्ष्मणेन हतो राजंस्तव पौत्रेण भारत

śikhaṇḍitanayo yuddhe kṣatradevo yudhāmpatiḥ |
lakṣmaṇena hato rājaṃstava pautreṇa bhārata

सुचित्रश्चित्रवर्मा च पितापुत्रौ महारथौ ।
प्रचरन्तौ महावीरौ द्रोणेन निहतौ रणे

sucitraścitravarmā ca pitāputrau mahārathau |
pracarantau mahāvīrau droṇena nihatau raṇe

वार्धक्षेमिर्महाराज समुद्र इव पर्वणि ।
आयुधक्षयमासाद्य प्रशान्तिं परमां गतः

vārdhakṣemirmahārāja samudra iva parvaṇi |
āyudhakṣayamāsādya praśāntiṃ paramāṃ gataḥ

सेनाबिन्दुसुतः श्रेष्ठः शास्त्रवान्प्रहरन्युधि ।
बाह्लिकेन महाराज कौरवेन्द्रेण पातितः

senābindusutaḥ śreṣṭhaḥ śāstravānpraharanyudhi |
bāhlikena mahārāja kauravendreṇa pātitaḥ

धृष्टकेतुर्महाराज चेदीनां प्रवरो रथः ।
कृत्वा नसुकरं कर्म गतो वैवस्वतक्षयम्

dhṛṣṭaketurmahārāja cedīnāṃ pravaro rathaḥ |
kṛtvā nasukaraṃ karma gato vaivasvatakṣayam

तथा सत्यधृतिर्वीरः कृत्वा कदनमाहवे ।
पाण्डवार्थे पराक्रान्तो गमितो यमसादनम्

tathā satyadhṛtirvīraḥ kṛtvā kadanamāhave |
pāṇḍavārthe parākrānto gamito yamasādanam

पुत्रस्तु शिशुपालस्य सुकेतुः पृथिवीपतिः ।
निहत्य शात्रवान्सङ्ख्ये द्रोणेन निहतो युधि

putrastu śiśupālasya suketuḥ pṛthivīpatiḥ |
nihatya śātravānsaṅkhye droṇena nihato yudhi

तथा सत्यधृतिर्वीरो मदिराश्वश्च वीर्यवान् ।
सूर्यदत्तश्च विक्रान्तो निहतो द्रोणसायकैः

tathā satyadhṛtirvīro madirāśvaśca vīryavān |
sūryadattaśca vikrānto nihato droṇasāyakaiḥ

मात्स्यादवरजः श्रीमाञ्शतानीको निपातितः ।
श्रेणिमांश्च महाराज युध्यमानः पराक्रमी ।
कृत्वा नसुकरं कर्म गतो वैवस्वतक्षयम्

mātsyādavarajaḥ śrīmāñśatānīko nipātitaḥ |
śreṇimāṃśca mahārāja yudhyamānaḥ parākramī |
kṛtvā nasukaraṃ karma gato vaivasvatakṣayam

तथैव युधि विक्रान्तो मागधः परमास्त्रवित् ।
भीष्मेण निहतो राजञ्शेतेऽद्य परवीरहा

tathaiva yudhi vikrānto māgadhaḥ paramāstravit |
bhīṣmeṇa nihato rājañśete'dya paravīrahā

विराटपुत्रः शङ्खस्तु उत्तरश्च महारथः ।
कुर्वन्तौ सुमहत्कर्म गतौ वैवस्वतक्षयम्

virāṭaputraḥ śaṅkhastu uttaraśca mahārathaḥ |
kurvantau sumahatkarma gatau vaivasvatakṣayam

वसुदानश्च कदनं कुर्वाणोऽतीव संयुगे ।
भारद्वाजेन विक्रम्य गमितो यमसादनम्

vasudānaśca kadanaṃ kurvāṇo'tīva saṃyuge |
bhāradvājena vikramya gamito yamasādanam

एते चान्ये च बहवः पाण्डवानां महारथाः ।
हता द्रोणेन विक्रम्य यन्मां त्वं परिपृच्छसि

ete cānye ca bahavaḥ pāṇḍavānāṃ mahārathāḥ |
hatā droṇena vikramya yanmāṃ tvaṃ paripṛcchasi