Chapter 83: Shri Krishna assures Yudhishthira of Jayadratha's death

सुखेन रजनी व्युष्टा कच्चित्ते मधुसूदन ।
कच्चिज्ज्ञानानि सर्वाणि प्रसन्नानि तवाच्युत

sukhena rajanī vyuṣṭā kaccitte madhusūdana |
kaccijjñānāni sarvāṇi prasannāni tavācyuta

वासुदेवोऽपि तद्युक्तं प्रत्युवाच युधिष्ठिरम् ।
दर्शनादेव ते सौम्य न किञ्चिदशुभं मम

vāsudevo'pi tadyuktaṃ pratyuvāca yudhiṣṭhiram |
darśanādeva te saumya na kiñcidaśubhaṃ mama

ततश्च प्रकृतीः क्षत्ता न्यवेदयदुपस्थिताः ।
अनुज्ञातश्च राज्ञा स प्रावेशयत तं जनम्

tataśca prakṛtīḥ kṣattā nyavedayadupasthitāḥ |
anujñātaśca rājñā sa prāveśayata taṃ janam

विराटं भीमसेनं च धृष्टद्युम्नं च सात्यकिम् ।
चेदिपं धृष्टकेतुं च द्रुपदं च महारथम्

virāṭaṃ bhīmasenaṃ ca dhṛṣṭadyumnaṃ ca sātyakim |
cedipaṃ dhṛṣṭaketuṃ ca drupadaṃ ca mahāratham

शिखण्‍डिनं यमौ चैव चेकितानं सकेकयम् ।
युयुप्सुं चैव कौरव्यं पाञ्चाल्यं चोत्तमौजसम्

śikhaṇ‍ḍinaṃ yamau caiva cekitānaṃ sakekayam |
yuyupsuṃ caiva kauravyaṃ pāñcālyaṃ cottamaujasam

युधामन्यु सुबाहुं च द्रौपदेयांश्च सर्वशः ।
एतांश्च सुहृदश्चान्यान्दर्शयामास पाण्डवम्

yudhāmanyu subāhuṃ ca draupadeyāṃśca sarvaśaḥ |
etāṃśca suhṛdaścānyāndarśayāmāsa pāṇḍavam

अनुज्ञाताश्च पार्थेन स्वासीना आसनेषु ते ।
सर्वेष्वथ परार्ध्येषु यथार्हं वन्द्य पाण्डवम्

anujñātāśca pārthena svāsīnā āsaneṣu te |
sarveṣvatha parārdhyeṣu yathārhaṃ vandya pāṇḍavam

एकस्मिन्नासने वीरावुपविष्टौ महाबलौ ।
कृष्णश्च युयुधानश्च वेद्यामिव हुताशनौ

ekasminnāsane vīrāvupaviṣṭau mahābalau |
kṛṣṇaśca yuyudhānaśca vedyāmiva hutāśanau

ततो युधिष्ठिरस्तेषां शृण्वतां मधुसूदनम् ।
अब्रवीत्पुण्डरीकाक्षमाभाष्य मधुरं वचः

tato yudhiṣṭhirasteṣāṃ śṛṇvatāṃ madhusūdanam |
abravītpuṇḍarīkākṣamābhāṣya madhuraṃ vacaḥ

एकं त्वां वयमाश्रित्य सहस्राक्षमिवामराः ।
प्रार्थयामो जयं युद्धे शाश्वतानि सुखानि च

ekaṃ tvāṃ vayamāśritya sahasrākṣamivāmarāḥ |
prārthayāmo jayaṃ yuddhe śāśvatāni sukhāni ca

त्वं हि राज्यविनाशं च द्विषद्भिश्च निराक्रियाम् ।
क्लेशांश्च विविधान्कृष्ण सर्वांस्तानपि वेत्थ नः

tvaṃ hi rājyavināśaṃ ca dviṣadbhiśca nirākriyām |
kleśāṃśca vividhānkṛṣṇa sarvāṃstānapi vettha naḥ

त्वयि सर्वेश सर्वेषामस्माकं भक्तवत्सल ।
सुखमायत्तमत्यर्थं यात्रा च मधुसूदन

tvayi sarveśa sarveṣāmasmākaṃ bhaktavatsala |
sukhamāyattamatyarthaṃ yātrā ca madhusūdana

स तथा कुरु वार्ष्णेय यथा त्वयि मनो मम ।
अर्जुनस्य यथा सत्या प्रतिज्ञा स्याच्चिकीर्षिता

sa tathā kuru vārṣṇeya yathā tvayi mano mama |
arjunasya yathā satyā pratijñā syāccikīrṣitā

स भवांस्तारयत्वस्माद्दुःखामर्षमहार्णवात् ।
परां तितीर्षतामद्य प्लुवो नो भव माधव

sa bhavāṃstārayatvasmādduḥkhāmarṣamahārṇavāt |
parāṃ titīrṣatāmadya pluvo no bhava mādhava

