Chapter 24: The Prachetas receive the Rudra Gita

विजिताश्वोऽधिराजासीत् पृथुपुत्रः पृथुश्रवाः ।
यवीयोभ्योऽददात्काष्ठा भ्रातृभ्यो भ्रातृवत्सलः

vijitāśvo'dhirājāsīt pṛthuputraḥ pṛthuśravāḥ |
yavīyobhyo'dadātkāṣṭhā bhrātṛbhyo bhrātṛvatsalaḥ

हर्यक्षायादिशत्प्राचीं धूम्रकेशाय दक्षिणाम् ।
प्रतीचीं वृकसंज्ञाय तुर्यां द्रविणसे विभुः

haryakṣāyādiśatprācīṃ dhūmrakeśāya dakṣiṇām |
pratīcīṃ vṛkasaṃjñāya turyāṃ draviṇase vibhuḥ

अन्तर्धानगतिं शक्रात् लब्ध्वान्तर्धानसंज्ञितः ।
अपत्यत्रयमाधत्त शिखण्डिन्यां सुसम्मतम्

antardhānagatiṃ śakrāt labdhvāntardhānasaṃjñitaḥ |
apatyatrayamādhatta śikhaṇḍinyāṃ susammatam

पावकः पवमानश्च शुचिरित्यग्नयः पुरा ।
वसिष्ठशापात् उत्पन्नाः पुनर्योगगतिं गताः

pāvakaḥ pavamānaśca śucirityagnayaḥ purā |
vasiṣṭhaśāpāt utpannāḥ punaryogagatiṃ gatāḥ

अन्तर्धानो नभस्वत्यां हविर्धानमविन्दत ।
य इन्द्रं अश्वहर्तारं विद्वानपि न जघ्निवान्

antardhāno nabhasvatyāṃ havirdhānamavindata |
ya indraṃ aśvahartāraṃ vidvānapi na jaghnivān

राज्ञां वृत्तिं करादान दण्डशुल्कादिदारुणाम् ।
मन्यमानो दीर्घसत्र व्याजेन विससर्ज ह

rājñāṃ vṛttiṃ karādāna daṇḍaśulkādidāruṇām |
manyamāno dīrghasatra vyājena visasarja ha

तत्रापि हंसं पुरुषं परमात्मानमात्मदृक् ।
यजन् तल्लोकतामाप कुशलेन समाधिना

tatrāpi haṃsaṃ puruṣaṃ paramātmānamātmadṛk |
yajan tallokatāmāpa kuśalena samādhinā

हविर्धानाद् हविर्धानी विदुरासूत षट् सुतान् ।
बर्हिषदं गयं शुक्लं कृष्णं सत्यं जितव्रतम्

havirdhānād havirdhānī vidurāsūta ṣaṭ sutān |
barhiṣadaṃ gayaṃ śuklaṃ kṛṣṇaṃ satyaṃ jitavratam

बर्हिषत् सुमहाभागो हाविर्धानिः प्रजापतिः ।
क्रियाकाण्डेषु निष्णातो योगेषु च कुरूद्वह

barhiṣat sumahābhāgo hāvirdhāniḥ prajāpatiḥ |
kriyākāṇḍeṣu niṣṇāto yogeṣu ca kurūdvaha

यस्येदं देवयजनं अनु यज्ञं वितन्वतः ।
प्राचीनाग्रैः कुशैरासीद् आस्तृतं वसुधातलम्

yasyedaṃ devayajanaṃ anu yajñaṃ vitanvataḥ |
prācīnāgraiḥ kuśairāsīd āstṛtaṃ vasudhātalam

सामुद्रीं देवदेवोक्तां उपयेमे शतद्रुतिम् ।
यां वीक्ष्य चारुसर्वाङ्गीं किशोरीं सुष्ठ्वलङ्कृताम्
परिक्रमन्तीं उद्वाहे चकमेऽग्निः शुकीमिव

sāmudrīṃ devadevoktāṃ upayeme śatadrutim |
yāṃ vīkṣya cārusarvāṅgīṃ kiśorīṃ suṣṭhvalaṅkṛtām
parikramantīṃ udvāhe cakame'gniḥ śukīmiva

