Chapter 188: Tapati bids Samvarana ask her father

अथ तस्यामदृश्यायां नृपतिः काममोहितः ।
पातनः शत्रुसङ्घानां पपात धरणीतले

atha tasyāmadṛśyāyāṃ nṛpatiḥ kāmamohitaḥ |
pātanaḥ śatrusaṅghānāṃ papāta dharaṇītale

तस्मिन्निपतिते भूमावथ सा चारुहासिनी ।
पुनः पीनायतश्रोणी दर्शयामास तं नृपम्

tasminnipatite bhūmāvatha sā cāruhāsinī |
punaḥ pīnāyataśroṇī darśayāmāsa taṃ nṛpam

अथाबभाषे कल्याणी वाचा मधुरया नृपम् ।
तं कुरूणां कुलकरं कामाभिहतचेतसम्

athābabhāṣe kalyāṇī vācā madhurayā nṛpam |
taṃ kurūṇāṃ kulakaraṃ kāmābhihatacetasam

उवाच मधुरं वाक्यं तपती हसतीव सा ।
उत्तिष्ठोत्तिष्ठ भद्रं ते न त्वमर्हस्यरिन्दम

uvāca madhuraṃ vākyaṃ tapatī hasatīva sā |
uttiṣṭhottiṣṭha bhadraṃ te na tvamarhasyarindama

मोहं नृपतिशार्दूल गन्तुमाविष्कृतः क्षितौ ।
एवमुक्तोऽथ नृपतिर्वाचा मधुरया तदा

mohaṃ nṛpatiśārdūla gantumāviṣkṛtaḥ kṣitau |
evamukto'tha nṛpatirvācā madhurayā tadā

ददर्श विपुलश्रोणीं तामेवाभिमुखे स्थिताम् ।
अथ तामसितापाङ्गीमाबभाषे स पार्थिवः

dadarśa vipulaśroṇīṃ tāmevābhimukhe sthitām |
atha tāmasitāpāṅgīmābabhāṣe sa pārthivaḥ

मन्मथाग्निपरीतात्मा सन्दिग्धाक्षरया गिरा ।
साधु त्वमसितापाङ्गि कामार्तं मत्तकाशिनि

manmathāgniparītātmā sandigdhākṣarayā girā |
sādhu tvamasitāpāṅgi kāmārtaṃ mattakāśini

भजस्व भजमानं मां प्राणा हि प्रजहन्ति माम् ।
त्वदर्थं हि विशालाक्षि मामयं निशितैः शरैः

bhajasva bhajamānaṃ māṃ prāṇā hi prajahanti mām |
tvadarthaṃ hi viśālākṣi māmayaṃ niśitaiḥ śaraiḥ

कामः कमलगर्भाभे प्रतिविध्यन्न शाम्यति ।
दष्टमेवमनाक्रन्दे भद्रे काममहाहिना

kāmaḥ kamalagarbhābhe pratividhyanna śāmyati |
daṣṭamevamanākrande bhadre kāmamahāhinā

सा त्वं पीनायतश्रोणी मामाप्नुहि वरानने ।
त्वदधीना हि मे प्राणाः किन्नरोद्गीतभाषिणि

sā tvaṃ pīnāyataśroṇī māmāpnuhi varānane |
tvadadhīnā hi me prāṇāḥ kinnarodgītabhāṣiṇi

चारुसर्वानवद्याङ्गि पद्मेन्दुप्रतिमानने ।
न ह्यहं त्वदृते भीरु शक्ष्यामि खलु जीवितुम्

cārusarvānavadyāṅgi padmendupratimānane |
na hyahaṃ tvadṛte bhīru śakṣyāmi khalu jīvitum

कामः कमलपत्राक्षि प्रतिविध्यति मामयम् ।
तस्मात्कुरु विशालाक्षि मय्यनुक्रोशमङ्गने

kāmaḥ kamalapatrākṣi pratividhyati māmayam |
tasmātkuru viśālākṣi mayyanukrośamaṅgane

भक्तं मामसितापाङ्गि न परित्यक्तुमर्हसि ।
त्वं हि मां प्रीतियोगेन त्रातुमर्हसि भामिनि

bhaktaṃ māmasitāpāṅgi na parityaktumarhasi |
tvaṃ hi māṃ prītiyogena trātumarhasi bhāmini

