सूक्त 79: सोम नग्न को ढकते, रोगी को चंगा करते

अ॒यं कृ॒त्नुरगृ॑भीतो विश्व॒जिदु॒द्भिदित्सोम॑ः ।
ऋषि॒र्विप्र॒ः काव्ये॑न

ayaṃ kṛtnuragṛbhīto viśvajidudbhiditsomaḥ |
ṛṣirvipraḥ kāvyena

अ॒भ्यू॑र्णोति॒ यन्न॒ग्नं भि॒षक्ति॒ विश्वं॒ यत्तु॒रम् ।
प्रेम॒न्धः ख्य॒न्निः श्रो॒णो भू॑त्

abhyūrṇoti yannagnaṃ bhiṣakti viśvaṃ yatturam |
premandhaḥ khyanniḥ śroṇo bhūt

त्वं सो॑म तनू॒कृद्भ्यो॒ द्वेषो॑भ्यो॒ऽन्यकृ॑तेभ्यः ।
उ॒रु य॒न्तासि॒ वरू॑थम्

tvaṃ soma tanūkṛdbhyo dveṣobhyo'nyakṛtebhyaḥ |
uru yantāsi varūtham

त्वं चि॒त्ती तव॒ दक्षै॑र्दि॒व आ पृ॑थि॒व्या ऋ॑जीषिन् ।
यावी॑र॒घस्य॑ चि॒द्द्वेष॑ः

tvaṃ cittī tava dakṣairdiva ā pṛthivyā ṛjīṣin |
yāvīraghasya ciddveṣaḥ

अ॒र्थिनो॒ यन्ति॒ चेदर्थं॒ गच्छा॒निद्द॒दुषो॑ रा॒तिम् ।
व॒वृ॒ज्युस्तृष्य॑त॒ः काम॑म्

arthino yanti cedarthaṃ gacchāniddaduṣo rātim |
vavṛjyustṛṣyataḥ kāmam

वि॒दद्यत्पू॒र्व्यं न॒ष्टमुदी॑मृता॒युमी॑रयत् ।
प्रेमायु॑स्तारी॒दती॑र्णम्

vidadyatpūrvyaṃ naṣṭamudīmṛtāyumīrayat |
premāyustārīdatīrṇam

सु॒शेवो॑ नो मृळ॒याकु॒रदृ॑प्तक्रतुरवा॒तः ।
भवा॑ नः सोम॒ शं हृ॒दे

suśevo no mṛḻayākuradṛptakraturavātaḥ |
bhavā naḥ soma śaṃ hṛde

मा न॑ः सोम॒ सं वी॑विजो॒ मा वि बी॑भिषथा राजन् ।
मा नो॒ हार्दि॑ त्वि॒षा व॑धीः

mā naḥ soma saṃ vīvijo mā vi bībhiṣathā rājan |
mā no hārdi tviṣā vadhīḥ

अव॒ यत्स्वे स॒धस्थे॑ दे॒वानां॑ दुर्म॒तीरीक्षे॑ ।
राज॒न्नप॒ द्विष॑ः सेध॒ मीढ्वो॒ अप॒ स्रिध॑ः सेध

ava yatsve sadhasthe devānāṃ durmatīrīkṣe |
rājannapa dviṣaḥ sedha mīḍhvo apa sridhaḥ sedha