Chapter 203: Fire bursts from Shri Krishna's mouth

अयं नारायणः श्रीमान्पुत्रार्थे व्रतकाङ्क्षया ।
दीक्षितोऽभून्महाबाहुः पुरा द्वादशवार्षिकम्

ayaṃ nārāyaṇaḥ śrīmānputrārthe vratakāṅkṣayā |
dīkṣito'bhūnmahābāhuḥ purā dvādaśavārṣikam

दीक्षितं केशवं द्रष्टुमभिजग्मुर्महर्षयः ।
सेवित्वा च महात्मानः प्रीयमाणं जनार्दनम्

dīkṣitaṃ keśavaṃ draṣṭumabhijagmurmaharṣayaḥ |
sevitvā ca mahātmānaḥ prīyamāṇaṃ janārdanam

नारदः पर्वतश्चैव कृष्णद्वैपायनस्तथा ।
देवलः काश्यपश्चैव हस्तिकाश्यप एव च ।
जमदग्निश्च राजेन्द्र धौम्यो वाल्मीकिरेव च

nāradaḥ parvataścaiva kṛṣṇadvaipāyanastathā |
devalaḥ kāśyapaścaiva hastikāśyapa eva ca |
jamadagniśca rājendra dhaumyo vālmīkireva ca

अपरेऽपि तपःसिद्धाः सत्यव्रतपरायणाः ।
शिष्यैरनुगताः सर्वे ब्रह्मविद्भिरकल्मषैः

apare'pi tapaḥsiddhāḥ satyavrataparāyaṇāḥ |
śiṣyairanugatāḥ sarve brahmavidbhirakalmaṣaiḥ

केशवस्तानभिगतान्प्रीत्या सम्परिगृह्य च ।
तेषामतिथिसत्कारं पूजनार्थं कुलोचितम् ।
देवकीतनयो हृष्टो देवतुल्यमकल्पयत्

keśavastānabhigatānprītyā samparigṛhya ca |
teṣāmatithisatkāraṃ pūjanārthaṃ kulocitam |
devakītanayo hṛṣṭo devatulyamakalpayat

उपविष्टेषु सर्वेषु विष्टरेषु तदाऽनघ ।
विश्वस्तेष्व्नभितुष्टेषु केशवार्चनया पुनः

upaviṣṭeṣu sarveṣu viṣṭareṣu tadā'nagha |
viśvasteṣvnabhituṣṭeṣu keśavārcanayā punaḥ

परस्परं कथा दिव्याः प्रावर्तन्त मनोरमाः ।
विष्णोर्नारायणस्यैव प्रसादात्कथयामि ताः

parasparaṃ kathā divyāḥ prāvartanta manoramāḥ |
viṣṇornārāyaṇasyaiva prasādātkathayāmi tāḥ

तस्यैव व्रतचर्यायां मुनिभिर्विस्मितं पुरा ।
यत्र गोवृषभाङ्कस्य प्रभावोऽभून्महात्मनः

tasyaiva vratacaryāyāṃ munibhirvismitaṃ purā |
yatra govṛṣabhāṅkasya prabhāvo'bhūnmahātmanaḥ

यत्र देवी महादेवमपृच्छत्संशयान्पुरा ।
कथयामास सर्वांस्तान्देव्याः प्रियचिकीर्षया

yatra devī mahādevamapṛcchatsaṃśayānpurā |
kathayāmāsa sarvāṃstāndevyāḥ priyacikīrṣayā

उमापत्योश्च संवादं शृणु तात मनोरमम् ।
वर्णाश्रमाणां धर्मश्च तत्र तात समाहितः

umāpatyośca saṃvādaṃ śṛṇu tāta manoramam |
varṇāśramāṇāṃ dharmaśca tatra tāta samāhitaḥ

ऋषिधर्मश्च निखिलो राजधर्मस्च पुष्कलः ।
गृहस्थधर्मश्च शुभः कर्मपाकफलानि च

ṛṣidharmaśca nikhilo rājadharmasca puṣkalaḥ |
gṛhasthadharmaśca śubhaḥ karmapākaphalāni ca

देवगुह्यं च विविधं दानधर्मविधिस्तथा ।
विधानमत्र प्रोक्तं यद्यमस्य नियमस्य च

devaguhyaṃ ca vividhaṃ dānadharmavidhistathā |
vidhānamatra proktaṃ yadyamasya niyamasya ca

यमलोकविधानं च स्वर्गलोकगतिस्तथा ।
प्राणमोक्षविधिश्चैव तीर्थचर्या च पुष्कला

yamalokavidhānaṃ ca svargalokagatistathā |
prāṇamokṣavidhiścaiva tīrthacaryā ca puṣkalā

