Chapter 113: Satyaki slips past Drona and beats Kritavarma

प्रयाते तव सैन्यं तु युयुधाने युयुत्सया ।
धर्मराजो महाराज स्वेनानीकेन संवृतः ।
प्रायाद्द्रोणरथं प्रेप्सुर्युयुधानस्य पृष्ठतः

prayāte tava sainyaṃ tu yuyudhāne yuyutsayā |
dharmarājo mahārāja svenānīkena saṃvṛtaḥ |
prāyāddroṇarathaṃ prepsuryuyudhānasya pṛṣṭhataḥ

ततः पाञ्चालराजस्य पुत्रः समरदुर्मदः ।
प्रयाते माधवे राजन्निदं वचनमब्रवीत्

tataḥ pāñcālarājasya putraḥ samaradurmadaḥ |
prayāte mādhave rājannidaṃ vacanamabravīt

प्राक्रोशत्पाण्डवानीके वसुदानश्च पार्थिवः ।
आगच्छत प्रहरत द्रुतं विपरिधावत

prākrośatpāṇḍavānīke vasudānaśca pārthivaḥ |
āgacchata praharata drutaṃ viparidhāvata

यथा सुखेन गच्छेत सात्यकिर्युद्धदुर्मदः ।
महारथा हि बहवो यतिष्यन्तेऽस्य निर्जये

yathā sukhena gaccheta sātyakiryuddhadurmadaḥ |
mahārathā hi bahavo yatiṣyante'sya nirjaye

सेनापतिवचः श्रुत्वा पाण्डवेयाः समन्ततः ।
अभ्युद्ययुर्महाराज तव सैन्यं समन्ततः

senāpativacaḥ śrutvā pāṇḍaveyāḥ samantataḥ |
abhyudyayurmahārāja tava sainyaṃ samantataḥ

जहि प्रहर गृह्णीहि विध्य विद्रव चाद्रव ।
इति ब्रुवन्तौ वेगेन निपेतुस्ते महारथाः

jahi prahara gṛhṇīhi vidhya vidrava cādrava |
iti bruvantau vegena nipetuste mahārathāḥ

वयं प्रतिजिगीषन्तस्तत्र तान्समभिद्रुताः ।
बाणशङ्खरवान्कृत्वा विमिश्रान्वाद्यनिस्वनैः

vayaṃ pratijigīṣantastatra tānsamabhidrutāḥ |
bāṇaśaṅkharavānkṛtvā vimiśrānvādyanisvanaiḥ

युयुधानरथं दृष्ट्वा तावका अभिदुद्रुवुः ।
ततः शब्दो महानासीद्युयुधानरथं प्रति

yuyudhānarathaṃ dṛṣṭvā tāvakā abhidudruvuḥ |
tataḥ śabdo mahānāsīdyuyudhānarathaṃ prati

आकीर्यमाणा धावन्ती तव पुत्रस्य वाहिनी ।
सात्वतेन महाराज शतधाऽभिव्यशीर्यत

ākīryamāṇā dhāvantī tava putrasya vāhinī |
sātvatena mahārāja śatadhā'bhivyaśīryata

तस्यां विदीर्यमाणायां शिनेः पुत्रो महारथः ।
सप्तवीरान्महेष्वासानग्रानीकेष्वपोथयत्

tasyāṃ vidīryamāṇāyāṃ śineḥ putro mahārathaḥ |
saptavīrānmaheṣvāsānagrānīkeṣvapothayat

अथान्यानपि राजेन्द्र नानाजनपदेश्वरान् ।
शरैरनलसङ्काशैर्निन्ये वीरान्यमक्षयम्

athānyānapi rājendra nānājanapadeśvarān |
śarairanalasaṅkāśairninye vīrānyamakṣayam

शतमेकेन विव्याध शतेनैकं च पत्रिणाम् ।
द्विपारोहान्द्विपांश्चैव हयारोहान्हयांस्तथा ।
रथिनः साश्वसूतांश्च जघानेशः पशूनिव

śatamekena vivyādha śatenaikaṃ ca patriṇām |
dvipārohāndvipāṃścaiva hayārohānhayāṃstathā |
rathinaḥ sāśvasūtāṃśca jaghāneśaḥ paśūniva

