अध्याय 48: अर्जुन का संदेश: तब दुर्योधन पछताएगा

पृच्छामि त्वां सञ्जय राजमध्ये
किमब्रवीद्वाक्यमदीनसत्वः ।
धनञ्जयस्तात युधां प्रेणता
दुरात्मनां जीवितच्छिन्महात्मा

pṛcchāmi tvāṃ sañjaya rājamadhye
kimabravīdvākyamadīnasatvaḥ |
dhanañjayastāta yudhāṃ preṇatā
durātmanāṃ jīvitacchinmahātmā

दुर्योधनो वाचमिमां श्रृणोतु
यदब्रवीदर्जुनो योत्स्यमानः ।
युधिष्ठिरस्यानुमते महात्मा
धनञ्जयः श्रृण्वतः केशवस्य

duryodhano vācamimāṃ śrṛṇotu
yadabravīdarjuno yotsyamānaḥ |
yudhiṣṭhirasyānumate mahātmā
dhanañjayaḥ śrṛṇvataḥ keśavasya

अवित्रस्तो बाहुवीर्यं विजान-
न्नुपह्वरे वासुदेवस्य धीरः ।
अवोचन्मां योत्स्यमानः किरीटी
मध्ये ब्रूया धार्तराष्ट्रं कुरूणाम्

avitrasto bāhuvīryaṃ vijāna-
nnupahvare vāsudevasya dhīraḥ |
avocanmāṃ yotsyamānaḥ kirīṭī
madhye brūyā dhārtarāṣṭraṃ kurūṇām

संश्रृण्वतस्तस्य दुर्भाषिणो वै
दुरात्मनः सूतपुत्रस्य सूत ।
यो योद्धुमाशंसति मां सदैव
मन्दप्रज्ञः कालपक्वोऽतिमूढः

saṃśrṛṇvatastasya durbhāṣiṇo vai
durātmanaḥ sūtaputrasya sūta |
yo yoddhumāśaṃsati māṃ sadaiva
mandaprajñaḥ kālapakvo'timūḍhaḥ

ये वै राजानः पाण्डवायोधनाय
समानीताः श्रृण्वतां चापि तेषाम् ।
यथा समग्रं वचनं मयोक्तं
सहामात्यं श्रावयेथा नृपं तत

ye vai rājānaḥ pāṇḍavāyodhanāya
samānītāḥ śrṛṇvatāṃ cāpi teṣām |
yathā samagraṃ vacanaṃ mayoktaṃ
sahāmātyaṃ śrāvayethā nṛpaṃ tata

यथा नूनं देवराजस्य देवाः
शुश्रूषन्ते वज्रहस्तस्य सर्वे ।
तथाऽश्रृण्वन्पाण्डवाः सृञ्जयाश्च
किरीटिना वाचमुक्तां समर्थाम्

yathā nūnaṃ devarājasya devāḥ
śuśrūṣante vajrahastasya sarve |
tathā'śrṛṇvanpāṇḍavāḥ sṛñjayāśca
kirīṭinā vācamuktāṃ samarthām

इत्यब्रवीदर्जुनो योत्स्यमानो
गाण्डीवधन्वा लोहितपद्मनेत्रः ।
न चेद्राज्यं मुञ्चति धार्तराष्ट्रो
यधिष्ठिरस्याजमीढस्य राज्ञः

ityabravīdarjuno yotsyamāno
gāṇḍīvadhanvā lohitapadmanetraḥ |
na cedrājyaṃ muñcati dhārtarāṣṭro
yadhiṣṭhirasyājamīḍhasya rājñaḥ

अस्ति नूनं कर्म कृतं पुरस्ता-
दनिर्विष्टं पापकं धार्तराष्ट्रैः ।
येषां युद्धं भीमसेनार्जुनाभ्यां
तथाश्विभ्यां वासुदेवेन चैव

asti nūnaṃ karma kṛtaṃ purastā-
danirviṣṭaṃ pāpakaṃ dhārtarāṣṭraiḥ |
yeṣāṃ yuddhaṃ bhīmasenārjunābhyāṃ
tathāśvibhyāṃ vāsudevena caiva

शैनयेन ध्रुवमात्तायुधेन
धृष्टद्युम्नेनाथ शिखण्डिना च ।
युधिष्ठिरेणेन्द्रकल्पेन चैव
योऽपध्यानान्निर्दहेद्गां दिवं च

śainayena dhruvamāttāyudhena
dhṛṣṭadyumnenātha śikhaṇḍinā ca |
yudhiṣṭhireṇendrakalpena caiva
yo'padhyānānnirdahedgāṃ divaṃ ca

तैश्चेद्योद्धुं मन्यते धार्तराष्ट्रो
निर्वृत्तोऽर्थः सकलः पाण्डवानाम् ।
मा तत्कार्षीः पाण्डवस्यार्थहेतो-
रुपैहि युद्धं यदि मन्यसे त्वम्

taiścedyoddhuṃ manyate dhārtarāṣṭro
nirvṛtto'rthaḥ sakalaḥ pāṇḍavānām |
mā tatkārṣīḥ pāṇḍavasyārthaheto-
rupaihi yuddhaṃ yadi manyase tvam

यां तां वने दुःखशय्यामवात्सी-
त्प्रव्राजितः पाण्डवो धर्मचारी ।
आप्नोतु तां दुःखतरामनर्था-
मन्त्यां शय्यां धार्तराष्ट्रः पराशुः

yāṃ tāṃ vane duḥkhaśayyāmavātsī-
tpravrājitaḥ pāṇḍavo dharmacārī |
āpnotu tāṃ duḥkhatarāmanarthā-
mantyāṃ śayyāṃ dhārtarāṣṭraḥ parāśuḥ

ह्रिया ज्ञानेन तपसा दमेन
शौर्येणाथो धर्मगुप्त्या धनेन ।
अन्यायवृत्तिः कुरु पाण्डवे या-
नध्यातिष्ठद्धार्तराष्ट्रो दुरात्मा

hriyā jñānena tapasā damena
śauryeṇātho dharmaguptyā dhanena |
anyāyavṛttiḥ kuru pāṇḍave yā-
nadhyātiṣṭhaddhārtarāṣṭro durātmā

मायोपधं प्रतिधानार्जवाभ्यां
तपोदमाभ्यां धर्मगुप्त्या बलेन ।
सत्यं ब्रुवन्प्रतिपन्नो नृपो न-
स्तितिक्षमाणः क्लिश्यमानोऽतिवेलम्

māyopadhaṃ pratidhānārjavābhyāṃ
tapodamābhyāṃ dharmaguptyā balena |
satyaṃ bruvanpratipanno nṛpo na-
stitikṣamāṇaḥ kliśyamāno'tivelam

