अध्याय 258: राम गुरु पर छोड़ते, वसिष्ठ भरत के पक्ष में

आरत कहहिँ बिचारि न काऊ । सूझ जुआरिहि आपन दाऊ ॥
सुनि मुनि बचन कहत रघुराऊ । नाथ तुम्हारेहि हाथ उपाऊ ॥

ārata kahahim̐ bicāri na kāū | sūjha juārihi āpana dāū ||
suni muni bacana kahata raghurāū | nātha tumhārehi hātha upāū ||

सब कर हित रुख राउरि राखें । आयसु किये मुदित फुर भाखे ॥
प्रथम जो आयसु मो कहुँ होई । माथें मानि करउँ सिख सोई ॥

saba kara hita rukha rāuri rākheṃ | āyasu kiye mudita phura bhākhe ||
prathama jo āyasu mo kahum̐ hoī | mātheṃ māni karaum̐ sikha soī ||

पुनि जेहि कहँ जस कहब गोसाँई । सो सब भाँति घटिहि सेवकाईं ॥
कह मुनि राम सत्य तुम्ह भाखा । भरत सनेहँ बिचार न राखा ॥

puni jehi kaham̐ jasa kahaba gosām̐ī | so saba bhām̐ti ghaṭihi sevakāīṃ ||
kaha muni rāma satya tumha bhākhā | bharata saneham̐ bicāra na rākhā ||

तेहि तें कहउँ बहोरि बहोरी । भरत-भगति-बस भइ मति भोरी ॥
मोरें जान भरत रुचि राखी । जो कीजिय सो सुभ सिव साखी ॥

tehi teṃ kahaum̐ bahori bahorī | bharata-bhagati-basa bhai mati bhorī ||
moreṃ jāna bharata ruci rākhī | jo kījiya so subha siva sākhī ||