तं तथाऽद्भुतकर्माणं शरसम्पातवर्षिणम् ।
न केचनाभ्यधावन्वै सात्यकिं तव सैनिकाः

taṃ tathā'dbhutakarmāṇaṃ śarasampātavarṣiṇam |
na kecanābhyadhāvanvai sātyakiṃ tava sainikāḥ

ते भीता मृद्यमानाश्च प्रमृष्टा दीर्घबाहुना ।
आयोधनं जहुर्वीरा दृष्टा तमतिमानिनम्

te bhītā mṛdyamānāśca pramṛṣṭā dīrghabāhunā |
āyodhanaṃ jahurvīrā dṛṣṭā tamatimāninam

तमेकं बहुधा पश्यन्मोहितास्तस्य तेजसा

tamekaṃ bahudhā paśyanmohitāstasya tejasā

रथैर्विमथितैश्चैव भग्ननीडैश्च मारिष ।
चक्रैर्विमथितैश्छत्रैर्ध्वजैश्च विनिपातितैः

rathairvimathitaiścaiva bhagnanīḍaiśca māriṣa |
cakrairvimathitaiśchatrairdhvajaiśca vinipātitaiḥ

अनुकर्षैः पताकाभिः शिरस्त्राणैः सकाञ्चनैः ।
बाहुभिश्चन्दनादिग्धैः साङ्गदैश्च विशाम्पते

anukarṣaiḥ patākābhiḥ śirastrāṇaiḥ sakāñcanaiḥ |
bāhubhiścandanādigdhaiḥ sāṅgadaiśca viśāmpate

हस्तिहस्तोपमैश्चापि भुजङ्गाभोगसन्निभैः ।
ऊरुभिः पृथिवी च्छन्ना मनुजानां नराधिप

hastihastopamaiścāpi bhujaṅgābhogasannibhaiḥ |
ūrubhiḥ pṛthivī cchannā manujānāṃ narādhipa

शशाङ्कुसन्निभैश्चैव वदनैश्चारुकुण्डलैः ।
पतितैर्ऋषभाक्षाणां बभौ भारत मेदिनी

śaśāṅkusannibhaiścaiva vadanaiścārukuṇḍalaiḥ |
patitairṛṣabhākṣāṇāṃ babhau bhārata medinī

गजैश्च बहुधा छिन्नैः शयानैः पर्वतोपमैः ।
रराजातिभृशं भूमिर्विकीर्णैरिव पर्वतैः

gajaiśca bahudhā chinnaiḥ śayānaiḥ parvatopamaiḥ |
rarājātibhṛśaṃ bhūmirvikīrṇairiva parvataiḥ

तपनीयमयैर्योक्त्रैर्मुक्ताजालविभूषितैः ।
उरश्छदैर्विचित्रैश्च व्यशोभन्त तुरङ्गमाः ।
गतसत्वा महीं प्राप्य प्रमृष्टा दीर्घबाहुना

tapanīyamayairyoktrairmuktājālavibhūṣitaiḥ |
uraśchadairvicitraiśca vyaśobhanta turaṅgamāḥ |
gatasatvā mahīṃ prāpya pramṛṣṭā dīrghabāhunā

नानाविधानि सैन्यानि तव हत्वा तु सात्वतः ।
प्रविष्टस्तावकं सैन्यं द्रावयित्वा चमूं भृशम्

nānāvidhāni sainyāni tava hatvā tu sātvataḥ |
praviṣṭastāvakaṃ sainyaṃ drāvayitvā camūṃ bhṛśam

ततस्तेनैव मार्गेण येन यातो धनञ्जयः ।
इयेष सात्यकिर्गन्तुं ततो द्रोणेन वारितः

tatastenaiva mārgeṇa yena yāto dhanañjayaḥ |
iyeṣa sātyakirgantuṃ tato droṇena vāritaḥ

भारद्वाजं समासाद्य युयुधानश्च सात्यकिः ।
न न्यवर्तत सङ्क्रुद्धो वेलामिव जलाशयः

bhāradvājaṃ samāsādya yuyudhānaśca sātyakiḥ |
na nyavartata saṅkruddho velāmiva jalāśayaḥ

निवार्य तु रणे द्रोणो युयुधानं महारथम् ।
विव्याध निशितैर्बाणैः पञ्चभिर्मर्मभेदिभिः

nivārya tu raṇe droṇo yuyudhānaṃ mahāratham |
vivyādha niśitairbāṇaiḥ pañcabhirmarmabhedibhiḥ

