Chapter 37: Anugita: Brahma describes the guna of tamas

तदव्यक्तमनुद्रिक्तं सर्वव्यापि ध्रुवं स्थिरम् ।
नवद्वारं पुरं विद्यात्त्रिगुणं पञ्चधातुकम्

tadavyaktamanudriktaṃ sarvavyāpi dhruvaṃ sthiram |
navadvāraṃ puraṃ vidyāttriguṇaṃ pañcadhātukam

एकादशपरिक्षेपं मनोव्याकरणात्मकम् ।
बुद्धिस्वामिकमित्येतत्परमेकादशं भवेत्

ekādaśaparikṣepaṃ manovyākaraṇātmakam |
buddhisvāmikamityetatparamekādaśaṃ bhavet

त्रीणि स्रोतांसि यान्यस्मिन्नाप्यायन्ते पुनःपुनः ।
प्रनाड्यस्तिस्र एवैताः प्रवर्न्तते गुणात्मिकाः

trīṇi srotāṃsi yānyasminnāpyāyante punaḥpunaḥ |
pranāḍyastisra evaitāḥ pravarntate guṇātmikāḥ

तमो रजस्तथा सत्वं गुणानेतान्प्रचक्षते ।
अन्योन्यमिथुनाः सर्वे तथाऽन्योन्यानुजीविनः

tamo rajastathā satvaṃ guṇānetānpracakṣate |
anyonyamithunāḥ sarve tathā'nyonyānujīvinaḥ

अन्योन्यापाश्रयाश्चापि तथाऽन्योन्यानुवर्तिनः ।
अन्योन्यव्यतिषक्ताश्च त्रिगुणाः पञ्चधातवः

anyonyāpāśrayāścāpi tathā'nyonyānuvartinaḥ |
anyonyavyatiṣaktāśca triguṇāḥ pañcadhātavaḥ

तमसो मिथुनं सत्वं सत्वस्य मिथुनं रजः ।
रजसश्चापि सत्वं स्यात्सत्वस्य मिथुनं तमः

tamaso mithunaṃ satvaṃ satvasya mithunaṃ rajaḥ |
rajasaścāpi satvaṃ syātsatvasya mithunaṃ tamaḥ

नियम्यते तमो यत्र रजस्तत्र निवर्तते ।
नियम्यते रजो यत्र सत्वं तत्र प्रवर्तते

niyamyate tamo yatra rajastatra nivartate |
niyamyate rajo yatra satvaṃ tatra pravartate

नैशात्मकं तमो विद्यात्त्रिगुणं मोहसंज्ञितम् ।
अधर्मलक्षणं चैव नियतं पापकर्मसु ।
तामसं रूपमेतत्तु दृश्यते चापि सङ्गतम्

naiśātmakaṃ tamo vidyāttriguṇaṃ mohasaṃjñitam |
adharmalakṣaṇaṃ caiva niyataṃ pāpakarmasu |
tāmasaṃ rūpametattu dṛśyate cāpi saṅgatam

प्रकृत्यात्मकमेवाहू रजः पर्यायकारकम् ।
सत्त्वे तु सर्वभूतेषु दृश्यमुत्पत्तिलक्षणम्

prakṛtyātmakamevāhū rajaḥ paryāyakārakam |
sattve tu sarvabhūteṣu dṛśyamutpattilakṣaṇam

प्रकाशं सर्वभूतेषु लाघवं श्रद्धधानता ।
सात्विकं रूपमेवं तु लाघवं साधुसंमितम्

prakāśaṃ sarvabhūteṣu lāghavaṃ śraddhadhānatā |
sātvikaṃ rūpamevaṃ tu lāghavaṃ sādhusaṃmitam

एतेषां गुणतत्त्वानि वक्ष्यन्ते तत्त्वहेतुभिः ।
समासव्यासयुक्तानि तत्त्वतस्तानि बोधत

eteṣāṃ guṇatattvāni vakṣyante tattvahetubhiḥ |
samāsavyāsayuktāni tattvatastāni bodhata

सम्मोहो ज्ञानमत्यागः कर्मणामविनिर्णयः ।
स्वप्नः स्तंभो भयं लोभः शोकः सुकृतदूषणम्

sammoho jñānamatyāgaḥ karmaṇāmavinirṇayaḥ |
svapnaḥ staṃbho bhayaṃ lobhaḥ śokaḥ sukṛtadūṣaṇam

