अध्याय 18: खर-दूषन की सेना राम पर चढ़ आई

नाक कान बिनु भइ बिकरारा । जनु स्त्रव सैल गैरु कै धारा ॥
खर दूषन पहिँ गइ बिलपाता । धिग धिग तव पौरुष बल भ्राता ॥

nāka kāna binu bhai bikarārā | janu strava saila gairu kai dhārā ||
khara dūṣana pahim̐ gai bilapātā | dhiga dhiga tava pauruṣa bala bhrātā ||

तेहि पूछा सब कहेसि बुझाई । जातुधान सुनि सेन बनाई ॥
धाये निसिचर-निकर बरूथा । जनु सपच्छ कज्जल-गिरि जूथा ॥

tehi pūchā saba kahesi bujhāī | jātudhāna suni sena banāī ||
dhāye nisicara-nikara barūthā | janu sapaccha kajjala-giri jūthā ||

नाना बाहन नानाकारा । नानायुध-धर घोर अपारा ॥
सूपनखा आगें करि लीनी । असुभ-रूप श्रुति नासा हीनी ॥

nānā bāhana nānākārā | nānāyudha-dhara ghora apārā ||
sūpanakhā āgeṃ kari līnī | asubha-rūpa śruti nāsā hīnī ||

असगुन अमित होहिँ भयकारी । गनहिँ न मृत्यु बिबस सब झारी ॥
गर्जहि तर्जहिँ गगन उड़ाहीं । देखि बिकट पर अति हरषाहीं ॥

asaguna amita hohim̐ bhayakārī | ganahim̐ na mṛtyu bibasa saba jhārī ||
garjahi tarjahim̐ gagana ur̤āhīṃ | dekhi bikaṭa para ati haraṣāhīṃ ||

कोउ कह जियत धरहु दोउ भाई । धरि मारहु तिय लेहु छड़ाई ॥
धूरि पूरि लम-मंडल रहा । राम बोलाइ अनुज सन कहा ॥

kou kaha jiyata dharahu dou bhāī | dhari mārahu tiya lehu char̤āī ||
dhūri pūri lama-maṃḍala rahā | rāma bolāi anuja sana kahā ||

लेइ जानकिहि जाहु गिरि-कन्दर । आवा निसिचर कटक भयङ्कर ॥
रहेहु सजग सुनि प्रभु कै बानी । चले सहित श्री सर धनु पानी ॥

lei jānakihi jāhu giri-kandara | āvā nisicara kaṭaka bhayaṅkara ||
rahehu sajaga suni prabhu kai bānī | cale sahita śrī sara dhanu pānī ||

देखि राम रिपु-दल चढ़ि आवा । बिहँसि कठिन कोदंड चढ़ावा ॥

dekhi rāma ripu-dala car̤hi āvā | biham̐si kaṭhina kodaṃḍa car̤hāvā ||