अध्याय 67: बृहस्पति का वसुमना को राजा की दिव्यता बताना

किमाहुर्दैवतं विप्रा राजानं भरतर्षभ ।
मनुष्याणामधिपतिं तन्मे ब्रूहि पितामह

kimāhurdaivataṃ viprā rājānaṃ bharatarṣabha |
manuṣyāṇāmadhipatiṃ tanme brūhi pitāmaha

अत्राप्युदाहरन्तीममितिहासं पुरातनम् ।
बृहस्पतिं वसुमना यथा पप्रच्छ भारत

atrāpyudāharantīmamitihāsaṃ purātanam |
bṛhaspatiṃ vasumanā yathā papraccha bhārata

राजा वसुमना नाम कौसल्यो धीमतां वरः ।
महर्षि किल पप्रच्छ कृतप्रज्ञं बृहस्पतिम्

rājā vasumanā nāma kausalyo dhīmatāṃ varaḥ |
maharṣi kila papraccha kṛtaprajñaṃ bṛhaspatim

सर्वं वैनयिकं कृत्वा विनयज्ञो बृहस्पतिम् ।
दक्षिणानन्तरो भूत्वा प्रणम्य विधिपूर्वकम्

sarvaṃ vainayikaṃ kṛtvā vinayajño bṛhaspatim |
dakṣiṇānantaro bhūtvā praṇamya vidhipūrvakam

विधिं पप्रच्छ राजस्य सर्वलोकहिते रतः ।
प्रजानां सुखमन्विच्छन्धर्मशीलं बृहस्पतिम्

vidhiṃ papraccha rājasya sarvalokahite rataḥ |
prajānāṃ sukhamanvicchandharmaśīlaṃ bṛhaspatim

केन भूतानि वर्धन्ते क्षयं गच्छन्ति केन वा ।
कमर्चन्तो महाप्राज्ञ सुखमव्ययमाप्नुयुः ॥
एतन्मे शंस देवर्षे धर्मकामार्थसंशयम्

kena bhūtāni vardhante kṣayaṃ gacchanti kena vā |
kamarcanto mahāprājña sukhamavyayamāpnuyuḥ ||
etanme śaṃsa devarṣe dharmakāmārthasaṃśayam

एवं पृष्टो महाप्राज्ञः कौसल्येनामितौजसा ।
राजसत्कारमव्यग्रो राज्यस्य च विवर्धनम् ।
दण्डनीतिं समाश्रित्य शशंसास्मै बृहस्पतिः

evaṃ pṛṣṭo mahāprājñaḥ kausalyenāmitaujasā |
rājasatkāramavyagro rājyasya ca vivardhanam |
daṇḍanītiṃ samāśritya śaśaṃsāsmai bṛhaspatiḥ

राजमूलो महाप्राज्ञ धर्मो लोकस्य लक्ष्यते ।
प्रजा राजभयादेव न खादन्ति परस्परम्

rājamūlo mahāprājña dharmo lokasya lakṣyate |
prajā rājabhayādeva na khādanti parasparam

राजा ह्येवाखिलं लोकं समुदीर्णं समुत्सुकम् ।
प्रसादयति धर्मेण प्रसाद्य च विराजते

rājā hyevākhilaṃ lokaṃ samudīrṇaṃ samutsukam |
prasādayati dharmeṇa prasādya ca virājate

यथा ह्यनुदये राजन्भूतानि शशिसूर्ययोः ।
अन्धे तमसि मज्जेयुरपश्यन्तः परस्परम्

yathā hyanudaye rājanbhūtāni śaśisūryayoḥ |
andhe tamasi majjeyurapaśyantaḥ parasparam

यथा ह्यनुदके मत्स्या निराक्रन्दे विहङ्गमाः ।
विहरेयुर्यथाकामं विहिंसन्तः पुनः पुनः

yathā hyanudake matsyā nirākrande vihaṅgamāḥ |
vihareyuryathākāmaṃ vihiṃsantaḥ punaḥ punaḥ