यदा ज्येष्ठः पाण्डवः संशितात्मा
क्रोधं यत्तं वर्षपूगान्सुघोरम् ।
अवस्त्रष्टा कुरुपूद्वृत्तचेता-
स्तदा युद्धं धार्तराष्ट्रोऽन्वतप्स्यत्

yadā jyeṣṭhaḥ pāṇḍavaḥ saṃśitātmā
krodhaṃ yattaṃ varṣapūgānsughoram |
avastraṣṭā kurupūdvṛttacetā-
stadā yuddhaṃ dhārtarāṣṭro'nvatapsyat

कृष्णवर्त्मेव ज्वलितः समिद्धो
यथा दहेत्कक्षमग्निर्निदाघे ।
एवं दग्धा धार्तराष्ट्रस्य सेनां
युधिष्ठिरः क्रोधदीप्तोन्ववेक्ष्य

kṛṣṇavartmeva jvalitaḥ samiddho
yathā dahetkakṣamagnirnidāghe |
evaṃ dagdhā dhārtarāṣṭrasya senāṃ
yudhiṣṭhiraḥ krodhadīptonvavekṣya

यदा द्रष्टा भीमसेनं रथस्यं
गदाहस्तं क्रोधविषं वमन्तम् ।
अमर्षणं पाण्डवं भीमवेगं
तदा युद्धं धार्तराष्ट्रोऽन्वतप्स्यत्

yadā draṣṭā bhīmasenaṃ rathasyaṃ
gadāhastaṃ krodhaviṣaṃ vamantam |
amarṣaṇaṃ pāṇḍavaṃ bhīmavegaṃ
tadā yuddhaṃ dhārtarāṣṭro'nvatapsyat

सेनागगं दंशितं भीमसेनं
सुलक्षणं वीरहणं परेषाम् ।
घ्नन्तं चमूमन्तकसन्निकाशं
तदा स्मर्ता वचनस्यातिमानी

senāgagaṃ daṃśitaṃ bhīmasenaṃ
sulakṣaṇaṃ vīrahaṇaṃ pareṣām |
ghnantaṃ camūmantakasannikāśaṃ
tadā smartā vacanasyātimānī

यदा द्रष्टा भीमसेनेन नागा-
न्निपातितान्गिरिकूटप्रकाशान् ।
किम्भैरिवासृग्वमतो भिन्नकुम्भां-
स्तदा युद्धं धार्तराष्ट्रोऽन्वतप्स्यत्

yadā draṣṭā bhīmasenena nāgā-
nnipātitāngirikūṭaprakāśān |
kimbhairivāsṛgvamato bhinnakumbhāṃ-
stadā yuddhaṃ dhārtarāṣṭro'nvatapsyat

महासिंहो गा इव संप्रविश्य
गदापाणिर्धार्तराष्ट्रानुपेत्य ।
यदा भीमो भीमरूपो निहन्ता
तदा युद्धं धार्तराष्ट्रोऽन्वतप्स्यत्

mahāsiṃho gā iva saṃpraviśya
gadāpāṇirdhārtarāṣṭrānupetya |
yadā bhīmo bhīmarūpo nihantā
tadā yuddhaṃ dhārtarāṣṭro'nvatapsyat

महाभये वीतभयः कृतास्त्रः
समागमे शत्रुबलावमर्दी ।
सकृद्रथेनाप्रतिमान्रथौघा-
न्पदातिसङ्घान्गदयाभिनिघ्नन्

mahābhaye vītabhayaḥ kṛtāstraḥ
samāgame śatrubalāvamardī |
sakṛdrathenāpratimānrathaughā-
npadātisaṅghāngadayābhinighnan

सैन्याननेकांस्तरसा विगृह्ण-
न्यदा छेत्ता धार्तराष्ट्रस्य सैन्यम् ।
छिन्दन्वनं परशुनेव शूर-
स्तदा युद्धं धार्तराष्ट्रोऽन्वतप्स्यत्

sainyānanekāṃstarasā vigṛhṇa-
nyadā chettā dhārtarāṣṭrasya sainyam |
chindanvanaṃ paraśuneva śūra-
stadā yuddhaṃ dhārtarāṣṭro'nvatapsyat

तृणप्रायं ज्वलनेनेव दग्धं
ग्रामं यथा धार्तराष्ट्रान्समीक्ष्य ।
पक्वं सस्यं वैद्युतेनेव दग्धं
परासिक्तं विपुलं स्वं बलौघम्

tṛṇaprāyaṃ jvalaneneva dagdhaṃ
grāmaṃ yathā dhārtarāṣṭrānsamīkṣya |
pakvaṃ sasyaṃ vaidyuteneva dagdhaṃ
parāsiktaṃ vipulaṃ svaṃ balaugham

हतप्रवीरं विमुखं भयार्तं
पराङ्मुखं प्रायशोऽनष्टयोधम् ।
शस्त्रार्चिषा भिमसेनेन दग्धं
तदा युद्धं धार्तराष्ट्रोऽन्वतप्त्सत्

hatapravīraṃ vimukhaṃ bhayārtaṃ
parāṅmukhaṃ prāyaśo'naṣṭayodham |
śastrārciṣā bhimasenena dagdhaṃ
tadā yuddhaṃ dhārtarāṣṭro'nvataptsat

उपासङ्गानाचरेद्दक्षिणेन
वराङ्गानां नकुलश्चित्रयोधी ।
यदा रथाग्र्यो रथिनः प्रचेता
तदा युद्धं धार्तराष्ट्रोऽन्वतप्स्यत्

upāsaṅgānācareddakṣiṇena
varāṅgānāṃ nakulaścitrayodhī |
yadā rathāgryo rathinaḥ pracetā
tadā yuddhaṃ dhārtarāṣṭro'nvatapsyat

सुखोचितो दुःखशय्यां वनेषु
दीर्घं कालं नकुलो यामशेत ।
आशीविषः क्रुद्ध इवोद्वमन्विषं
तदा युद्धं धार्तराष्ट्रोऽन्वतप्स्यत्

sukhocito duḥkhaśayyāṃ vaneṣu
dīrghaṃ kālaṃ nakulo yāmaśeta |
āśīviṣaḥ kruddha ivodvamanviṣaṃ
tadā yuddhaṃ dhārtarāṣṭro'nvatapsyat

त्यक्तात्मानः पार्थिवायोधनाय
समादिष्टा धर्मराजेन सूत ।
रथैः शुभ्रैः सैन्यमभिद्रवन्तो
दृष्ट्वा पश्चात्तप्स्यते धार्तराष्ट्रः

tyaktātmānaḥ pārthivāyodhanāya
samādiṣṭā dharmarājena sūta |
rathaiḥ śubhraiḥ sainyamabhidravanto
dṛṣṭvā paścāttapsyate dhārtarāṣṭraḥ

शिशून्कृतास्त्रानशिशुप्रकाशान्
यदा द्रष्टा कौरवः पञ्च शूरान् ।
त्यक्त्वा प्राणान्कौरवानाद्रवन्त-
स्तदा युद्धं धार्तराष्ट्रोऽन्वतप्स्यत्

