अध्याय 252: सीता की सासु सेवा, कैकेयी का पश्चात्ताप

पुर जन नारि मगन अति प्रीती । बासर जाहिँ पलक सम बीती ॥
सीय सासु प्रति बेष बनाई । सादर करइ सरित सेवकाई ॥

pura jana nāri magana ati prītī | bāsara jāhim̐ palaka sama bītī ||
sīya sāsu prati beṣa banāī | sādara karai sarita sevakāī ||

लखा न मरमु राम बिनु काहूँ । माया सब सिय-माया माहूँ ॥
सीयँ सासु सेवा बस कीन्हीँ । तिन्ह लहि सुख सिख आसिष दीन्हीँ ॥

lakhā na maramu rāma binu kāhūm̐ | māyā saba siya-māyā māhūm̐ ||
sīyam̐ sāsu sevā basa kīnhīm̐ | tinha lahi sukha sikha āsiṣa dīnhīm̐ ||

लखि सिय सहित सरल दोउ भाई । कुटिल रानि पछितानि अघाई ॥
अवनि जमहि जाचति कैकेई । महि न बीच बिधि मीच न देई ॥

lakhi siya sahita sarala dou bhāī | kuṭila rāni pachitāni aghāī ||
avani jamahi jācati kaikeī | mahi na bīca bidhi mīca na deī ||

लोकहु बेद बिदित कबि कहहीं । राम-बिमुख थल नरक न लहहीं ॥
यह संसउ सब के मन माहीं । राम गवन विधि अवध कि नाहीं ॥

lokahu beda bidita kabi kahahīṃ | rāma-bimukha thala naraka na lahahīṃ ||
yaha saṃsau saba ke mana māhīṃ | rāma gavana vidhi avadha ki nāhīṃ ||