त्वद्दर्शनकृतस्नेहं मनश्चलति मे भृशम् ।
न त्वां दृष्ट्वा पुनश्चान्यां द्रष्टुं कल्याणि रोचते

tvaddarśanakṛtasnehaṃ manaścalati me bhṛśam |
na tvāṃ dṛṣṭvā punaścānyāṃ draṣṭuṃ kalyāṇi rocate

प्रसीद वशगोऽहं ते भक्तं मां भज भामिनि ।
दृष्ट्वैव त्वां वरारोहे मन्मथो भृशमङ्गने

prasīda vaśago'haṃ te bhaktaṃ māṃ bhaja bhāmini |
dṛṣṭvaiva tvāṃ varārohe manmatho bhṛśamaṅgane

अन्तर्गतं विशालाक्षि विध्यति स्म पतत्त्रिभिः ।
मन्मथाग्निसमुद्भूतं दाहं कमललोचने

antargataṃ viśālākṣi vidhyati sma patattribhiḥ |
manmathāgnisamudbhūtaṃ dāhaṃ kamalalocane

प्रीतिसंयोगयुक्ताभिरद्भिः प्रह्लादयस्व मे ।
पुष्पायुधं दुराधर्षं प्रचण्डशरकार्मुकम्

prītisaṃyogayuktābhiradbhiḥ prahlādayasva me |
puṣpāyudhaṃ durādharṣaṃ pracaṇḍaśarakārmukam

त्वद्दर्शनसमुद्भूतं विध्यन्तं दुःसहैः शरैः ।
उपशामय कल्याणि आत्मदानेन भामिनि

tvaddarśanasamudbhūtaṃ vidhyantaṃ duḥsahaiḥ śaraiḥ |
upaśāmaya kalyāṇi ātmadānena bhāmini

गान्धर्वेण विवाहेन मामुपैहि वराङ्गने ।
विवाहानां हि रम्भोरु गान्धर्वः श्रेष्ठ उच्यते

gāndharveṇa vivāhena māmupaihi varāṅgane |
vivāhānāṃ hi rambhoru gāndharvaḥ śreṣṭha ucyate

नाहमीशाऽऽत्मनो राजन्कन्या पितृमती ह्यहम् ।
मयि चेदस्ति ते प्रीतिर्याचस्व पितरं मम

nāhamīśā''tmano rājankanyā pitṛmatī hyaham |
mayi cedasti te prītiryācasva pitaraṃ mama

यथा हि ते मया प्राणाः संभृताश्च नरेश्वर ।
दर्शनादेव भूयस्त्वं तथा प्राणान्ममाहरः

yathā hi te mayā prāṇāḥ saṃbhṛtāśca nareśvara |
darśanādeva bhūyastvaṃ tathā prāṇānmamāharaḥ

न चाहमीशा देहस्य तस्मान्नृपतिसत्तम ।
समीपं नोपगच्छामि न स्वतन्त्रा हि योषितः

na cāhamīśā dehasya tasmānnṛpatisattama |
samīpaṃ nopagacchāmi na svatantrā hi yoṣitaḥ

का हि सर्वेषु लोकेषु विश्रुताभिजनं नृपम् ।
कन्या नाभिलषेन्नाथं भार्तारं भक्तवत्सलम्

kā hi sarveṣu lokeṣu viśrutābhijanaṃ nṛpam |
kanyā nābhilaṣennāthaṃ bhārtāraṃ bhaktavatsalam

तस्मादेवं गते काले याचस्व पितरं मम ।
आदित्यं प्रणिपातेन तपसा नियमेन च

tasmādevaṃ gate kāle yācasva pitaraṃ mama |
ādityaṃ praṇipātena tapasā niyamena ca

स चेत्कामयते दातुं तव मामरिसूदन ।
भविष्याम्यद्य ते राजन्सततं वशवर्तिनी

sa cetkāmayate dātuṃ tava māmarisūdana |
bhaviṣyāmyadya te rājansatataṃ vaśavartinī

अहं हि तपती नाम सावित्र्यवरजा सुता ।
अस्य लोकप्रदीपस्य सवितुः क्षत्रियर्षभ

ahaṃ hi tapatī nāma sāvitryavarajā sutā |
asya lokapradīpasya savituḥ kṣatriyarṣabha