विबुधासुरगन्धर्व मुनिसिद्धनरोरगाः ।
विजिताः सूर्यया दिक्षु क्वणयन्त्यैव नूपुरैः

vibudhāsuragandharva munisiddhanaroragāḥ |
vijitāḥ sūryayā dikṣu kvaṇayantyaiva nūpuraiḥ

प्राचीनबर्हिषः पुत्राः शतद्रुत्यां दशाभवन् ।
तुल्यनामव्रताः सर्वे धर्मस्नाताः प्रचेतसः

prācīnabarhiṣaḥ putrāḥ śatadrutyāṃ daśābhavan |
tulyanāmavratāḥ sarve dharmasnātāḥ pracetasaḥ

पित्राऽऽदिष्टाः प्रजासर्गे तपसेऽर्णवमाविशन् ।
दशवर्षसहस्राणि तपसाऽऽर्चन् तपस्पतिम्

pitrā''diṣṭāḥ prajāsarge tapase'rṇavamāviśan |
daśavarṣasahasrāṇi tapasā''rcan tapaspatim

यदुक्तं पथि दृष्टेन गिरिशेन प्रसीदता ।
तद्ध्यायन्तो जपन्तश्च पूजयन्तश्च संयताः

yaduktaṃ pathi dṛṣṭena giriśena prasīdatā |
taddhyāyanto japantaśca pūjayantaśca saṃyatāḥ

प्रचेतसां गिरित्रेण यथाऽऽसीत्पथि सङ्गमः ।
यदुताह हरः प्रीतः तन्नो ब्रह्मन् वदार्थवत्

pracetasāṃ giritreṇa yathā''sītpathi saṅgamaḥ |
yadutāha haraḥ prītaḥ tanno brahman vadārthavat

सङ्गमः खलु विप्रर्षे शिवेनेह शरीरिणाम् ।
दुर्लभो मुनयो दध्युः असङ्गाद्यमभीप्सितम्

saṅgamaḥ khalu viprarṣe śiveneha śarīriṇām |
durlabho munayo dadhyuḥ asaṅgādyamabhīpsitam

आत्मारामोऽपि यस्त्वस्य लोककल्पस्य राधसे ।
शक्त्या युक्तो विचरति घोरया भगवान् भवः

ātmārāmo'pi yastvasya lokakalpasya rādhase |
śaktyā yukto vicarati ghorayā bhagavān bhavaḥ

प्रचेतसः पितुर्वाक्यं शिरसाऽऽदाय साधवः ।
दिशं प्रतीचीं प्रययुः तपस्यादृतचेतसः

pracetasaḥ piturvākyaṃ śirasā''dāya sādhavaḥ |
diśaṃ pratīcīṃ prayayuḥ tapasyādṛtacetasaḥ

ससमुद्रं उप विस्तीर्णं अपश्यन् सुमहत्सरः ।
महन्मन इव स्वच्छं प्रसन्नसलिलाशयम्

sasamudraṃ upa vistīrṇaṃ apaśyan sumahatsaraḥ |
mahanmana iva svacchaṃ prasannasalilāśayam

नीलरक्तोत्पलाम्भोज कह्लारेन्दीवराकरम् ।
हंससारसचक्राह्व कारण्डवनिकूजितम्

nīlaraktotpalāmbhoja kahlārendīvarākaram |
haṃsasārasacakrāhva kāraṇḍavanikūjitam

मत्तभ्रमरसौस्वर्य हृष्टरोमलताङ्घ्रिपम् ।
पद्मकोशरजो दिक्षु विक्षिपत्पवनोत्सवम्

mattabhramarasausvarya hṛṣṭaromalatāṅghripam |
padmakośarajo dikṣu vikṣipatpavanotsavam

तत्र गान्धर्वमाकर्ण्य दिव्यमार्गमनोहरम् ।
विसिस्म्यू राजपुत्रास्ते मृदङ्गपणवाद्यनु

tatra gāndharvamākarṇya divyamārgamanoharam |
visismyū rājaputrāste mṛdaṅgapaṇavādyanu