अस्मृतिश्चाविपाकश्च नास्तिक्यं भिन्नवृत्तिता ।
निर्विशेषत्वमन्धत्वं जघन्यगुणवृत्तिता

asmṛtiścāvipākaśca nāstikyaṃ bhinnavṛttitā |
nirviśeṣatvamandhatvaṃ jaghanyaguṇavṛttitā

अकृते कृतमानित्वमज्ञाने ज्ञानमानिता ।
अमैत्री विकृतो भावो ह्यश्रद्धा मूढभावना

akṛte kṛtamānitvamajñāne jñānamānitā |
amaitrī vikṛto bhāvo hyaśraddhā mūḍhabhāvanā

अनार्जवमसंज्ञत्वं कर्म पापमचेतना ।
गुरुत्वं सन्नभावत्वमवशित्वमवाग्गतिः

anārjavamasaṃjñatvaṃ karma pāpamacetanā |
gurutvaṃ sannabhāvatvamavaśitvamavāggatiḥ

सर्व एते गुणा वृत्तास्तामसाः सम्प्रकीर्तिताः ।
ये चान्ये विहिता भावा लोकेऽस्मिन्भावसंज्ञिताः

sarva ete guṇā vṛttāstāmasāḥ samprakīrtitāḥ |
ye cānye vihitā bhāvā loke'sminbhāvasaṃjñitāḥ

तत्रतत्र नियम्यन्ते सर्वे ते तामसा गुणाः ।
परिवादकथा नित्यं मेवब्राह्मणवैरिता

tatratatra niyamyante sarve te tāmasā guṇāḥ |
parivādakathā nityaṃ mevabrāhmaṇavairitā

अत्यागश्चातिमानश्च मोहो मन्युस्तथाऽक्षमा ।
मत्सरश्चैव भूतेषु तामसं वृत्तमिष्यते

atyāgaścātimānaśca moho manyustathā'kṣamā |
matsaraścaiva bhūteṣu tāmasaṃ vṛttamiṣyate

वृथारम्भा हि ये केचिद्वृथा दानानि यानि च ।
वृथाभक्षणमित्येतत्तामसं वृत्तमिष्यते

vṛthārambhā hi ye kecidvṛthā dānāni yāni ca |
vṛthābhakṣaṇamityetattāmasaṃ vṛttamiṣyate

अतिवादोऽतितिक्षा च मात्सर्यमभिमानिता ।
अश्रद्दधानता चैव तामसं वृत्तमिष्यते

ativādo'titikṣā ca mātsaryamabhimānitā |
aśraddadhānatā caiva tāmasaṃ vṛttamiṣyate

एवंविधाश्च ये केचिल्लोकेऽस्मिन्पापकर्मिणः ।
मनुष्या भिन्नमर्यादास्ते सर्वे तामसाः स्मृताः

evaṃvidhāśca ye kecilloke'sminpāpakarmiṇaḥ |
manuṣyā bhinnamaryādāste sarve tāmasāḥ smṛtāḥ

तेषां योनीः प्रवक्ष्यामि नियताः पापकर्मिणाम् ।
अवाङ्निरयभावा ये तिर्यङ्निरयगामिनः ।

teṣāṃ yonīḥ pravakṣyāmi niyatāḥ pāpakarmiṇām |
avāṅnirayabhāvā ye tiryaṅnirayagāminaḥ |

स्थावराणि च भूतानि पशवो वाहनानि च ।
क्रव्यादा दंदशूकाश्च कृमिकीटविहङ्गमाः

sthāvarāṇi ca bhūtāni paśavo vāhanāni ca |
kravyādā daṃdaśūkāśca kṛmikīṭavihaṅgamāḥ

अब्जाता जन्तवश्चैव सर्वे चापि चतुष्पदाः ।
उन्मत्ता बधिरा मूका ये चान्ये पापरोगिणः

abjātā jantavaścaiva sarve cāpi catuṣpadāḥ |
unmattā badhirā mūkā ye cānye pāparogiṇaḥ