śiśūnkṛtāstrānaśiśuprakāśān
yadā draṣṭā kauravaḥ pañca śūrān |
tyaktvā prāṇānkauravānādravanta-
stadā yuddhaṃ dhārtarāṣṭro'nvatapsyat

यथा शक्रो दानवनाशनार्थं
सुवर्णतारं रथमुत्तमाश्वैः ।
दान्तैर्युक्तं सहदेवोऽधिरूढः
शिरांसि राज्ञां क्षेप्स्यते मार्गणौघैः

yathā śakro dānavanāśanārthaṃ
suvarṇatāraṃ rathamuttamāśvaiḥ |
dāntairyuktaṃ sahadevo'dhirūḍhaḥ
śirāṃsi rājñāṃ kṣepsyate mārgaṇaughaiḥ

महाभये संप्रवृत्ते रथस्थं
विवर्तमानं समरे कृतास्त्रम् ।
सर्वा दिशः सपतन्तं समीक्ष्य
तदा युद्धं धार्तराष्ट्रोऽन्वतप्स्यत्

mahābhaye saṃpravṛtte rathasthaṃ
vivartamānaṃ samare kṛtāstram |
sarvā diśaḥ sapatantaṃ samīkṣya
tadā yuddhaṃ dhārtarāṣṭro'nvatapsyat

ह्रीनिषेवो निपुणः सत्यवादी
महाबलः सर्वधर्मोपपन्नः ।
गान्धारिमार्छंस्तुमुले क्षिप्रकारी
क्षेप्ता जनान्सहदेवस्तरस्वी

hrīniṣevo nipuṇaḥ satyavādī
mahābalaḥ sarvadharmopapannaḥ |
gāndhārimārchaṃstumule kṣiprakārī
kṣeptā janānsahadevastarasvī

यदा द्रष्टा द्रौपदेयान्महेषून्
शूरान्कृतास्त्रान्रथयुद्धकोविदान् ।
आशीविषान्घोरविषानिवायत-
स्तदा युद्धं धार्तराष्ट्रोऽन्वतप्स्यत्

yadā draṣṭā draupadeyānmaheṣūn
śūrānkṛtāstrānrathayuddhakovidān |
āśīviṣānghoraviṣānivāyata-
stadā yuddhaṃ dhārtarāṣṭro'nvatapsyat

यदाभिमन्युः परवीरघाती
शरैः परान्मेघ इवाभिवर्षन् ।
विगाहिता कृष्णसमः कृतास्त्र-
स्तदा युद्धं धार्तराष्ट्रोऽन्वतप्स्यत्

yadābhimanyuḥ paravīraghātī
śaraiḥ parānmegha ivābhivarṣan |
vigāhitā kṛṣṇasamaḥ kṛtāstra-
stadā yuddhaṃ dhārtarāṣṭro'nvatapsyat

यदा द्रष्टा बालमबालवीर्यं
द्विषच्चमूं मृत्युमिवोत्पतन्तम् ।
सौभद्रमिन्द्रप्रतिमं कृतास्त्रं
तदा युद्धं धार्तराष्ट्रोऽन्वतप्स्यत्

yadā draṣṭā bālamabālavīryaṃ
dviṣaccamūṃ mṛtyumivotpatantam |
saubhadramindrapratimaṃ kṛtāstraṃ
tadā yuddhaṃ dhārtarāṣṭro'nvatapsyat

प्रभद्रकाः शीघ्रतरा युवानो
विशारदाः सिंहसमानवीर्याः ।
यदा क्षेप्तारो धार्तराष्ट्रान्ससैन्यां-
स्तदा युद्धं धार्तराष्ट्रोऽन्वतप्स्यत्

prabhadrakāḥ śīghratarā yuvāno
viśāradāḥ siṃhasamānavīryāḥ |
yadā kṣeptāro dhārtarāṣṭrānsasainyāṃ-
stadā yuddhaṃ dhārtarāṣṭro'nvatapsyat

वृद्धौ विराटद्रुपदौ महारथौ
पथक्कमूभ्यामभिवर्तमानौ ।
यदा द्रष्टारौ धार्तराष्ट्रान्ससैन्यां-
स्तदा युद्धं धार्तराष्ट्रोऽन्वतप्स्यत्

vṛddhau virāṭadrupadau mahārathau
pathakkamūbhyāmabhivartamānau |
yadā draṣṭārau dhārtarāṣṭrānsasainyāṃ-
stadā yuddhaṃ dhārtarāṣṭro'nvatapsyat

यदा कृतास्त्रो द्रुपदः प्रचिन्वन्
शिरांसि यूनां समरे रथस्थः ।
क्रूद्धः शरैश्छेत्स्यति चापमुक्तै-
स्तदा युद्धं धार्तराष्ट्रोऽन्वतप्स्यत्

yadā kṛtāstro drupadaḥ pracinvan
śirāṃsi yūnāṃ samare rathasthaḥ |
krūddhaḥ śaraiśchetsyati cāpamuktai-
stadā yuddhaṃ dhārtarāṣṭro'nvatapsyat

यदा विराटः परवीरघाती
रथान्तरे शत्रुचमूं प्रवेष्टा ।
मात्स्यैः सार्धमनृशंसरूपै-
स्तदा युद्धं धार्तराष्ट्रोऽन्वतप्स्यत्

yadā virāṭaḥ paravīraghātī
rathāntare śatrucamūṃ praveṣṭā |
mātsyaiḥ sārdhamanṛśaṃsarūpai-
stadā yuddhaṃ dhārtarāṣṭro'nvatapsyat

ज्येष्ठं मात्स्यमनृसंसार्यरूपं
विराटपुत्रं रथिनं पुरस्तात् ।
यदा द्रष्टा दंशतिं पाण्डवार्थे
तदा युद्धं धार्तराष्ट्रोऽन्वतप्स्यत्

jyeṣṭhaṃ mātsyamanṛsaṃsāryarūpaṃ
virāṭaputraṃ rathinaṃ purastāt |
yadā draṣṭā daṃśatiṃ pāṇḍavārthe
tadā yuddhaṃ dhārtarāṣṭro'nvatapsyat

रणे हते कौरवाणां प्रवीरे
शिखण्डिना शन्तनोर्वै तनूजे ।
न जातु नः शत्रवो धारयेयु-
रशंशयं सत्यमेतद्ब्रवीति

raṇe hate kauravāṇāṃ pravīre
śikhaṇḍinā śantanorvai tanūje |
na jātu naḥ śatravo dhārayeyu-
raśaṃśayaṃ satyametadbravīti

यदा शिखण्डी रथिनः प्रचिन्वन्
भीष्मं रथेनाभियाता वरूथी ।
दिव्यैर्हयैरवमृद्गन् रथौघां-
स्तदा युद्धं धार्तराष्ट्रोऽन्वतप्स्यत्

yadā śikhaṇḍī rathinaḥ pracinvan
bhīṣmaṃ rathenābhiyātā varūthī |
divyairhayairavamṛdgan rathaughāṃ-
stadā yuddhaṃ dhārtarāṣṭro'nvatapsyat