तर्ह्येव सरसस्तस्मान् निष्क्रामन्तं सहानुगम् ।
उपगीयमानममर प्रवरं विबुधानुगैः

tarhyeva sarasastasmān niṣkrāmantaṃ sahānugam |
upagīyamānamamara pravaraṃ vibudhānugaiḥ

तप्तहेमनिकायाभं शितिकण्ठं त्रिलोचनम् ।
प्रसादसुमुखं वीक्ष्य प्रणेमुर्जातकौतुकाः

taptahemanikāyābhaṃ śitikaṇṭhaṃ trilocanam |
prasādasumukhaṃ vīkṣya praṇemurjātakautukāḥ

स तान्प्रपन्नार्तिहरो भगवान् धर्मवत्सलः ।
धर्मज्ञान् शीलसम्पन्नान् प्रीतः प्रीतानुवाच ह

sa tānprapannārtiharo bhagavān dharmavatsalaḥ |
dharmajñān śīlasampannān prītaḥ prītānuvāca ha

यूयं वेदिषदः पुत्रा विदितं वश्चिकीर्षितम् ।
अनुग्रहाय भद्रं व एवं मे दर्शनं कृतम्

yūyaṃ vediṣadaḥ putrā viditaṃ vaścikīrṣitam |
anugrahāya bhadraṃ va evaṃ me darśanaṃ kṛtam

यः परं रंहसः साक्षात् त्रिगुणात् जीवसंज्ञितात् ।
भगवन्तं वासुदेवं प्रपन्नः स प्रियो हि मे

yaḥ paraṃ raṃhasaḥ sākṣāt triguṇāt jīvasaṃjñitāt |
bhagavantaṃ vāsudevaṃ prapannaḥ sa priyo hi me

स्वधर्मनिष्ठः शतजन्मभिः पुमान्
विरिञ्चतामेति ततः परं हि माम् ।
अव्याकृतं भागवतोऽथ वैष्णवं
पदं यथाहं विबुधाः कलात्यये

svadharmaniṣṭhaḥ śatajanmabhiḥ pumān
viriñcatāmeti tataḥ paraṃ hi mām |
avyākṛtaṃ bhāgavato'tha vaiṣṇavaṃ
padaṃ yathāhaṃ vibudhāḥ kalātyaye

अथ भागवता यूयं प्रियाः स्थ भगवान् यथा ।
न मद्भागवतानां च प्रेयानन्योऽस्ति कर्हिचित्

atha bhāgavatā yūyaṃ priyāḥ stha bhagavān yathā |
na madbhāgavatānāṃ ca preyānanyo'sti karhicit

इदं विविक्तं जप्तव्यं पवित्रं मङ्गलं परम् ।
निःश्रेयसकरं चापि श्रूयतां तद्वदामि वः

idaṃ viviktaṃ japtavyaṃ pavitraṃ maṅgalaṃ param |
niḥśreyasakaraṃ cāpi śrūyatāṃ tadvadāmi vaḥ

इत्यनुक्रोशहृदयो भगवानाह ताञ्छिवः ।
बद्धाञ्जलीन्राजपुत्रान् नारायणपरो वचः

ityanukrośahṛdayo bhagavānāha tāñchivaḥ |
baddhāñjalīnrājaputrān nārāyaṇaparo vacaḥ

जितं ते आत्मविद्धुर्य स्वस्तये स्वस्तिरस्तु मे ।
भवताराधसा राद्धं सर्वस्मा आत्मने नमः

jitaṃ te ātmaviddhurya svastaye svastirastu me |
bhavatārādhasā rāddhaṃ sarvasmā ātmane namaḥ

नमः पङ्कजनाभाय भूतसूक्ष्मेन्द्रियात्मने ।
वासुदेवाय शान्ताय कूटस्थाय स्वरोचिषे

namaḥ paṅkajanābhāya bhūtasūkṣmendriyātmane |
vāsudevāya śāntāya kūṭasthāya svarociṣe

सङ्कर्षणाय सूक्ष्माय दुरन्तायान्तकाय च ।
नमो विश्वप्रबोधाय प्रद्युम्नायान्तरात्मने

saṅkarṣaṇāya sūkṣmāya durantāyāntakāya ca |
namo viśvaprabodhāya pradyumnāyāntarātmane