सात्यकिस्तु रणे द्रोणं राजन्विव्याध सप्तभिः ।
हेमपुङ्घैः शिलाधौतैः कङ्कबर्हिणवाजितैः

sātyakistu raṇe droṇaṃ rājanvivyādha saptabhiḥ |
hemapuṅghaiḥ śilādhautaiḥ kaṅkabarhiṇavājitaiḥ

षं षड्भिः सायकैर्द्रोणः साश्वयन्तारमार्दयत् ।
स तं न ममृषे द्रोणं युयुधानो महारथः

ṣaṃ ṣaḍbhiḥ sāyakairdroṇaḥ sāśvayantāramārdayat |
sa taṃ na mamṛṣe droṇaṃ yuyudhāno mahārathaḥ

सिंहनादं ततः कृत्वा द्रोणं विव्याध सात्यकिः ।
दशभिः सायकैश्चान्यैः षड्भिरष्टाभिरेव च

siṃhanādaṃ tataḥ kṛtvā droṇaṃ vivyādha sātyakiḥ |
daśabhiḥ sāyakaiścānyaiḥ ṣaḍbhiraṣṭābhireva ca

युयुधानः पुनर्द्रोणं विव्याध दशभिः शरैः ।
एकेन सारथिं चास्य चतुर्भिश्चतुरो हयान् ।
ध्वजमेकेन बाणेन विव्याध युधि मारिष

yuyudhānaḥ punardroṇaṃ vivyādha daśabhiḥ śaraiḥ |
ekena sārathiṃ cāsya caturbhiścaturo hayān |
dhvajamekena bāṇena vivyādha yudhi māriṣa

तं द्रोणः साश्वयन्तारं सरथध्वजमाशुगैः ।
त्वरन्प्राच्छादयद्बाणैः शलभानामिव व्रजैः

taṃ droṇaḥ sāśvayantāraṃ sarathadhvajamāśugaiḥ |
tvaranprācchādayadbāṇaiḥ śalabhānāmiva vrajaiḥ

तथैव युयुधानोऽपि द्रोणं बहुभिराशुगैः ।
प्राच्छादयदसम्भ्रान्तस्त्वरमाणो महारथः

tathaiva yuyudhāno'pi droṇaṃ bahubhirāśugaiḥ |
prācchādayadasambhrāntastvaramāṇo mahārathaḥ

द्रोणस्तु परमक्रुद्धः सात्यकिं परवीरहा ।
अवाक्रिच्छितैर्बाणैर्वासुदेवपराक्रमम्

droṇastu paramakruddhaḥ sātyakiṃ paravīrahā |
avākricchitairbāṇairvāsudevaparākramam

तं तथा शरजालेन प्रच्छाद्य महता पुनः ।
द्रोणः प्रहस्य शैनेयमिदं वचनमब्रवीत्

taṃ tathā śarajālena pracchādya mahatā punaḥ |
droṇaḥ prahasya śaineyamidaṃ vacanamabravīt

तवाचार्यो रणं हित्वा गतः कापुरुषो यथा ।
युध्यमानं च मां हित्वा प्रदक्षिणमवर्तत

tavācāryo raṇaṃ hitvā gataḥ kāpuruṣo yathā |
yudhyamānaṃ ca māṃ hitvā pradakṣiṇamavartata

त्वं हि मे युध्यतो नाद्य जीवन्यास्यसि माधव ।
यदि मां त्वं रणे हित्वा न यास्याचार्यवद्द्रुतम्

tvaṃ hi me yudhyato nādya jīvanyāsyasi mādhava |
yadi māṃ tvaṃ raṇe hitvā na yāsyācāryavaddrutam

धनञ्जयस्य पदवीं धर्मराजस्य शासनात् ।
गच्छामि स्वस्ति ते ब्रह्मन्न मे कालात्ययो भवेत्

dhanañjayasya padavīṃ dharmarājasya śāsanāt |
gacchāmi svasti te brahmanna me kālātyayo bhavet

आचार्यानुगतो मार्गः शिष्यैरन्वास्यते सदा ।
तस्मादेव व्रजाम्याशु यथा मे स गुरुर्गतः

ācāryānugato mārgaḥ śiṣyairanvāsyate sadā |
tasmādeva vrajāmyāśu yathā me sa gururgataḥ