यदा द्रष्टा सृञ्जयानामनीके
धृष्टद्नुम्नं प्रमुखे रोचमानम् ।
अस्त्रं यस्मै गुह्यमुवाच धीमा-
न्द्रोणस्तदा तप्स्यति धार्तराष्ट्रः

yadā draṣṭā sṛñjayānāmanīke
dhṛṣṭadnumnaṃ pramukhe rocamānam |
astraṃ yasmai guhyamuvāca dhīmā-
ndroṇastadā tapsyati dhārtarāṣṭraḥ

यदा स सेनापतिरप्रमेयः
परामृद्गन्निषुभिर्धार्तराष्ट्रान् ।
द्रोणं रणे शत्रुसहोभियाता
तदा युद्धं धार्ताराष्ट्रोऽन्वतप्स्यत्

yadā sa senāpatiraprameyaḥ
parāmṛdganniṣubhirdhārtarāṣṭrān |
droṇaṃ raṇe śatrusahobhiyātā
tadā yuddhaṃ dhārtārāṣṭro'nvatapsyat

ह्रीमान्मनीपी बलवान्मनस्वी
स लक्ष्मीवान्सोमकानां प्रबर्हः ।
न जातु तं शत्रवोऽन्ये सहेर-
न्योपां स स्यादग्रणीर्वृष्णिसिंहः

hrīmānmanīpī balavānmanasvī
sa lakṣmīvānsomakānāṃ prabarhaḥ |
na jātu taṃ śatravo'nye sahera-
nyopāṃ sa syādagraṇīrvṛṣṇisiṃhaḥ

इदं च ब्रूया मा वृणीष्वेति लोके
युद्धेऽद्वितीयं सचिवं रथस्थम् ।
शिनेर्नप्तारं प्रवृणीम सात्यकिं
महाबलं वीतभयं कृतास्त्रम्

idaṃ ca brūyā mā vṛṇīṣveti loke
yuddhe'dvitīyaṃ sacivaṃ rathastham |
śinernaptāraṃ pravṛṇīma sātyakiṃ
mahābalaṃ vītabhayaṃ kṛtāstram

महोरस्को दीर्घबाहुः प्रमाथी
युद्धेऽद्वितीयः परमास्त्रवेदी ।
शिनेर्नप्ता तालमात्रायधोऽयं
महारथो वीतभयः कृतास्त्रः

mahorasko dīrghabāhuḥ pramāthī
yuddhe'dvitīyaḥ paramāstravedī |
śinernaptā tālamātrāyadho'yaṃ
mahāratho vītabhayaḥ kṛtāstraḥ

यदा शिनीनामधिपो मयोक्तः
शरैः परान्मेघ इव प्रवर्षन् ।
प्रच्छादयिष्यत्यरिहा योधमुख्यां-
स्तदा युद्धं धार्तराष्ट्रोऽन्वतप्स्यत्

yadā śinīnāmadhipo mayoktaḥ
śaraiḥ parānmegha iva pravarṣan |
pracchādayiṣyatyarihā yodhamukhyāṃ-
stadā yuddhaṃ dhārtarāṣṭro'nvatapsyat

यदा धृतिं कुरुते योत्स्यमानः
स दीर्घबाहुर्दृढधन्वा महात्मा ।
सिंहस्येव गन्धमाघ्राय गावः
संचेष्टन्ते शत्रवोऽस्माद्रणाग्रे

yadā dhṛtiṃ kurute yotsyamānaḥ
sa dīrghabāhurdṛḍhadhanvā mahātmā |
siṃhasyeva gandhamāghrāya gāvaḥ
saṃceṣṭante śatravo'smādraṇāgre

स दीर्घबाहुर्दृढधन्वा महात्मा
भिन्द्याद्गिरीन्संहरेत्सर्वलोकान् ।
अस्त्रे कृती निपुणः क्षिप्रहस्तो
दिवि स्थितः सूर्य इवाभिभाति

sa dīrghabāhurdṛḍhadhanvā mahātmā
bhindyādgirīnsaṃharetsarvalokān |
astre kṛtī nipuṇaḥ kṣiprahasto
divi sthitaḥ sūrya ivābhibhāti

चित्रः सूक्ष्मः सुकृतो यादवस्य
अस्त्रे योगो वृष्णिसिंहस्य भूयान् ।
यथाविधं योगमाहुः प्रशस्तं
सर्वैर्गुणैः सात्यकिस्तैरुपेतः

citraḥ sūkṣmaḥ sukṛto yādavasya
astre yogo vṛṣṇisiṃhasya bhūyān |
yathāvidhaṃ yogamāhuḥ praśastaṃ
sarvairguṇaiḥ sātyakistairupetaḥ

हिरण्मयं श्वेतहयैश्चतुर्भि-
र्यदा युक्तं स्यन्दनं माधवस्य ।
द्रष्टा युद्धे सात्यकेर्धार्तराष्ट्र-
स्तदा तप्स्यत्यकृतात्मा स मन्दः

hiraṇmayaṃ śvetahayaiścaturbhi-
ryadā yuktaṃ syandanaṃ mādhavasya |
draṣṭā yuddhe sātyakerdhārtarāṣṭra-
stadā tapsyatyakṛtātmā sa mandaḥ

यदा रथं हेममणिप्रकाशं
श्वेताश्वयुक्तं वानरकेतुमुग्रम् ।
दृष्ट्वा ममाप्यास्थितं केशवेन
तदा तप्स्यत्यकृतात्मा स मन्दः

yadā rathaṃ hemamaṇiprakāśaṃ
śvetāśvayuktaṃ vānaraketumugram |
dṛṣṭvā mamāpyāsthitaṃ keśavena
tadā tapsyatyakṛtātmā sa mandaḥ

यदा मौर्व्यास्तलनिष्पेपमुग्रं
महाशब्दं वज्रनिष्पेपतुल्यम् ।
विद्यूयमानस्य महारणे मया
स गाण्डिवस्य श्रोष्यति मन्दबुद्धिः

yadā maurvyāstalaniṣpepamugraṃ
mahāśabdaṃ vajraniṣpepatulyam |
vidyūyamānasya mahāraṇe mayā
sa gāṇḍivasya śroṣyati mandabuddhiḥ

तदा मूढो धृतराष्ट्रस्य पुत्र-
स्तप्ता युद्धे दुर्मतिर्दुःसहायः ।
दृष्ट्वा सैन्यं बाणवर्षान्धकारे
प्रभज्यन्तं गोकुलवद्रणाग्रे

tadā mūḍho dhṛtarāṣṭrasya putra-
staptā yuddhe durmatirduḥsahāyaḥ |
dṛṣṭvā sainyaṃ bāṇavarṣāndhakāre
prabhajyantaṃ gokulavadraṇāgre