नमो नमोऽनिरुद्धाय हृषीकेशेन्द्रियात्मने ।
नमः परमहंसाय पूर्णाय निभृतात्मने

namo namo'niruddhāya hṛṣīkeśendriyātmane |
namaḥ paramahaṃsāya pūrṇāya nibhṛtātmane

स्वर्गापवर्गद्वाराय नित्यं शुचिषदे नमः ।
नमो हिरण्यवीर्याय चातुर्होत्राय तन्तवे

svargāpavargadvārāya nityaṃ śuciṣade namaḥ |
namo hiraṇyavīryāya cāturhotrāya tantave

नम ऊर्ज इषे त्रय्याः पतये यज्ञरेतसे ।
तृप्तिदाय च जीवानां नमः सर्वरसात्मने

nama ūrja iṣe trayyāḥ pataye yajñaretase |
tṛptidāya ca jīvānāṃ namaḥ sarvarasātmane

सर्वसत्त्वात्मदेहाय विशेषाय स्थवीयसे ।
नमस्त्रैलोक्यपालाय सह ओजोबलाय च

sarvasattvātmadehāya viśeṣāya sthavīyase |
namastrailokyapālāya saha ojobalāya ca

अर्थलिङ्गाय नभसे नमोऽन्तर्बहिरात्मने ।
नमः पुण्याय लोकाय अमुष्मै भूरिवर्चसे

arthaliṅgāya nabhase namo'ntarbahirātmane |
namaḥ puṇyāya lokāya amuṣmai bhūrivarcase

प्रवृत्ताय निवृत्ताय पितृदेवाय कर्मणे ।
नमोऽधर्मविपाकाय मृत्यवे दुःखदाय च

pravṛttāya nivṛttāya pitṛdevāya karmaṇe |
namo'dharmavipākāya mṛtyave duḥkhadāya ca

नमस्ते आशिषामीश मनवे कारणात्मने ।
नमो धर्माय बृहते कृष्णायाकुण्ठमेधसे ।
पुरुषाय पुराणाय साङ्ख्ययोगेश्वराय च

namaste āśiṣāmīśa manave kāraṇātmane |
namo dharmāya bṛhate kṛṣṇāyākuṇṭhamedhase |
puruṣāya purāṇāya sāṅkhyayogeśvarāya ca

शक्तित्रयसमेताय मीढुषेऽहङ्कृतात्मने ।
चेतआकूतिरूपाय नमो वाचो विभूतये

śaktitrayasametāya mīḍhuṣe'haṅkṛtātmane |
cetaākūtirūpāya namo vāco vibhūtaye

दर्शनं नो दिदृक्षूणां देहि भागवतार्चितम् ।
रूपं प्रियतमं स्वानां सर्वेन्द्रियगुणाञ्जनम्

darśanaṃ no didṛkṣūṇāṃ dehi bhāgavatārcitam |
rūpaṃ priyatamaṃ svānāṃ sarvendriyaguṇāñjanam

स्निग्धप्रावृड्घनश्यामं सर्वसौन्दर्यसङ्ग्रहम् ।
चार्वायतचतुर्बाहुं सुजातरुचिराननम्

snigdhaprāvṛḍghanaśyāmaṃ sarvasaundaryasaṅgraham |
cārvāyatacaturbāhuṃ sujātarucirānanam

पद्मकोशपलाशाक्षं सुन्दरभ्रु सुनासिकम् ।
सुद्विजं सुकपोलास्यं समकर्णविभूषणम्

padmakośapalāśākṣaṃ sundarabhru sunāsikam |
sudvijaṃ sukapolāsyaṃ samakarṇavibhūṣaṇam

प्रीतिप्रहसितापाङ्गं अलकै रूपशोभितम् ।
लसत्पङ्कजकिञ्जल्क दुकूलं मृष्टकुण्डलम्

prītiprahasitāpāṅgaṃ alakai rūpaśobhitam |
lasatpaṅkajakiñjalka dukūlaṃ mṛṣṭakuṇḍalam

स्फुरत्किरीटवलय हारनूपुरमेखलम् ।
शङ्खचक्रगदापद्म मालामण्युत्तमर्द्धिमत्

sphuratkirīṭavalaya hāranūpuramekhalam |
śaṅkhacakragadāpadma mālāmaṇyuttamarddhimat