विमथ्यातिक्रमेरंश्च विषह्यापि परस्परम् ।
अभावमचिरेणैव गच्छेयुर्नात्र संशयः

vimathyātikrameraṃśca viṣahyāpi parasparam |
abhāvamacireṇaiva gaccheyurnātra saṃśayaḥ

एवमेव विना राज्ञा विनश्येयुरिमाः प्रजाः ।
अन्धे तमसि मज्जेयुरगोपाः पशवो यथा

evameva vinā rājñā vinaśyeyurimāḥ prajāḥ |
andhe tamasi majjeyuragopāḥ paśavo yathā

हरेयुर्बलवन्तोऽपि दुर्बलानां परिग्रहान् ।
हन्युर्व्यायच्छमानांश्च यदि राजा न पालयेत्

hareyurbalavanto'pi durbalānāṃ parigrahān |
hanyurvyāyacchamānāṃśca yadi rājā na pālayet

ममेदमिति लोकेऽस्मिन्न भवेत्स्वपरिग्रहः ।
न दारा न च पुत्रः स्यान्न धनं न परिग्रहः ।
विष्वग्लोपः प्रवर्तेत यदि राजा न पालयेत्

mamedamiti loke'sminna bhavetsvaparigrahaḥ |
na dārā na ca putraḥ syānna dhanaṃ na parigrahaḥ |
viṣvaglopaḥ pravarteta yadi rājā na pālayet

यानं वस्त्रमलङ्कारान्रत्नानि विविधानि च ।
हरेयुः सहसा पापा यदि राजा न पालयेत्

yānaṃ vastramalaṅkārānratnāni vividhāni ca |
hareyuḥ sahasā pāpā yadi rājā na pālayet

पतेद्बहुविधं शस्त्रं बहुधा धर्मचारिषु ।
अधर्मः प्रगृहीतः स्याद्यदि राजा न पालयेत्

patedbahuvidhaṃ śastraṃ bahudhā dharmacāriṣu |
adharmaḥ pragṛhītaḥ syādyadi rājā na pālayet

मातरं पितरं वृद्धमाचार्यमतिथिं गुरुम् ।
क्लिश्नीयुरपि हिंस्युर्वा यदि राजा न पालयेत्

mātaraṃ pitaraṃ vṛddhamācāryamatithiṃ gurum |
kliśnīyurapi hiṃsyurvā yadi rājā na pālayet

अन्यांश्च क्रोशतो हिंस्युर्लोकोऽयं दस्युवद्भवेत् ।
वधबन्धपरिक्लेशो नित्यमर्थवतां भवेत् ।
ममत्वं च न विन्देयुर्यदि राजा न पालयेत्

anyāṃśca krośato hiṃsyurloko'yaṃ dasyuvadbhavet |
vadhabandhaparikleśo nityamarthavatāṃ bhavet |
mamatvaṃ ca na vindeyuryadi rājā na pālayet

अन्ताश्चाकाल एव स्युर्लोकोऽयं दस्युसाद्भवेत् ।
पतेद्बहुविधं राज्यं यदि राजा न पालयेत्

antāścākāla eva syurloko'yaṃ dasyusādbhavet |
patedbahuvidhaṃ rājyaṃ yadi rājā na pālayet

न योनिदोषो वर्तेत न कृषिर्न वणिक्पथः ।
मज्जेद्धर्मस्त्रयी न स्याद्यदि राजा न पालयेत्

na yonidoṣo varteta na kṛṣirna vaṇikpathaḥ |
majjeddharmastrayī na syādyadi rājā na pālayet

न यज्ञाः संप्रवर्तेयुर्विधिवत्स्वाप्तदक्षिणाः ।
न विवाहाः समाजो वा यदि राजा न पालयेत्

na yajñāḥ saṃpravarteyurvidhivatsvāptadakṣiṇāḥ |
na vivāhāḥ samājo vā yadi rājā na pālayet