बलाहकादुच्चरतः सुभीमा-
न्विद्युत्स्फुलिङ्गानिव घोररूपान् ।
सहस्रघ्नान्द्विषतां सङ्गरेषु
अस्थिच्छिदो मर्मभिदः सुपुङ्खान्

balāhakāduccarataḥ subhīmā-
nvidyutsphuliṅgāniva ghorarūpān |
sahasraghnāndviṣatāṃ saṅgareṣu
asthicchido marmabhidaḥ supuṅkhān

यदा द्रष्टा ज्यामुखाद्बाणसङ्घान्
गाण्डीवमुक्तानापततः शिताग्रान् ।
हयान्गजान्वर्मिणश्चाददानां-
स्तदा युद्धं धार्तराष्ट्रोऽन्वतप्स्यत्

yadā draṣṭā jyāmukhādbāṇasaṅghān
gāṇḍīvamuktānāpatataḥ śitāgrān |
hayāngajānvarmiṇaścādadānāṃ-
stadā yuddhaṃ dhārtarāṣṭro'nvatapsyat

यदा मन्दः परबाणान्विमुक्ता-
न्ममेषुभिर्हियमाणान्प्रतीपम् ।
तिर्यग्विध्य च्छिद्यमानान्पृषत्कै-
स्तदा युद्धं धार्तराष्ट्रोऽन्वतप्स्यत्

yadā mandaḥ parabāṇānvimuktā-
nmameṣubhirhiyamāṇānpratīpam |
tiryagvidhya cchidyamānānpṛṣatkai-
stadā yuddhaṃ dhārtarāṣṭro'nvatapsyat

यदा विपाठा मद्भुजविप्रमुक्ता
द्विजाः फलानीव महीरुहाग्रात् ।
प्रचेतार उत्तमाङ्गानि यूनां
तदा युद्धं धार्तराष्ट्रोऽन्वतप्स्यत्

yadā vipāṭhā madbhujavipramuktā
dvijāḥ phalānīva mahīruhāgrāt |
pracetāra uttamāṅgāni yūnāṃ
tadā yuddhaṃ dhārtarāṣṭro'nvatapsyat

यदा द्रष्टा पततः स्यन्दनेभ्यो
महागजेभ्योऽश्वगतान्सुयोधनान् ।
शरैर्हतान्पातितांश्चैव रङ्गे
तदा युद्धं धार्तराष्ट्रोऽन्वतप्स्यत्

yadā draṣṭā patataḥ syandanebhyo
mahāgajebhyo'śvagatānsuyodhanān |
śarairhatānpātitāṃścaiva raṅge
tadā yuddhaṃ dhārtarāṣṭro'nvatapsyat

असंप्राप्तानस्त्रपथं परस्य
यदा द्रष्टा नश्यतो धार्तराष्ट्रान् ।
अकुर्वतः कर्म युद्धे समन्ता-
त्तदा युद्धं धार्तराष्ट्रोऽन्वतप्स्यत्

asaṃprāptānastrapathaṃ parasya
yadā draṣṭā naśyato dhārtarāṣṭrān |
akurvataḥ karma yuddhe samantā-
ttadā yuddhaṃ dhārtarāṣṭro'nvatapsyat

पदातिसङ्घान्रथसङ्घान्समन्ता-
द्व्यात्ताननः काल इवाततेषुः ।
प्रणोत्स्यामि ज्वलितैर्बाणवर्षैः
शत्रूंस्तदा तप्स्यति मन्दबुद्धिः

padātisaṅghānrathasaṅghānsamantā-
dvyāttānanaḥ kāla ivātateṣuḥ |
praṇotsyāmi jvalitairbāṇavarṣaiḥ
śatrūṃstadā tapsyati mandabuddhiḥ

सर्वा दिशः संपतता रथेन
रजोध्वस्तं गाण्डिवेन प्रकृत्तम् ।
यदा द्रष्टा स्वबलं संप्रमूढं
तदा पश्चात्तप्स्यति मन्दबुद्धिः

sarvā diśaḥ saṃpatatā rathena
rajodhvastaṃ gāṇḍivena prakṛttam |
yadā draṣṭā svabalaṃ saṃpramūḍhaṃ
tadā paścāttapsyati mandabuddhiḥ

कान्दिग्भूतं छिन्नगात्रं विसंज्ञं
दुर्योधनो द्रक्ष्यति सर्वसैन्यम् ।
हताश्ववीराग्र्यनरेन्द्रनागं
पिपासितं श्रान्तपत्रं भयार्तम्

kāndigbhūtaṃ chinnagātraṃ visaṃjñaṃ
duryodhano drakṣyati sarvasainyam |
hatāśvavīrāgryanarendranāgaṃ
pipāsitaṃ śrāntapatraṃ bhayārtam

आर्तस्वरं हन्यमानं हतं च
विकीर्णकेशास्थिकपालसङ्घम् ।
प्रजापतेः कर्म यथार्थनिष्ठितं
तदा दृष्ट्वा तप्स्यति मन्दबुद्धिः

ārtasvaraṃ hanyamānaṃ hataṃ ca
vikīrṇakeśāsthikapālasaṅgham |
prajāpateḥ karma yathārthaniṣṭhitaṃ
tadā dṛṣṭvā tapsyati mandabuddhiḥ

यदा रथे गाण्डिवं वासुदेवं
दिव्यं शङ्खं पाञ्चजन्यं हयांश्च ।
तूणावक्षय्यौ देवदत्तं च मां च
दृष्ट्वा युद्धे धार्तराष्ट्रोऽन्वतप्स्यत्

yadā rathe gāṇḍivaṃ vāsudevaṃ
divyaṃ śaṅkhaṃ pāñcajanyaṃ hayāṃśca |
tūṇāvakṣayyau devadattaṃ ca māṃ ca
dṛṣṭvā yuddhe dhārtarāṣṭro'nvatapsyat

उद्वर्तयन्दस्युसङ्घान्समेतान्
प्रवर्तयन्युगमन्यद्युगान्ते ।
यदा धक्ष्याम्यग्निवत्कौरवेयां-
स्तदा तप्ता धृतराष्ट्रः सपुत्रः

udvartayandasyusaṅghānsametān
pravartayanyugamanyadyugānte |
yadā dhakṣyāmyagnivatkauraveyāṃ-
stadā taptā dhṛtarāṣṭraḥ saputraḥ

सभ्राता वै सहसैन्यः सभृत्यो
भ्रष्टैश्वर्यः क्रोधवशोऽल्पचेताः ।
दर्पस्यान्ते निहतो वेपमानः
पश्चान्मन्दस्तप्स्यति धार्तराष्ट्रः

sabhrātā vai sahasainyaḥ sabhṛtyo
bhraṣṭaiśvaryaḥ krodhavaśo'lpacetāḥ |
darpasyānte nihato vepamānaḥ
paścānmandastapsyati dhārtarāṣṭraḥ

पूर्वाह्णे मां कृतजप्यं कदाचि-
द्विप्रः प्रोवाचोदकान्ते मनोज्ञम् ।
कर्तव्यं ते दुष्करं कर्म पार्थ
योद्धव्यं कते शत्रुभिः सव्यसाचिन्

pūrvāhṇe māṃ kṛtajapyaṃ kadāci-
dvipraḥ provācodakānte manojñam |
kartavyaṃ te duṣkaraṃ karma pārtha
yoddhavyaṃ kate śatrubhiḥ savyasācin