सिंहस्कन्धत्विषो बिभ्रत् सौभग ग्रीवकौस्तुभम् ।
श्रियानपायिन्या क्षिप्त निकषाश्मोरसोल्लसत्

siṃhaskandhatviṣo bibhrat saubhaga grīvakaustubham |
śriyānapāyinyā kṣipta nikaṣāśmorasollasat

पूररेचकसंविग्न वलिवल्गुदलोदरम् ।
प्रतिसङ्क्रामयद् विश्वं नाभ्यावर्तगभीरया

pūrarecakasaṃvigna valivalgudalodaram |
pratisaṅkrāmayad viśvaṃ nābhyāvartagabhīrayā

श्यामश्रोण्यधिरोचिष्णु दुकूलस्वर्णमेखलम् ।
समचार्वङ्घ्रिजङ्घोरु निम्नजानुसुदर्शनम्

śyāmaśroṇyadhirociṣṇu dukūlasvarṇamekhalam |
samacārvaṅghrijaṅghoru nimnajānusudarśanam

पदा शरत्पद्मपलाशरोचिषा
नखद्युभिर्नोऽन्तरघं विधुन्वता ।
प्रदर्शय स्वीयमपास्तसाध्वसं
पदं गुरो मार्गगुरुस्तमोजुषाम्

padā śaratpadmapalāśarociṣā
nakhadyubhirno'ntaraghaṃ vidhunvatā |
pradarśaya svīyamapāstasādhvasaṃ
padaṃ guro mārgagurustamojuṣām

एतद् रूपमनुध्येयं आत्मशुद्धिमभीप्सताम् ।
यद्भक्तियोगोऽभयदः स्वधर्ममनुतिष्ठताम्

etad rūpamanudhyeyaṃ ātmaśuddhimabhīpsatām |
yadbhaktiyogo'bhayadaḥ svadharmamanutiṣṭhatām

भवान् भक्तिमता लभ्यो दुर्लभः सर्वदेहिनाम् ।
स्वाराज्यस्याप्यभिमत एकान्तेनात्मविद्गतिः

bhavān bhaktimatā labhyo durlabhaḥ sarvadehinām |
svārājyasyāpyabhimata ekāntenātmavidgatiḥ

तं दुराराध्यमाराध्य सतामपि दुरापया ।
एकान्तभक्त्या को वाञ्छेत् पादमूलं विना बहिः

taṃ durārādhyamārādhya satāmapi durāpayā |
ekāntabhaktyā ko vāñchet pādamūlaṃ vinā bahiḥ

यत्र निर्विष्टमरणं कृतान्तो नाभिमन्यते ।
विश्वं विध्वंसयन् वीर्य शौर्यविस्फूर्जितभ्रुवा

yatra nirviṣṭamaraṇaṃ kṛtānto nābhimanyate |
viśvaṃ vidhvaṃsayan vīrya śauryavisphūrjitabhruvā

क्षणार्धेनापि तुलये न स्वर्गं नापुनर्भवम् ।
भगवत् सङ्गिसङ्गस्य मर्त्यानां किमुताशिषः

kṣaṇārdhenāpi tulaye na svargaṃ nāpunarbhavam |
bhagavat saṅgisaṅgasya martyānāṃ kimutāśiṣaḥ

अथानघाङ्घ्रेस्तव कीर्तितीर्थयोः
अन्तर्बहिःस्नानविधूतपाप्मनाम् ।
भूतेष्वनुक्रोशसुसत्त्वशीलिनां
स्यात्सङ्गमोऽनुग्रह एष नस्तव

athānaghāṅghrestava kīrtitīrthayoḥ
antarbahiḥsnānavidhūtapāpmanām |
bhūteṣvanukrośasusattvaśīlināṃ
syātsaṅgamo'nugraha eṣa nastava