नहि तत्कुरुते योधः कार्तवीर्यसमोऽपि यः ।
युधि यत्कुरुषे कृष्ण सारथ्यं त्वं समास्थितः

nahi tatkurute yodhaḥ kārtavīryasamo'pi yaḥ |
yudhi yatkuruṣe kṛṣṇa sārathyaṃ tvaṃ samāsthitaḥ

यथैव सर्वास्वापत्सु पासि वृष्णीञ्जनार्दन ।
तथैवास्मान्महाबाहो वृजिनात्त्रातुमर्हसि

yathaiva sarvāsvāpatsu pāsi vṛṣṇīñjanārdana |
tathaivāsmānmahābāho vṛjināttrātumarhasi

त्वमगाधेऽप्लवे मग्नान्पाण्डवान्कुरुसागरे ।
समुद्धर प्लुवो भूत्वा शङ्खचक्रगदाधर

tvamagādhe'plave magnānpāṇḍavānkurusāgare |
samuddhara pluvo bhūtvā śaṅkhacakragadādhara

नमस्ते देवदेवेश सनातन विशातन ।
विष्णो जिष्णो हरे कृष्ण वैकुण्ठ पुरुषोत्तम

namaste devadeveśa sanātana viśātana |
viṣṇo jiṣṇo hare kṛṣṇa vaikuṇṭha puruṣottama

नारदस्त्वां समाचख्यौ पुराणमृषिसत्तमम् ।
वरदं शार्ङ्गिणं श्रेष्ठं तत्सत्यं कुरु माधव

nāradastvāṃ samācakhyau purāṇamṛṣisattamam |
varadaṃ śārṅgiṇaṃ śreṣṭhaṃ tatsatyaṃ kuru mādhava

इत्युक्तः पुण्डरीकाक्षो धर्मराजेन संसदि ।
तोयमेघस्वनो वाग्मी प्रत्युवाच युधिष्ठिरम्

ityuktaḥ puṇḍarīkākṣo dharmarājena saṃsadi |
toyameghasvano vāgmī pratyuvāca yudhiṣṭhiram

सामरेष्वपि लोकेषु सर्वेषु न तथाविधः ।
शरासनधरः कश्चिद्यथा पार्थो धनञ्जयः

sāmareṣvapi lokeṣu sarveṣu na tathāvidhaḥ |
śarāsanadharaḥ kaścidyathā pārtho dhanañjayaḥ

वीर्यवानस्त्रसम्पन्नः पराक्रान्तो महाबलः ।
युद्धशौण्डः सदामर्षी तेजसा परमो नृणाम्

vīryavānastrasampannaḥ parākrānto mahābalaḥ |
yuddhaśauṇḍaḥ sadāmarṣī tejasā paramo nṛṇām

स युवा वृषभस्कन्धो दीर्घबाहुर्महाबलः ।
सिंहर्षभगतिः श्रीमान्द्विषतस्ते हनिष्यति

sa yuvā vṛṣabhaskandho dīrghabāhurmahābalaḥ |
siṃharṣabhagatiḥ śrīmāndviṣataste haniṣyati

अहं च तत्करिष्यामि तथा कुन्तीसुतोऽर्जुनः ।
धार्तराष्ट्रस्य सैन्यानि धक्ष्यत्यग्निरिवेन्धनम्

ahaṃ ca tatkariṣyāmi tathā kuntīsuto'rjunaḥ |
dhārtarāṣṭrasya sainyāni dhakṣyatyagnirivendhanam

अद्य तं पापकर्माणं क्षुद्रं सौभद्रघातिनम् ।
अपुनर्दर्शनं मार्गमिषुभिः क्षेप्स्यतेऽर्जुनः

adya taṃ pāpakarmāṇaṃ kṣudraṃ saubhadraghātinam |
apunardarśanaṃ mārgamiṣubhiḥ kṣepsyate'rjunaḥ

तस्याद्य गृध्राः श्येनाश्च चण्डगोमायवस्तथा ।
भक्षयिष्यन्ति मांसानि ये चान्ये पुरुषादकाः

tasyādya gṛdhrāḥ śyenāśca caṇḍagomāyavastathā |
bhakṣayiṣyanti māṃsāni ye cānye puruṣādakāḥ

यद्यस्य देवा गोप्तारः सेन्द्राः सर्वे तथाऽप्यसौ ।
राजधानीं यमस्याद्य हतः प्राप्स्यति दुर्मतिः

yadyasya devā goptāraḥ sendrāḥ sarve tathā'pyasau |
rājadhānīṃ yamasyādya hataḥ prāpsyati durmatiḥ

निहत्य सैन्धवं जिष्णुरद्य त्वामुपयास्यति ।
विशोको विज्वरो राजन्भव शान्ति पुरस्कृतः

nihatya saindhavaṃ jiṣṇuradya tvāmupayāsyati |
viśoko vijvaro rājanbhava śānti puraskṛtaḥ