इन्द्रो वा ते हरिवान्वज्रहस्तः
पुरस्ताद्यातु समरेऽरीन्विनिघ्नन् ।
सुग्रीवयुक्तेन रथेन वा ते
पश्चात्कृष्णो रक्षतु वासुदेवः

indro vā te harivānvajrahastaḥ
purastādyātu samare'rīnvinighnan |
sugrīvayuktena rathena vā te
paścātkṛṣṇo rakṣatu vāsudevaḥ

वज्रे चाहं वज्रहस्तान्महेन्द्रा-
दस्मिन्युद्धे वासुदेवं सहायम् ।
स मे लब्धो दस्युवधाय कृष्णो
मन्ये चेतद्विहितं दैवतेर्मे

vajre cāhaṃ vajrahastānmahendrā-
dasminyuddhe vāsudevaṃ sahāyam |
sa me labdho dasyuvadhāya kṛṣṇo
manye cetadvihitaṃ daivaterme

अयुद्ध्यमानो मनसापि यस्य
जयं कृष्णः पुरुषस्याभिनन्देत् ।
एवं सर्वान्स व्यतीयादमित्रान्
सेन्द्रान्देवान्मानुषे नास्ति चिन्ता

ayuddhyamāno manasāpi yasya
jayaṃ kṛṣṇaḥ puruṣasyābhinandet |
evaṃ sarvānsa vyatīyādamitrān
sendrāndevānmānuṣe nāsti cintā

स बाहुभ्यां सागरमुत्तितीर्षे-
न्महोदधिं सलिलस्याप्रमेयम् ।
तेजस्विनं कृष्णमत्यन्तशूरं
युद्धेन यो वासुदेवं जिगीषेत्

sa bāhubhyāṃ sāgaramuttitīrṣe-
nmahodadhiṃ salilasyāprameyam |
tejasvinaṃ kṛṣṇamatyantaśūraṃ
yuddhena yo vāsudevaṃ jigīṣet

गिरिं य इच्छेत्तु तलेन भेत्तुं
शिलोच्चयं श्वेतमतिप्रमाणम् ।
तस्यैव पाणिः सनखो विशीर्ये-
न्न चापि किञ्चित्स गिरेस्तु कुर्यात्

giriṃ ya icchettu talena bhettuṃ
śiloccayaṃ śvetamatipramāṇam |
tasyaiva pāṇiḥ sanakho viśīrye-
nna cāpi kiñcitsa girestu kuryāt

अग्निं समिद्धं शमयेद्भुजाभ्यां
चन्द्रं च सूर्यं च निवारयेत ।
हरेद्देवानाममृतं प्रसह्य
युद्धेन यो वासुदेवं जिगीषेत्

agniṃ samiddhaṃ śamayedbhujābhyāṃ
candraṃ ca sūryaṃ ca nivārayeta |
hareddevānāmamṛtaṃ prasahya
yuddhena yo vāsudevaṃ jigīṣet

यो रुक्मिणीमेकरथेन भोज-
नुत्साद्य राज्ञः समरे प्रसह्य ।
उवाह भार्यां यशसा ज्वलन्तीं
यस्यां जज्ञे रौक्मिणेयो महात्मा

yo rukmiṇīmekarathena bhoja-
nutsādya rājñaḥ samare prasahya |
uvāha bhāryāṃ yaśasā jvalantīṃ
yasyāṃ jajñe raukmiṇeyo mahātmā

अयं गान्धारांस्तरसा संप्रमथ्य
जित्वा पुत्रान्नग्नजितः समग्रान्
बद्धं मुमोच विनदन्तं प्रसह्य
सुदर्शनं वै देवतानां ललामम्

ayaṃ gāndhārāṃstarasā saṃpramathya
jitvā putrānnagnajitaḥ samagrān
baddhaṃ mumoca vinadantaṃ prasahya
sudarśanaṃ vai devatānāṃ lalāmam

अयं कवाटे निजघान पाण्ड्यं
तथा कलिङ्गान्दन्तवक्रं ममर्द ।
अनेन दग्धा वर्षपूगान्विनाथा
वाराणसी नगरी संबभूव

ayaṃ kavāṭe nijaghāna pāṇḍyaṃ
tathā kaliṅgāndantavakraṃ mamarda |
anena dagdhā varṣapūgānvināthā
vārāṇasī nagarī saṃbabhūva

अयं स्म युद्धे मन्यतेऽन्यैरजेयं
तमेकलव्यं नाम निषादराजम् ।
वेगेनैव शैलमभिहत्य जम्भः
शेते स कृष्णेन हतः परासुः

ayaṃ sma yuddhe manyate'nyairajeyaṃ
tamekalavyaṃ nāma niṣādarājam |
vegenaiva śailamabhihatya jambhaḥ
śete sa kṛṣṇena hataḥ parāsuḥ

तथोग्रसेनस्य सुतं सुदुष्टं
वृष्ण्यन्धकानां मध्यगतं सभास्थम् ।
अपातयद्बलदेवद्वितीयो
हत्वा ददौ चोग्रसेनाय राज्यम्

tathograsenasya sutaṃ suduṣṭaṃ
vṛṣṇyandhakānāṃ madhyagataṃ sabhāstham |
apātayadbaladevadvitīyo
hatvā dadau cograsenāya rājyam

अयं सौभं योधयामास स्वस्थं
विभीषणं मायया साल्वराजम् ।
सौभद्वारि प्रत्यगृह्णाच्छतघ्नीं
दोर्भ्यां क एनं विषहेत मर्त्यः

ayaṃ saubhaṃ yodhayāmāsa svasthaṃ
vibhīṣaṇaṃ māyayā sālvarājam |
saubhadvāri pratyagṛhṇācchataghnīṃ
dorbhyāṃ ka enaṃ viṣaheta martyaḥ

प्राग्ज्योतिषं नाम बभूव दुर्गं
पुरं घोरमसुराणामसह्यम् ।
महाबलो नरकस्तत्र भौमो
जहारादित्या मणिकुण्डले शुभे

prāgjyotiṣaṃ nāma babhūva durgaṃ
puraṃ ghoramasurāṇāmasahyam |
mahābalo narakastatra bhaumo
jahārādityā maṇikuṇḍale śubhe

न तं देवाः सह शक्रेण शेकुः
समागता युधि मृत्योरभीताः ।
दृष्ट्वा च तं विक्रमं केशवस्य
बलं तथैवास्त्रमवारणीयम्

na taṃ devāḥ saha śakreṇa śekuḥ
samāgatā yudhi mṛtyorabhītāḥ |
dṛṣṭvā ca taṃ vikramaṃ keśavasya
balaṃ tathaivāstramavāraṇīyam