न यस्य चित्तं बहिरर्थविभ्रमं
तमोगुहायां च विशुद्धमाविशत् ।
यद्भक्तियोगानुगृहीतमञ्जसा
मुनिर्विचष्टे ननु तत्र ते गतिम्

na yasya cittaṃ bahirarthavibhramaṃ
tamoguhāyāṃ ca viśuddhamāviśat |
yadbhaktiyogānugṛhītamañjasā
munirvicaṣṭe nanu tatra te gatim

यत्रेदं व्यज्यते विश्वं विश्वस्मिन् अवभाति यत् ।
तत्त्वं ब्रह्म परं ज्योतिः आकाशमिव विस्तृतम्

yatredaṃ vyajyate viśvaṃ viśvasmin avabhāti yat |
tattvaṃ brahma paraṃ jyotiḥ ākāśamiva vistṛtam

यो माययेदं पुरुरूपयासृजद्
बिभर्ति भूयः क्षपयत्यविक्रियः ।
यद्भेदबुद्धिः सदिवात्मदुःस्थया
त्वमात्मतन्त्रं भगवन्प्रतीमहि

yo māyayedaṃ pururūpayāsṛjad
bibharti bhūyaḥ kṣapayatyavikriyaḥ |
yadbhedabuddhiḥ sadivātmaduḥsthayā
tvamātmatantraṃ bhagavanpratīmahi

क्रियाकलापैरिदमेव योगिनः
श्रद्धान्विताः साधु यजन्ति सिद्धये ।
भूतेन्द्रियान्तःकरणोपलक्षितं
वेदे च तन्त्रे च ते एव कोविदाः

kriyākalāpairidameva yoginaḥ
śraddhānvitāḥ sādhu yajanti siddhaye |
bhūtendriyāntaḥkaraṇopalakṣitaṃ
vede ca tantre ca te eva kovidāḥ

त्वमेक आद्यः पुरुषः सुप्तशक्तिः
तया रजःसत्त्वतमो विभिद्यते ।
महानहं खं मरुदग्निवार्धराः
सुरर्षयो भूतगणा इदं यतः

tvameka ādyaḥ puruṣaḥ suptaśaktiḥ
tayā rajaḥsattvatamo vibhidyate |
mahānahaṃ khaṃ marudagnivārdharāḥ
surarṣayo bhūtagaṇā idaṃ yataḥ

सृष्टं स्वशक्त्येदमनुप्रविष्टः
चतुर्विधं पुरमात्मांशकेन ।
अथो विदुस्तं पुरुषं सन्तमन्तः
भुङ्क्ते हृषीकैर्मधु सारघं यः

sṛṣṭaṃ svaśaktyedamanupraviṣṭaḥ
caturvidhaṃ puramātmāṃśakena |
atho vidustaṃ puruṣaṃ santamantaḥ
bhuṅkte hṛṣīkairmadhu sāraghaṃ yaḥ

स एष लोकानतिचण्डवेगो
विकर्षसि त्वं खलु कालयानः ।
भूतानि भूतैरनुमेयतत्त्वो
घनावलीर्वायुरिवाविषह्यः

sa eṣa lokānaticaṇḍavego
vikarṣasi tvaṃ khalu kālayānaḥ |
bhūtāni bhūtairanumeyatattvo
ghanāvalīrvāyurivāviṣahyaḥ

प्रमत्तमुच्चैरिति कृत्यचिन्तया
प्रवृद्धलोभं विषयेषु लालसम् ।
त्वमप्रमत्तः सहसाभिपद्यसे
क्षुल्लेलिहानोऽहिरिवाखुमन्तकः

pramattamuccairiti kṛtyacintayā
pravṛddhalobhaṃ viṣayeṣu lālasam |
tvamapramattaḥ sahasābhipadyase
kṣullelihāno'hirivākhumantakaḥ

कस्त्वत्पदाब्जं विजहाति पण्डितो
यस्तेऽवमानव्ययमानकेतनः ।
विशङ्कयास्मद्गुरुरर्चति स्म यद्
विनोपपत्तिं मनवश्चतुर्दश

kastvatpadābjaṃ vijahāti paṇḍito
yaste'vamānavyayamānaketanaḥ |
viśaṅkayāsmadgururarcati sma yad
vinopapattiṃ manavaścaturdaśa