मोक्षधर्मविधानं च साङ्ख्ययोगसमन्वितम् ।
स्त्रीधर्मश्च स्वयं देव्या देवदेवाय भाषितः

mokṣadharmavidhānaṃ ca sāṅkhyayogasamanvitam |
strīdharmaśca svayaṃ devyā devadevāya bhāṣitaḥ

एवमादि शुभं सर्वं तत्र तात समाहितम् ।
रुद्राण्याः संशयप्रश्नो यत्र तात प्रवर्तते

evamādi śubhaṃ sarvaṃ tatra tāta samāhitam |
rudrāṇyāḥ saṃśayapraśno yatra tāta pravartate

धन्यं यशस्यमायुष्यं धर्म्यं च परमं हितम् ।
पुष्टियोगमिमं दिव्यं कथ्यमानं मया शृणु

dhanyaṃ yaśasyamāyuṣyaṃ dharmyaṃ ca paramaṃ hitam |
puṣṭiyogamimaṃ divyaṃ kathyamānaṃ mayā śṛṇu

इतिहासमिमं दिव्यं पवित्रं परमं शुभम् ।
सायं प्रातः सदा सम्यक् श्रोतव्यं च बुभूषता

itihāsamimaṃ divyaṃ pavitraṃ paramaṃ śubham |
sāyaṃ prātaḥ sadā samyak śrotavyaṃ ca bubhūṣatā

ततो नारायणो देवः संक्लिष्टो व्रतचर्यया ।
वह्निर्विनिःसृतो वक्त्रात्कृष्णस्याद्भुतदर्शनः

tato nārāyaṇo devaḥ saṃkliṣṭo vratacaryayā |
vahnirviniḥsṛto vaktrātkṛṣṇasyādbhutadarśanaḥ

अग्निना तेन महता निःसृतेन मुखाद्विभोः ।
पश्यतामेव सर्वेषां दग्ध एव नगोत्तमः

agninā tena mahatā niḥsṛtena mukhādvibhoḥ |
paśyatāmeva sarveṣāṃ dagdha eva nagottamaḥ

मृगपक्षिगणाकीर्णः श्वापदैरपि सङ्कुलः ।
वृक्षगुल्मलताकीर्णो मथितो दीनदर्शनः

mṛgapakṣigaṇākīrṇaḥ śvāpadairapi saṅkulaḥ |
vṛkṣagulmalatākīrṇo mathito dīnadarśanaḥ

पुनः स दृष्टमात्रेण हरिणा सौम्यचेतसा ।
स बभूव गिरिः क्षिप्रं प्रफुल्लद्रुमकाननः

punaḥ sa dṛṣṭamātreṇa hariṇā saumyacetasā |
sa babhūva giriḥ kṣipraṃ praphulladrumakānanaḥ

सिद्धचारणसङ्घैश्च प्रसन्नैरुपशोभितः ।
मत्तवारणसंयुक्तो नानापक्षिगणैर्युतः ।
तदद्भुतमचिन्त्यं च सर्वेषामभवद्भृशम्

siddhacāraṇasaṅghaiśca prasannairupaśobhitaḥ |
mattavāraṇasaṃyukto nānāpakṣigaṇairyutaḥ |
tadadbhutamacintyaṃ ca sarveṣāmabhavadbhṛśam

तं दृष्ट्वा हृष्टरोमाणः सर्वे मुनिगणास्तदा ।
विस्तिताः परमायत्ताः साध्यसाकुललोचनाः ।
न किञ्चिदब्रुवंस्तत्र शुभं वा यदि वेतरत्

taṃ dṛṣṭvā hṛṣṭaromāṇaḥ sarve munigaṇāstadā |
vistitāḥ paramāyattāḥ sādhyasākulalocanāḥ |
na kiñcidabruvaṃstatra śubhaṃ vā yadi vetarat

ततो नारायणो देवो मुनिसङ्घे तु विस्मिते ।
तान्समीक्ष्यैव मधुरं बभाषे पुष्करेक्षणः

tato nārāyaṇo devo munisaṅghe tu vismite |
tānsamīkṣyaiva madhuraṃ babhāṣe puṣkarekṣaṇaḥ

किमर्थं मुनिसङ्घेऽस्मिन्विस्मयोऽयमनुत्तमः ।
एतन्मे संशयं सर्वे याथातथ्येन नन्दिताः ।
ऋषयो वक्तुमर्हन्ति निश्चयेनार्थकोविदाः

kimarthaṃ munisaṅghe'sminvismayo'yamanuttamaḥ |
etanme saṃśayaṃ sarve yāthātathyena nanditāḥ |
ṛṣayo vaktumarhanti niścayenārthakovidāḥ

केशवस्य वचः श्रुत्वा तुष्टुवुर्मुनिपुङ्गवाः ।
भवान्सृजति वै लोकान्भवान्संहरति प्रजाः ।
भवाञ्शीतं भवानुष्णं भवान्सत्यं भवान्क्रतुः

keśavasya vacaḥ śrutvā tuṣṭuvurmunipuṅgavāḥ |
bhavānsṛjati vai lokānbhavānsaṃharati prajāḥ |
bhavāñśītaṃ bhavānuṣṇaṃ bhavānsatyaṃ bhavānkratuḥ