जानन्तोऽस्य प्रकृतिं केशवस्य
न्ययोजयन्दस्युवधाय कृष्णम् ।
स तत्कर्म प्रतिशुश्राव दुष्कर-
मैश्वर्यवान्सिद्धिषु वासुदेवः

jānanto'sya prakṛtiṃ keśavasya
nyayojayandasyuvadhāya kṛṣṇam |
sa tatkarma pratiśuśrāva duṣkara-
maiśvaryavānsiddhiṣu vāsudevaḥ

निर्मोचने षट्सहस्राणि हत्वा
संच्छिद्य पाशान्सहसा क्षुरान्तान् ।
मुरं हत्वा विनिहत्यौघरक्षो
निर्मोचनं चापि जगाम वीरः

nirmocane ṣaṭsahasrāṇi hatvā
saṃcchidya pāśānsahasā kṣurāntān |
muraṃ hatvā vinihatyaugharakṣo
nirmocanaṃ cāpi jagāma vīraḥ

तत्रैव तेनास्य बभूव युद्धं
महाबलेनातिबलस्य विष्णोः ।
शेते स कृष्णेन हतः परासु-
र्वातेनेव मथितः कर्णिकारः

tatraiva tenāsya babhūva yuddhaṃ
mahābalenātibalasya viṣṇoḥ |
śete sa kṛṣṇena hataḥ parāsu-
rvāteneva mathitaḥ karṇikāraḥ

आहृत्य कृष्णो मणिकुण्डले ते
हत्वा च भौमं नरकं मुर च ।
श्रिया वृतो यशसा चैव विद्वा-
न्प्रत्याजगामाप्रतिमप्रभावः

āhṛtya kṛṣṇo maṇikuṇḍale te
hatvā ca bhaumaṃ narakaṃ mura ca |
śriyā vṛto yaśasā caiva vidvā-
npratyājagāmāpratimaprabhāvaḥ

अस्मै वराण्यददंस्तत्र देवा
दृष्ट्वा भीमं कर्म कृतं रणे तत् ।
श्रमश्च ते युध्यमानस्य न स्या-
दाकाशे चाप्सु च ते क्रमः स्यात्

asmai varāṇyadadaṃstatra devā
dṛṣṭvā bhīmaṃ karma kṛtaṃ raṇe tat |
śramaśca te yudhyamānasya na syā-
dākāśe cāpsu ca te kramaḥ syāt

शस्त्राणि गात्रे न च ते क्रमेर-
न्नित्येव कृष्णश्च ततः कृतार्थः ।
एवं रूपे वासुदेवेऽप्रमेये
महाबले गुणसंपत्सदैव

śastrāṇi gātre na ca te kramera-
nnityeva kṛṣṇaśca tataḥ kṛtārthaḥ |
evaṃ rūpe vāsudeve'prameye
mahābale guṇasaṃpatsadaiva

तमसह्यं विष्णुमनन्तवीर्य-
माशंसते धार्तराष्ट्रो विजेतुम् ।
सदा ह्येनं तर्कयते दुरात्मा
तच्चाप्ययं सहतेऽस्मान्समीक्ष्य

tamasahyaṃ viṣṇumanantavīrya-
māśaṃsate dhārtarāṣṭro vijetum |
sadā hyenaṃ tarkayate durātmā
taccāpyayaṃ sahate'smānsamīkṣya

पर्यागतं मम कृष्णस्य चैव
यो मन्यते कलहं संप्रसह्य ।
शक्यं हर्तुं पाण्डवानां ममत्वं
तद्वेदिता संयुगं तत्र गत्वा

paryāgataṃ mama kṛṣṇasya caiva
yo manyate kalahaṃ saṃprasahya |
śakyaṃ hartuṃ pāṇḍavānāṃ mamatvaṃ
tadveditā saṃyugaṃ tatra gatvā

नमस्कृत्वा शान्तनवाय राज्ञे
द्रोणायाथो सहपुत्राय चैव ।
शारद्वतायाप्रतिद्वन्द्विने च
योत्स्याम्यहं राज्यमभीप्समानः

namaskṛtvā śāntanavāya rājñe
droṇāyātho sahaputrāya caiva |
śāradvatāyāpratidvandvine ca
yotsyāmyahaṃ rājyamabhīpsamānaḥ

धर्मेणाप्तं निधनं तस्य मन्ये
यो योत्स्यते पाण्डवैर्धर्मचारी ।
मिथ्या ग्लहे निर्जिता वै नृशंसैः
संवत्सरान्वै द्वादश राजपुत्राः

dharmeṇāptaṃ nidhanaṃ tasya manye
yo yotsyate pāṇḍavairdharmacārī |
mithyā glahe nirjitā vai nṛśaṃsaiḥ
saṃvatsarānvai dvādaśa rājaputrāḥ

वासः कृच्छ्रो विहितश्चाप्यरण्ये
दीर्घं कालं चैकमज्ञातवर्षम् ।
ते हि कस्माज्जीवतां पाण्डवानां
नन्दिष्यन्ते धार्तराष्ट्राः पदस्थाः

vāsaḥ kṛcchro vihitaścāpyaraṇye
dīrghaṃ kālaṃ caikamajñātavarṣam |
te hi kasmājjīvatāṃ pāṇḍavānāṃ
nandiṣyante dhārtarāṣṭrāḥ padasthāḥ

ते चेदस्मान्युध्यमानाञ्जयेयु-
र्देवैर्महेन्द्रप्रमुखैः सहायैः ।
धर्मादधर्मश्चरितो गरीयां-
स्ततो ध्रुवं नास्ति कृतं च साधु

te cedasmānyudhyamānāñjayeyu-
rdevairmahendrapramukhaiḥ sahāyaiḥ |
dharmādadharmaścarito garīyāṃ-
stato dhruvaṃ nāsti kṛtaṃ ca sādhu

न चेदिदं पौरुषं कर्मबद्धं
न चेदस्मान्मन्यतेऽसौ विशिष्टान् ।
आशंसेऽहं वासुदेवद्वितीयो
दुर्योधनं सानुबन्धं निहन्तुम्

na cedidaṃ pauruṣaṃ karmabaddhaṃ
na cedasmānmanyate'sau viśiṣṭān |
āśaṃse'haṃ vāsudevadvitīyo
duryodhanaṃ sānubandhaṃ nihantum

न चेदिदं कर्म नरेन्द्र वन्ध्यं
न चेद्भवेत्सुकृतं निष्फलं वा ।
इदं च तच्चाभिसमीक्ष्य नूनं
पराजयो धार्तराष्ट्रस्य साधुः

na cedidaṃ karma narendra vandhyaṃ
na cedbhavetsukṛtaṃ niṣphalaṃ vā |
idaṃ ca taccābhisamīkṣya nūnaṃ
parājayo dhārtarāṣṭrasya sādhuḥ