एतावदुक्त्वा शैनेय आचार्यं परिवर्जयन् ।
प्रयातः सहसा राजन्सारथिं चेदमब्रवीत्

etāvaduktvā śaineya ācāryaṃ parivarjayan |
prayātaḥ sahasā rājansārathiṃ cedamabravīt

द्रोणः करिष्यते यत्नं सर्वथा मम वारणे ।
यत्तो याहि रणे सूत शृणु चेदं वचः परम्

droṇaḥ kariṣyate yatnaṃ sarvathā mama vāraṇe |
yatto yāhi raṇe sūta śṛṇu cedaṃ vacaḥ param

एतदालोक्यते सैन्यमावन्त्यानां महाप्रभम् ।
अस्यानन्तरतस्त्वेतद्दाक्षिणात्यं महद्बलम्

etadālokyate sainyamāvantyānāṃ mahāprabham |
asyānantaratastvetaddākṣiṇātyaṃ mahadbalam

तदनन्तरमेतच्च बाह्लिकानां महद्बलम् ।
बाह्लिकाभ्याशतो युक्तं कर्णस्य च महद्बलम्

tadanantarametacca bāhlikānāṃ mahadbalam |
bāhlikābhyāśato yuktaṃ karṇasya ca mahadbalam

अन्योन्येन हि सैन्यानि भिन्नान्येतानि सारथे ।
अन्योन्यं समुपाश्रित्य न त्यक्ष्यन्ति रणाजिरम्

anyonyena hi sainyāni bhinnānyetāni sārathe |
anyonyaṃ samupāśritya na tyakṣyanti raṇājiram

एतदन्तरमासाद्य चोदयाश्वान्प्रहृष्टवत् ।
मध्यमं जवमास्थाय वह मामत्र सारथे

etadantaramāsādya codayāśvānprahṛṣṭavat |
madhyamaṃ javamāsthāya vaha māmatra sārathe

बाह्लिका यत्र दृश्यन्ते नानाप्रहरणोद्यताः ।
दाक्षिणात्याश्च बहवः सूतपुत्रपुरोगमाः

bāhlikā yatra dṛśyante nānāpraharaṇodyatāḥ |
dākṣiṇātyāśca bahavaḥ sūtaputrapurogamāḥ

हस्त्यश्वरथसम्बाधं यच्चानीकं विलोक्यते ।
नानादेशसमुत्थैश्च पदातिभिरधिष्ठितम्

hastyaśvarathasambādhaṃ yaccānīkaṃ vilokyate |
nānādeśasamutthaiśca padātibhiradhiṣṭhitam

*ततः शक्यो महाव्यूहो भेत्तुं स सहसा रणे ।
तं देशं त्वरिता यामो मृद्ग्रन्तो युधि शात्रवान्

*tataḥ śakyo mahāvyūho bhettuṃ sa sahasā raṇe |
taṃ deśaṃ tvaritā yāmo mṛdgranto yudhi śātravān

तत्रैते सम्प्रहृष्टत्वान्नास्मान्प्रति युयुत्सवः

tatraite samprahṛṣṭatvānnāsmānprati yuyutsavaḥ

अयुध्यमानो बहुभिरेकं प्राप्य सुदुर्बलम् ।
बलं प्रमथ्य गच्छामि मिषतां सर्वधन्विनाम्

ayudhyamāno bahubhirekaṃ prāpya sudurbalam |
balaṃ pramathya gacchāmi miṣatāṃ sarvadhanvinām

मध्यतो याहि यत्रोग्रं कर्णस्य सुमहद्बलम् ।
यत्रैते परमक्रुद्धा दाक्षिणात्या महारथाः ।
एतान्विजित्य सङ्ग्रामे ततो यामो धनञ्जयम्

madhyato yāhi yatrograṃ karṇasya sumahadbalam |
yatraite paramakruddhā dākṣiṇātyā mahārathāḥ |
etānvijitya saṅgrāme tato yāmo dhanañjayam

युयुधानवचः श्रुत्वा युयुधानस्य सारथिः ।
यथोक्तमगमद्राजन्वर्जयन्द्रोणमाहवे

yuyudhānavacaḥ śrutvā yuyudhānasya sārathiḥ |
yathoktamagamadrājanvarjayandroṇamāhave

तं द्रोणोऽनुययौ क्रुद्धो विकिरन्विशिखान्बहून् ।
युयुधानं महाभागं गच्छन्तमनिवर्तिनम्

taṃ droṇo'nuyayau kruddho vikiranviśikhānbahūn |
yuyudhānaṃ mahābhāgaṃ gacchantamanivartinam