न वृषाः संप्रवर्तेरन्न मथ्येरंश्च गर्गराः ।
घोषाः प्रणाशं गच्छेयुर्यदि राजा न पालयेत्

na vṛṣāḥ saṃpravarteranna mathyeraṃśca gargarāḥ |
ghoṣāḥ praṇāśaṃ gaccheyuryadi rājā na pālayet

त्रस्तमुद्विग्नहृदयं हाहाभूतमचेतनम् ।
क्षणेन विनशेत्सर्वं यदि राजा न पालयेत्

trastamudvignahṛdayaṃ hāhābhūtamacetanam |
kṣaṇena vinaśetsarvaṃ yadi rājā na pālayet

न संवत्सरसत्राणि तिष्ठेयुरकुतोभयाः ।
विधिवद्दक्षिणावन्ति यदि राजा न पालयेत्

na saṃvatsarasatrāṇi tiṣṭheyurakutobhayāḥ |
vidhivaddakṣiṇāvanti yadi rājā na pālayet

ब्राह्मणाश्चतुरो वेदान्नाधीयीरंस्तपस्विनः ।
विद्यास्नाता व्रतस्नाता यदि राजा न पालयेत्

brāhmaṇāścaturo vedānnādhīyīraṃstapasvinaḥ |
vidyāsnātā vratasnātā yadi rājā na pālayet

न भवेद्धर्मसंसेवी मोहविप्रहतो जनः ।
हर्ता स्वच्छेन्द्रियो गच्छेद्यदि राजा न पालयेत्

na bhaveddharmasaṃsevī mohaviprahato janaḥ |
hartā svacchendriyo gacchedyadi rājā na pālayet

हस्ताद्धस्तं परिमुषेद्भिद्येरन्सर्वसेतवः ।
भयार्तं विद्रवेत्सर्वं यदि राजा न पालयेत्

hastāddhastaṃ parimuṣedbhidyeransarvasetavaḥ |
bhayārtaṃ vidravetsarvaṃ yadi rājā na pālayet

अनयाः संप्रवपर्तेरन्भवेद्वै वर्णसङ्करः ।
दुर्भिक्षमाविशेद्राष्ट्रं यदि राजा न पालयेत्

anayāḥ saṃpravaparteranbhavedvai varṇasaṅkaraḥ |
durbhikṣamāviśedrāṣṭraṃ yadi rājā na pālayet

विवृत्य हि यथाकामं गृहद्वाराणि शेरते ।
मनुष्या रक्षिता राज्ञा समन्तादकुतोभयाः

vivṛtya hi yathākāmaṃ gṛhadvārāṇi śerate |
manuṣyā rakṣitā rājñā samantādakutobhayāḥ

नाक्रुष्टं सहते कश्चित्कुतो वा हस्तलाघवम् ।
यदि राजा न सम्यग्गां रक्षयत्यपि धार्मिकः

nākruṣṭaṃ sahate kaścitkuto vā hastalāghavam |
yadi rājā na samyaggāṃ rakṣayatyapi dhārmikaḥ

स्त्रियश्चापुरुषा मार्गं सर्वालङ्कारभूषिताः ।
निर्भयाः प्रतिपद्यन्ते यदि रक्षति भूमिपः

striyaścāpuruṣā mārgaṃ sarvālaṅkārabhūṣitāḥ |
nirbhayāḥ pratipadyante yadi rakṣati bhūmipaḥ

धर्ममेव प्रपद्यन्ते न हिंसन्ति परस्परम् ।
अनुगृह्णन्ति चान्योन्यं यदा रक्षति भूमिपः

dharmameva prapadyante na hiṃsanti parasparam |
anugṛhṇanti cānyonyaṃ yadā rakṣati bhūmipaḥ

यजन्ते च महायज्ञैस्त्रयो वर्णाः पृथग्विधैः ।
युक्ताश्चाधीयते विद्यां यदा रक्षति भूमिपः

yajante ca mahāyajñaistrayo varṇāḥ pṛthagvidhaiḥ |
yuktāścādhīyate vidyāṃ yadā rakṣati bhūmipaḥ