प्रत्यक्षं वः कुरवो यद्ब्रवीमि
युद्ध्यमाना धार्तराष्ट्रा न सन्ति ।
अन्यत्र युद्धात्कुरवो यदि स्यु-
र्न युद्धे वै शेष इहास्ति कश्चित्

pratyakṣaṃ vaḥ kuravo yadbravīmi
yuddhyamānā dhārtarāṣṭrā na santi |
anyatra yuddhātkuravo yadi syu-
rna yuddhe vai śeṣa ihāsti kaścit

हत्वा त्वहं धार्तराष्ट्रान्सकर्णा-
न्राज्यं कुरूणामवजेता समग्रम् ।
यद्वः कार्यं तत्कुरुध्वं यथास्व-
मिष्टान्दरानात्मभोगान्भजध्वम्

hatvā tvahaṃ dhārtarāṣṭrānsakarṇā-
nrājyaṃ kurūṇāmavajetā samagram |
yadvaḥ kāryaṃ tatkurudhvaṃ yathāsva-
miṣṭāndarānātmabhogānbhajadhvam

अप्येवं नो ब्राह्मणाः सन्ति वृद्धा
बहुश्रुताः शीलवन्तः कुलीनाः ।
सांवत्सरा ज्योतिषि चाभियुक्ता
नक्षत्रयोगेषु च निश्चयज्ञाः

apyevaṃ no brāhmaṇāḥ santi vṛddhā
bahuśrutāḥ śīlavantaḥ kulīnāḥ |
sāṃvatsarā jyotiṣi cābhiyuktā
nakṣatrayogeṣu ca niścayajñāḥ

उच्चावचं दैवयुक्तं रहस्यं
दिव्याः प्रश्ना मृगचक्रा मुहूर्ताः ।
क्षयं महान्तं कुरुसृञ्‍जयानां
निवेदयन्ते पाण्डवानां जयं च

uccāvacaṃ daivayuktaṃ rahasyaṃ
divyāḥ praśnā mṛgacakrā muhūrtāḥ |
kṣayaṃ mahāntaṃ kurusṛñ‍jayānāṃ
nivedayante pāṇḍavānāṃ jayaṃ ca

यथा हि नो मन्यतेऽजातशत्रुः
संसिद्धार्थो द्विपतां निग्रहाय ।
जनार्दनश्चाप्यपरोक्षविद्यो
न संशयं पश्यति वृष्णिसिंहः

yathā hi no manyate'jātaśatruḥ
saṃsiddhārtho dvipatāṃ nigrahāya |
janārdanaścāpyaparokṣavidyo
na saṃśayaṃ paśyati vṛṣṇisiṃhaḥ

अहं तथैनं खलु भाविरूपं
पश्यामि बुद्धया स्वयमप्रमत्तः ।
दृष्टिश्च मे न व्यथते पुराणी
संयुध्यमाना धार्तराष्ट्रा न सन्ति

ahaṃ tathainaṃ khalu bhāvirūpaṃ
paśyāmi buddhayā svayamapramattaḥ |
dṛṣṭiśca me na vyathate purāṇī
saṃyudhyamānā dhārtarāṣṭrā na santi

अनालब्धं जृम्भति गाण्डिवं धनु-
रनाहता कम्पति मे धनुर्ज्या ।
बाणाश्च मे तूणमुखाद्विसृत्य
मुहुर्मुहुर्गन्तुमुशन्ति चैव

anālabdhaṃ jṛmbhati gāṇḍivaṃ dhanu-
ranāhatā kampati me dhanurjyā |
bāṇāśca me tūṇamukhādvisṛtya
muhurmuhurgantumuśanti caiva

खङ्गः कोशान्निःसरति प्रसन्नो
हित्वेव जीर्णासुरगस्त्वचं स्वाम् ।
ध्वजे वाचो रौद्ररूपा भवन्ति
कदा रथो योक्ष्यते ते किरीटिन्

khaṅgaḥ kośānniḥsarati prasanno
hitveva jīrṇāsuragastvacaṃ svām |
dhvaje vāco raudrarūpā bhavanti
kadā ratho yokṣyate te kirīṭin

गोमायुसङ्घाश्च नदन्ति रात्रौ
रक्षांस्यथो निष्पतन्त्यन्तरिक्षात् ।
मृगाः श्रृगालाः शितिकण्ठाश्च काका
गृध्रा बकाश्चैव तरक्षवश्च

gomāyusaṅghāśca nadanti rātrau
rakṣāṃsyatho niṣpatantyantarikṣāt |
mṛgāḥ śrṛgālāḥ śitikaṇṭhāśca kākā
gṛdhrā bakāścaiva tarakṣavaśca

सुवर्णपत्राश्च पतन्ति पञ्चा-
दृष्ट्वा रथं श्वेतहयप्रयुक्तम् ।
अहं ह्येकः पार्थिवान्सर्वयोधान्
शरान्वर्पन्मृत्युलोकं नयेयम्

suvarṇapatrāśca patanti pañcā-
dṛṣṭvā rathaṃ śvetahayaprayuktam |
ahaṃ hyekaḥ pārthivānsarvayodhān
śarānvarpanmṛtyulokaṃ nayeyam

समादेदानः पृथगस्त्रमार्गा-
न्यथाप्रिरिद्धो गहनं निदाघे ।
स्थूणाकर्णं पाशुपतं महास्त्रं
ब्राह्मं चास्त्रं यच्च शक्रोऽप्यदान्मे

samādedānaḥ pṛthagastramārgā-
nyathāpririddho gahanaṃ nidāghe |
sthūṇākarṇaṃ pāśupataṃ mahāstraṃ
brāhmaṃ cāstraṃ yacca śakro'pyadānme

वधे धृतो वेगवतः प्रमुञ्च-
न्नाहं प्रजाः किञ्चिदिहावशिष्ये ।
शान्तिं लप्स्ये परमो ह्येप भावः
स्थिरो मम ब्रूहि गावल्गणे तान्

vadhe dhṛto vegavataḥ pramuñca-
nnāhaṃ prajāḥ kiñcidihāvaśiṣye |
śāntiṃ lapsye paramo hyepa bhāvaḥ
sthiro mama brūhi gāvalgaṇe tān

ये वैजय्याः समरे सूत लब्ध्वा
देवानपीन्द्रग्रमुखान्समेतात् ।
तैर्मन्मते कलहं संप्रसह्य
स धार्तराष्ट्रः पश्यत मोहमस्य

ye vaijayyāḥ samare sūta labdhvā
devānapīndragramukhānsametāt |
tairmanmate kalahaṃ saṃprasahya
sa dhārtarāṣṭraḥ paśyata mohamasya

वृद्धो भीष्मः शान्तनवः कृपश्च
द्रोणः सपुत्रो विदुरश्च धीमान् ।
एते सर्वे यद्वदन्ते तदस्तु
आयुष्मन्तः कुरवः सन्तु सर्वे

vṛddho bhīṣmaḥ śāntanavaḥ kṛpaśca
droṇaḥ saputro viduraśca dhīmān |
ete sarve yadvadante tadastu
āyuṣmantaḥ kuravaḥ santu sarve