स च सैन्यं महद्भित्त्वा दाक्षिणात्यबलं च तत् ।
कर्णस्य सैन्यं सुमहदभिहत्य शितैः शरैः

sa ca sainyaṃ mahadbhittvā dākṣiṇātyabalaṃ ca tat |
karṇasya sainyaṃ sumahadabhihatya śitaiḥ śaraiḥ

प्राविशद्भारतीं सेनामपर्यन्तां स सात्यकिः ।
सात्यको हि ततः सैन्यं द्रावयन्स समन्ततः

prāviśadbhāratīṃ senāmaparyantāṃ sa sātyakiḥ |
sātyako hi tataḥ sainyaṃ drāvayansa samantataḥ

प्रविष्टे युयुधाने तु सैनिकेषु द्रुतेषु च ।
अमर्षी कृतवर्मा तु सात्यकिं पर्यवारयत्

praviṣṭe yuyudhāne tu sainikeṣu druteṣu ca |
amarṣī kṛtavarmā tu sātyakiṃ paryavārayat

तमापतन्तं विशिखैः षड्भिराहत्य सात्यकिः ।
चतुर्भिश्चतुरोऽस्याश्वानाजघानाशु वीर्यवान्

tamāpatantaṃ viśikhaiḥ ṣaḍbhirāhatya sātyakiḥ |
caturbhiścaturo'syāśvānājaghānāśu vīryavān

ततः पुनः षोडशभिर्नतपर्वभिराशुगैः ।
सात्यकिः कृतवर्माणं प्रत्यविध्यत्स्तनान्तरे

tataḥ punaḥ ṣoḍaśabhirnataparvabhirāśugaiḥ |
sātyakiḥ kṛtavarmāṇaṃ pratyavidhyatstanāntare

स ताड्यमानो विशिखैर्बहुभिस्तिग्मतेजनैः ।
सात्वतेन महाराज कृतवर्मा न चक्षमे

sa tāḍyamāno viśikhairbahubhistigmatejanaiḥ |
sātvatena mahārāja kṛtavarmā na cakṣame

स वत्सन्दतं सन्धाय तिग्मांश्वनलसप्रभम् ।
आकृष्य राजन्नाकर्णाद्विव्याधोरसि सात्यकिम्

sa vatsandataṃ sandhāya tigmāṃśvanalasaprabham |
ākṛṣya rājannākarṇādvivyādhorasi sātyakim

स तस्य देहावरणं भित्त्वा देहं च सायकः ।
सपुङ्खपत्रः पृथिवीं विवेश रुधिरोक्षितः

sa tasya dehāvaraṇaṃ bhittvā dehaṃ ca sāyakaḥ |
sapuṅkhapatraḥ pṛthivīṃ viveśa rudhirokṣitaḥ

अथास्य बहुभिर्बाणैरच्छिनत्परमास्त्रवित् ।
स मार्गणगणं राजन्कृतवर्मा शरासनम्

athāsya bahubhirbāṇairacchinatparamāstravit |
sa mārgaṇagaṇaṃ rājankṛtavarmā śarāsanam

विव्याध च रणे राजन्सात्यकिं सत्यविक्रमम् ।
दशभिर्विशिखैस्तीक्ष्णैरभिक्रुद्धः स्तनान्तरे

vivyādha ca raṇe rājansātyakiṃ satyavikramam |
daśabhirviśikhaistīkṣṇairabhikruddhaḥ stanāntare

ततः प्रशीर्णे धनुषि शक्त्या शक्तिमतां वरः ।
जघान दक्षिणं बहुं सात्यकिः कृतवर्मणः

tataḥ praśīrṇe dhanuṣi śaktyā śaktimatāṃ varaḥ |
jaghāna dakṣiṇaṃ bahuṃ sātyakiḥ kṛtavarmaṇaḥ

ततोऽन्यत्सुदृढं चापं पूर्णमायम्य सात्यकिः ।
व्यसृजद्विशिखांस्तूर्णं शतशोऽथ सहस्रशः

tato'nyatsudṛḍhaṃ cāpaṃ pūrṇamāyamya sātyakiḥ |
vyasṛjadviśikhāṃstūrṇaṃ śataśo'tha sahasraśaḥ

