सूक्त 32: पराक्रमी इन्द्र के लिए नए वचन

अपू॑र्व्या पुरु॒तमा॑न्यस्मै म॒हे वी॒राय॑ त॒वसे॑ तु॒राय॑ ।
वि॒र॒प्शिने॑ व॒ज्रिणे॒ शंत॑मानि॒ वचां॑स्या॒सा स्थवि॑राय तक्षम्

apūrvyā purutamānyasmai mahe vīrāya tavase turāya |
virapśine vajriṇe śaṃtamāni vacāṃsyāsā sthavirāya takṣam

स मा॒तरा॒ सूर्ये॑णा कवी॒नामवा॑सयद्रु॒जदद्रिं॑ गृणा॒नः ।
स्वा॒धीभि॒रृक्व॑भिर्वावशा॒न उदु॒स्रिया॑णामसृजन्नि॒दान॑म्

sa mātarā sūryeṇā kavīnāmavāsayadrujadadriṃ gṛṇānaḥ |
svādhībhirṛkvabhirvāvaśāna udusriyāṇāmasṛjannidānam

स वह्नि॑भि॒रृक्व॑भि॒र्गोषु॒ शश्व॑न्मि॒तज्ञु॑भिः पुरु॒कृत्वा॑ जिगाय ।
पुर॑ः पुरो॒हा सखि॑भिः सखी॒यन्दृ॒ळ्हा रु॑रोज क॒विभि॑ः क॒विः सन्

sa vahnibhirṛkvabhirgoṣu śaśvanmitajñubhiḥ purukṛtvā jigāya |
puraḥ purohā sakhibhiḥ sakhīyandṛḻhā ruroja kavibhiḥ kaviḥ san

स नी॒व्या॑भिर्जरि॒तार॒मच्छा॑ म॒हो वाजे॑भिर्म॒हद्भि॑श्च॒ शुष्मै॑ः ।
पु॒रु॒वीरा॑भिर्वृषभ क्षिती॒नामा गि॑र्वणः सुवि॒ताय॒ प्र या॑हि

sa nīvyābhirjaritāramacchā maho vājebhirmahadbhiśca śuṣmaiḥ |
puruvīrābhirvṛṣabha kṣitīnāmā girvaṇaḥ suvitāya pra yāhi

स सर्गे॑ण॒ शव॑सा त॒क्तो अत्यै॑र॒प इन्द्रो॑ दक्षिण॒तस्तु॑रा॒षाट् ।
इ॒त्था सृ॑जा॒ना अन॑पावृ॒दर्थं॑ दि॒वेदि॑वे विविषुरप्रमृ॒ष्यम्

sa sargeṇa śavasā takto atyairapa indro dakṣiṇatasturāṣāṭ |
itthā sṛjānā anapāvṛdarthaṃ divedive viviṣurapramṛṣyam