मग्नास्तमसि दुर्वृत्ताः स्वकर्मकृतलक्षणाः ।
अवाक्स्रोतस इत्येते मग्नास्तमसि तामसाः

magnāstamasi durvṛttāḥ svakarmakṛtalakṣaṇāḥ |
avāksrotasa ityete magnāstamasi tāmasāḥ

तेषामुत्कर्षमुद्रेकं वक्ष्याम्यहमतः परम् ।
यथा ते सुकृतां लोकाँल्लभन्ते पुण्यकर्मिणः

teṣāmutkarṣamudrekaṃ vakṣyāmyahamataḥ param |
yathā te sukṛtāṃ lokām̐llabhante puṇyakarmiṇaḥ

अन्यथा प्रतिपन्नास्तु विवृद्धा ये च कर्मसु ।
स्वकर्मनिरतानां च ब्राह्मणानां शुभैषिणाम्

anyathā pratipannāstu vivṛddhā ye ca karmasu |
svakarmaniratānāṃ ca brāhmaṇānāṃ śubhaiṣiṇām

संस्कारेणोर्ध्वमायान्ति यतमानाः सलोकताम् ।
स्वर्गे गच्छन्ति देवानामित्येषा वैदिकी श्रुतिः

saṃskāreṇordhvamāyānti yatamānāḥ salokatām |
svarge gacchanti devānāmityeṣā vaidikī śrutiḥ

अन्यथा प्रतिपन्नास्ते विबुद्धाः स्वेषु कर्मसु ।
पुनरावृत्तिधर्माणस्ते भवन्तीह मानुषाः

anyathā pratipannāste vibuddhāḥ sveṣu karmasu |
punarāvṛttidharmāṇaste bhavantīha mānuṣāḥ

पापयोनिं समापन्नाश्चण्डाला मूकचूचुकाः ॥
वर्णान्पर्यायशश्चापि प्राप्नुवन्त्युत्तरोत्तरम्

pāpayoniṃ samāpannāścaṇḍālā mūkacūcukāḥ ||
varṇānparyāyaśaścāpi prāpnuvantyuttarottaram

शूद्रयोनिमतिक्रम्य ये चान्ये तामसा गुणाः ।
स्रोतोमध्ये समागम्य वर्तन्ते तामसे गुणे

śūdrayonimatikramya ye cānye tāmasā guṇāḥ |
srotomadhye samāgamya vartante tāmase guṇe

अभिष्वङ्गस्तु कामेषु महामोह इति स्मृतः ।
ऋषयो मुनयो देवा मुह्यन्त्यत्र सुखेप्सवः

abhiṣvaṅgastu kāmeṣu mahāmoha iti smṛtaḥ |
ṛṣayo munayo devā muhyantyatra sukhepsavaḥ

तमोमोहो महामोहस्तामिस्रो ह्यन्धसंज्ञितः ।
मरणं त्वन्धतामिस्रस्तामिस्रः क्रोध उच्यते

tamomoho mahāmohastāmisro hyandhasaṃjñitaḥ |
maraṇaṃ tvandhatāmisrastāmisraḥ krodha ucyate

वर्णतो गुणतश्चैव योनितश्चैव तत्त्वतः ।
सर्वमेततमो विप्राः कीर्तितं वो यथाविधि

varṇato guṇataścaiva yonitaścaiva tattvataḥ |
sarvametatamo viprāḥ kīrtitaṃ vo yathāvidhi

को न्वेतद्बुध्यते साधु को न्वेतत्साधु पश्यति ।
अतत्त्वे तत्त्वदर्शी यस्तमसस्तच्च लक्षणम्

ko nvetadbudhyate sādhu ko nvetatsādhu paśyati |
atattve tattvadarśī yastamasastacca lakṣaṇam

तमोगुणा बहुविधाः प्रकीर्तिता
यथावदुक्तं च तमः परावरम् ।
नरो हि यो वेद गुणानिमान्सदा
स तामसैः सर्वगुणैः प्रमुच्यते

tamoguṇā bahuvidhāḥ prakīrtitā
yathāvaduktaṃ ca tamaḥ parāvaram |
naro hi yo veda guṇānimānsadā
sa tāmasaiḥ sarvaguṇaiḥ pramucyate