सरथं कृतवर्माणं समन्तात्पर्यवारयत् ।
छादयित्वा रणे राजन्हार्दिक्यं स तु सात्यकिः ।
अथास्य भल्लेन शिरः सारथेः समकृन्तत

sarathaṃ kṛtavarmāṇaṃ samantātparyavārayat |
chādayitvā raṇe rājanhārdikyaṃ sa tu sātyakiḥ |
athāsya bhallena śiraḥ sāratheḥ samakṛntata

स पपात हतः सूतो हार्दिक्यस्य महारथात् ।
ततस्ते यन्तृरहिताः प्राद्रवंस्तुरगा भृशम्

sa papāta hataḥ sūto hārdikyasya mahārathāt |
tataste yantṛrahitāḥ prādravaṃsturagā bhṛśam

अथ भोजस्तु सम्भ्रान्तो निगृह्य तुरगामन्स्वयम् ।
तस्थौ वीरो धनुष्पाणिस्तत्सैन्यान्यभ्यपूजयन्

atha bhojastu sambhrānto nigṛhya turagāmansvayam |
tasthau vīro dhanuṣpāṇistatsainyānyabhyapūjayan

स मुहूर्तमिवाश्वास्य सदश्वान्समनोदयत् ।
व्यपेत भीरमित्राणामावहत्सुमहद्भयम्

sa muhūrtamivāśvāsya sadaśvānsamanodayat |
vyapeta bhīramitrāṇāmāvahatsumahadbhayam

सात्यकिश्चात्यगात्तस्मात्स तु भीममुपाद्रवत्

sātyakiścātyagāttasmātsa tu bhīmamupādravat

युयुधानोऽपि राजेन्द्र भोजानीकाद्विनिःसृतः ।
प्रययौ त्वरितस्तूर्णं काम्भोजानां महाचमूम्

yuyudhāno'pi rājendra bhojānīkādviniḥsṛtaḥ |
prayayau tvaritastūrṇaṃ kāmbhojānāṃ mahācamūm

स तत्र बहुभिः शूरैः सन्निरुद्धो महारथैः ।
न चचाल तदा राजन्सात्यकिः सत्यविक्रमः

sa tatra bahubhiḥ śūraiḥ sanniruddho mahārathaiḥ |
na cacāla tadā rājansātyakiḥ satyavikramaḥ

सन्धाय च चमूं द्रोणो भोजे भारं निवेश्य च ।
अभ्यधावद्रणे यत्तो युयुधानं युयुत्सया

sandhāya ca camūṃ droṇo bhoje bhāraṃ niveśya ca |
abhyadhāvadraṇe yatto yuyudhānaṃ yuyutsayā

तथा तमनुधावन्तं युयुधानस्य पृष्ठतः ।
न्यवारयन्त संहृष्टाः पाण्डुसैन्ये ब्रृहत्तमाः ।
समासाद्य तु हार्दिक्यं रथानां प्रवरं रथम्

tathā tamanudhāvantaṃ yuyudhānasya pṛṣṭhataḥ |
nyavārayanta saṃhṛṣṭāḥ pāṇḍusainye brṛhattamāḥ |
samāsādya tu hārdikyaṃ rathānāṃ pravaraṃ ratham

पाञ्चाला विगतोत्साहा भीमसेनपुरोगमाः ।
विक्रम्य वारिता राजन्वीरेण कृतवर्मणा

pāñcālā vigatotsāhā bhīmasenapurogamāḥ |
vikramya vāritā rājanvīreṇa kṛtavarmaṇā

यतमानांश्च तान्सर्वानीषद्विगतचेतसः ।
अभितस्ताञ्शरौघेण क्लान्तवाहानकारयत्

yatamānāṃśca tānsarvānīṣadvigatacetasaḥ |
abhitastāñśaraugheṇa klāntavāhānakārayat

निगृहीतास्तु भोजेन भोजानीकेप्सवो रणे ।
अतिष्ठन्नार्यवद्वीराः प्रार्थयन्तो महद्यशः ।
हार्दिक्यं समरे यत्ता न शेकुः प्रतिवीक्षितुम्

nigṛhītāstu bhojena bhojānīkepsavo raṇe |
atiṣṭhannāryavadvīrāḥ prārthayanto mahadyaśaḥ |
hārdikyaṃ samare yattā na śekuḥ prativīkṣitum