अथ त्वमसि नो ब्रह्मन् परमात्मन् विपश्चिताम् ।
विश्वं रुद्रभयध्वस्तं अकुतश्चिद्भया गतिः

atha tvamasi no brahman paramātman vipaścitām |
viśvaṃ rudrabhayadhvastaṃ akutaścidbhayā gatiḥ

इदं जपत भद्रं वो विशुद्धा नृपनन्दनाः ।
स्वधर्ममनुतिष्ठन्तो भगवति अर्पिताशयाः

idaṃ japata bhadraṃ vo viśuddhā nṛpanandanāḥ |
svadharmamanutiṣṭhanto bhagavati arpitāśayāḥ

तमेवात्मानमात्मस्थं सर्वभूतेष्ववस्थितम् ।
पूजयध्वं गृणन्तश्च ध्यायन्तश्चासकृद्धरिम्

tamevātmānamātmasthaṃ sarvabhūteṣvavasthitam |
pūjayadhvaṃ gṛṇantaśca dhyāyantaścāsakṛddharim

योगादेशमुपासाद्य धारयन्तो मुनिव्रताः ।
समाहितधियः सर्व एतदभ्यसतादृताः

yogādeśamupāsādya dhārayanto munivratāḥ |
samāhitadhiyaḥ sarva etadabhyasatādṛtāḥ

इदमाह पुरास्माकं भगवान्विश्वसृक्पतिः ।
भृग्वादीनां आत्मजानां सिसृक्षुः संसिसृक्षताम्

idamāha purāsmākaṃ bhagavānviśvasṛkpatiḥ |
bhṛgvādīnāṃ ātmajānāṃ sisṛkṣuḥ saṃsisṛkṣatām

ते वयं नोदिताः सर्वे प्रजासर्गे प्रजेश्वराः ।
अनेन ध्वस्ततमसः सिसृक्ष्मो विविधाः प्रजाः

te vayaṃ noditāḥ sarve prajāsarge prajeśvarāḥ |
anena dhvastatamasaḥ sisṛkṣmo vividhāḥ prajāḥ

अथेदं नित्यदा युक्तो जपन् अवहितः पुमान् ।
अचिरात् श्रेय आप्नोति वासुदेवपरायणः

athedaṃ nityadā yukto japan avahitaḥ pumān |
acirāt śreya āpnoti vāsudevaparāyaṇaḥ

श्रेयसामिह सर्वेषां ज्ञानं निःश्रेयसं परम् ।
सुखं तरति दुष्पारं ज्ञाननौर्व्यसनार्णवम्

śreyasāmiha sarveṣāṃ jñānaṃ niḥśreyasaṃ param |
sukhaṃ tarati duṣpāraṃ jñānanaurvyasanārṇavam

य इमं श्रद्धया युक्तो मद्गीतं भगवत्स्तवम् ।
अधीयानो दुराराध्यं हरिं आराधयत्यसौ

ya imaṃ śraddhayā yukto madgītaṃ bhagavatstavam |
adhīyāno durārādhyaṃ hariṃ ārādhayatyasau

विन्दते पुरुषोऽमुष्माद् यद्यद् इच्छत्यसत्वरम् ।
मद्गीतगीतात्सुप्रीतात् श्रेयसामेकवल्लभात्

vindate puruṣo'muṣmād yadyad icchatyasatvaram |
madgītagītātsuprītāt śreyasāmekavallabhāt

इदं यः कल्य उत्थाय प्राञ्जलिः श्रद्धयान्वितः ।
शृणुयात् श्रावयेन्मर्त्यो मुच्यते कर्मबन्धनैः

idaṃ yaḥ kalya utthāya prāñjaliḥ śraddhayānvitaḥ |
śṛṇuyāt śrāvayenmartyo mucyate karmabandhanaiḥ

गीतं मयेदं नरदेवनन्दनाः
परस्य पुंसः परमात्मनः स्तवम् ।
जपन्त एकाग्रधियस्तपो महत्
चरध्वमन्ते तत आप्स्यथेप्सितम्

gītaṃ mayedaṃ naradevanandanāḥ
parasya puṃsaḥ paramātmanaḥ stavam |
japanta ekāgradhiyastapo mahat
caradhvamante tata āpsyathepsitam