सूक्त 27: वृषभ अग्नि का प्रज्वलन

प्र वो॒ वाजा॑ अ॒भिद्य॑वो ह॒विष्म॑न्तो घृ॒ताच्या॑ ।
दे॒वाञ्जि॑गाति सुम्न॒युः

pra vo vājā abhidyavo haviṣmanto ghṛtācyā |
devāñjigāti sumnayuḥ

ईळे॑ अ॒ग्निं वि॑प॒श्चितं॑ गि॒रा य॒ज्ञस्य॒ साध॑नम् ।
श्रु॒ष्टी॒वानं॑ धि॒तावा॑नम्

īḻe agniṃ vipaścitaṃ girā yajñasya sādhanam |
śruṣṭīvānaṃ dhitāvānam

अग्ने॑ श॒केम॑ ते व॒यं यमं॑ दे॒वस्य॑ वा॒जिन॑ः ।
अति॒ द्वेषां॑सि तरेम

agne śakema te vayaṃ yamaṃ devasya vājinaḥ |
ati dveṣāṃsi tarema

स॒मि॒ध्यमा॑नो अध्व॒रे॒३॒॑ऽग्निः पा॑व॒क ईड्य॑ः ।
शो॒चिष्के॑श॒स्तमी॑महे

samidhyamāno adhvare'gniḥ pāvaka īḍyaḥ |
śociṣkeśastamīmahe

पृ॒थु॒पाजा॒ अम॑र्त्यो घृ॒तनि॑र्णि॒क्स्वा॑हुतः ।
अ॒ग्निर्य॒ज्ञस्य॑ हव्य॒वाट्

pṛthupājā amartyo ghṛtanirṇiksvāhutaḥ |
agniryajñasya havyavāṭ

तं स॒बाधो॑ य॒तस्रु॑च इ॒त्था धि॒या य॒ज्ञव॑न्तः ।
आ च॑क्रुर॒ग्निमू॒तये॑

taṃ sabādho yatasruca itthā dhiyā yajñavantaḥ |
ā cakruragnimūtaye

होता॑ दे॒वो अम॑र्त्यः पु॒रस्ता॑देति मा॒यया॑ ।
वि॒दथा॑नि प्रचो॒दय॑न्

hotā devo amartyaḥ purastādeti māyayā |
vidathāni pracodayan

वा॒जी वाजे॑षु धीयतेऽध्व॒रेषु॒ प्र णी॑यते ।
विप्रो॑ य॒ज्ञस्य॒ साध॑नः

vājī vājeṣu dhīyate'dhvareṣu pra ṇīyate |
vipro yajñasya sādhanaḥ

धि॒या च॑क्रे॒ वरे॑ण्यो भू॒तानां॒ गर्भ॒मा द॑धे ।
दक्ष॑स्य पि॒तरं॒ तना॑

dhiyā cakre vareṇyo bhūtānāṃ garbhamā dadhe |
dakṣasya pitaraṃ tanā

नि त्वा॑ दधे॒ वरे॑ण्यं॒ दक्ष॑स्ये॒ळा स॑हस्कृत ।
अग्ने॑ सुदी॒तिमु॒शिज॑म्

ni tvā dadhe vareṇyaṃ dakṣasyeḻā sahaskṛta |
agne sudītimuśijam

अ॒ग्निं य॒न्तुर॑म॒प्तुर॑मृ॒तस्य॒ योगे॑ व॒नुष॑ः ।
विप्रा॒ वाजै॒ः समि॑न्धते

agniṃ yanturamapturamṛtasya yoge vanuṣaḥ |
viprā vājaiḥ samindhate

ऊ॒र्जो नपा॑तमध्व॒रे दी॑दि॒वांस॒मुप॒ द्यवि॑ ।
अ॒ग्निमी॑ळे क॒विक्र॑तुम्

ūrjo napātamadhvare dīdivāṃsamupa dyavi |
agnimīḻe kavikratum

ई॒ळेन्यो॑ नम॒स्य॑स्ति॒रस्तमां॑सि दर्श॒तः ।
सम॒ग्निरि॑ध्यते॒ वृषा॑

īḻenyo namasyastirastamāṃsi darśataḥ |
samagniridhyate vṛṣā

वृषो॑ अ॒ग्निः समि॑ध्य॒तेऽश्वो॒ न दे॑व॒वाह॑नः ।
तं ह॒विष्म॑न्त ईळते

vṛṣo agniḥ samidhyate'śvo na devavāhanaḥ |
taṃ haviṣmanta īḻate

वृष॑णं त्वा व॒यं वृ॑ष॒न्वृष॑ण॒ः समि॑धीमहि ।
अग्ने॒ दीद्य॑तं बृ॒हत्

vṛṣaṇaṃ tvā vayaṃ vṛṣanvṛṣaṇaḥ samidhīmahi |
agne dīdyataṃ bṛhat