भवानादिर्भवानन्तो भवतोऽन्यन्न विद्यते ।
स्थावरं जङ्गमं सर्वं त्वमेव पुरुषोत्तम

bhavānādirbhavānanto bhavato'nyanna vidyate |
sthāvaraṃ jaṅgamaṃ sarvaṃ tvameva puruṣottama

त्वत्तः सर्वमिदं तात लोकचक्रं प्रवर्तते ।
त्वमेवार्हसि तद्वक्तुं मुखादग्निविनिर्गमम्

tvattaḥ sarvamidaṃ tāta lokacakraṃ pravartate |
tvamevārhasi tadvaktuṃ mukhādagnivinirgamam

एतन्नो विस्मयकरं बभूव मधुसूदन ।
ततो विगतसंत्रासा भवाम पुरुषोत्तम ।
यदिच्छेत्तत्र वक्तव्यं कुतोऽस्माकं नियोगतः

etanno vismayakaraṃ babhūva madhusūdana |
tato vigatasaṃtrāsā bhavāma puruṣottama |
yadicchettatra vaktavyaṃ kuto'smākaṃ niyogataḥ

नित्यं हितार्थं लोकानां भवद्भिः क्रियते तपः ।
तस्माल्लोकहितं गुह्यं श्रूयतां कथयामि वः

nityaṃ hitārthaṃ lokānāṃ bhavadbhiḥ kriyate tapaḥ |
tasmāllokahitaṃ guhyaṃ śrūyatāṃ kathayāmi vaḥ

असुरः साम्प्रतं कश्चिदहितो लोकनाशनः ।
मायास्त्रकुशलश्चैव बलदर्पसमन्वितः

asuraḥ sāmprataṃ kaścidahito lokanāśanaḥ |
māyāstrakuśalaścaiva baladarpasamanvitaḥ

बभूव स मया बद्धो लोकानां हितकाम्यया ।
पुत्रेण मे वधो दृष्टस्तस्य वै मुनिपुङ्गवाः

babhūva sa mayā baddho lokānāṃ hitakāmyayā |
putreṇa me vadho dṛṣṭastasya vai munipuṅgavāḥ

तदर्थं पुत्रमेवाहं सिसृक्षुर्वनमागतः ।
आत्मनः सदृशं पुत्रमहं जनयितुं व्रतैः

tadarthaṃ putramevāhaṃ sisṛkṣurvanamāgataḥ |
ātmanaḥ sadṛśaṃ putramahaṃ janayituṃ vrataiḥ

एवं व्रतपरीतस्य तपस्तीव्रतया मम ।
अथात्मा मम देहस्थः सोग्निर्भूत्वा विनिःसृतः

evaṃ vrataparītasya tapastīvratayā mama |
athātmā mama dehasthaḥ sognirbhūtvā viniḥsṛtaḥ

विनिःसृत्य गतो द्रष्टुं क्षणेन च पितामहम् ।
ब्रह्मणा मन्मथोऽनङ्गः पुत्रत्वेन प्रकल्पितः ।
अनुज्ञातश्च तेनैव पुनरायान्ममान्तिकम्

viniḥsṛtya gato draṣṭuṃ kṣaṇena ca pitāmaham |
brahmaṇā manmatho'naṅgaḥ putratvena prakalpitaḥ |
anujñātaśca tenaiva punarāyānmamāntikam

एवं मे वैष्णवं तेजो मम वक्त्राद्विनिःसृतम् ।
तत्तेजसा निर्मथितः पुरतोऽयं गिरिः स्थितः

evaṃ me vaiṣṇavaṃ tejo mama vaktrādviniḥsṛtam |
tattejasā nirmathitaḥ purato'yaṃ giriḥ sthitaḥ

दृष्ट्वा दाहं गिरेस्तस्य सौम्यभावतया मम ।
पुनः स दृष्टमात्रेण गिरिरासीद्यथा पुरा

dṛṣṭvā dāhaṃ girestasya saumyabhāvatayā mama |
punaḥ sa dṛṣṭamātreṇa girirāsīdyathā purā

एतद्गुह्यं यथातथ्यं कथितं वः समासतः ।
भवन्तो व्यथिता येन विस्मिताश्च तपोधनाः

etadguhyaṃ yathātathyaṃ kathitaṃ vaḥ samāsataḥ |
bhavanto vyathitā yena vismitāśca tapodhanāḥ

ऋषीणामेवमुक्त्वा तु तान्पुनः प्रत्यभाषत

ṛṣīṇāmevamuktvā tu tānpunaḥ pratyabhāṣata