वार्तामूलो ह्ययं लोकस्तया वै धार्यते सदा ।
तत्सर्वं वर्तते सम्यग्यदा रक्षति भूमिपः

vārtāmūlo hyayaṃ lokastayā vai dhāryate sadā |
tatsarvaṃ vartate samyagyadā rakṣati bhūmipaḥ

यदा राजा धुरं श्रेष्ठामादाय वहति प्रजाः ।
महता बलयोगेन तदा लोकः प्रसीदयि

yadā rājā dhuraṃ śreṣṭhāmādāya vahati prajāḥ |
mahatā balayogena tadā lokaḥ prasīdayi

यस्याभावेन भूतानामभावः स्यात्समन्ततः ।
भावे च भावो नित्यं स्यात्कस्तं न प्रतिपूजयेत्

yasyābhāvena bhūtānāmabhāvaḥ syātsamantataḥ |
bhāve ca bhāvo nityaṃ syātkastaṃ na pratipūjayet

तस्य यो वहते भारं सर्वलोकसुखावहम् ।
तिष्ठन्प्रियहिते राज्ञ उभौ लोकाविमौ जयेत्

tasya yo vahate bhāraṃ sarvalokasukhāvaham |
tiṣṭhanpriyahite rājña ubhau lokāvimau jayet

यस्तस्य पुरुषः पापं मनसाऽप्यनुचिन्तयेत् ।
असंशयमिह क्लिष्टः प्रेत्यापि नरकं व्रजेत्

yastasya puruṣaḥ pāpaṃ manasā'pyanucintayet |
asaṃśayamiha kliṣṭaḥ pretyāpi narakaṃ vrajet

न हि जात्ववमन्तव्यो मनुष्य इति भूमिपः ।
महती देवता ह्येषा नररूपेण तिष्ठति

na hi jātvavamantavyo manuṣya iti bhūmipaḥ |
mahatī devatā hyeṣā nararūpeṇa tiṣṭhati

कुरुते पञ्चरूपाणि कालयुक्तानि यः सदा ।
भवत्यग्निस्तथाऽऽदित्यो मृत्युर्वैश्रवणो यमः

kurute pañcarūpāṇi kālayuktāni yaḥ sadā |
bhavatyagnistathā''dityo mṛtyurvaiśravaṇo yamaḥ

यदा ह्यासीदतः पापान्दहत्युग्रेण तेजसा ।
मिथ्योपचरितो राजा तदा भवति पावकः

yadā hyāsīdataḥ pāpāndahatyugreṇa tejasā |
mithyopacarito rājā tadā bhavati pāvakaḥ

यदा पश्यति चारेण सर्वभूतानि भूमिपः ।
क्षेमं च कृत्वा व्रजति तदा भवति भास्करः

yadā paśyati cāreṇa sarvabhūtāni bhūmipaḥ |
kṣemaṃ ca kṛtvā vrajati tadā bhavati bhāskaraḥ

अशुचींश्च यदा क्रुद्धः क्षिणोति शतशो नरान् ।
सपुत्रपौत्रान्सामात्यांस्तदा भवति सोन्तकः

aśucīṃśca yadā kruddhaḥ kṣiṇoti śataśo narān |
saputrapautrānsāmātyāṃstadā bhavati sontakaḥ

यदा त्वधार्मिकान्सर्वांस्तीक्ष्णैर्दण्‍डैर्नियच्छति ।
धार्मिकांश्चानुगृह्णाति भवत्यथ यमस्तदा

yadā tvadhārmikānsarvāṃstīkṣṇairdaṇ‍ḍairniyacchati |
dhārmikāṃścānugṛhṇāti bhavatyatha yamastadā

यदा तु धनधाराभिस्तर्पयत्युपकारिणः ।
आच्छिनत्ति च रत्नानि विविधान्यपकारिणां

yadā tu dhanadhārābhistarpayatyupakāriṇaḥ |
ācchinatti ca ratnāni vividhānyapakāriṇāṃ

श्रियं ददाति कस्मैचित्कस्माच्चिदपकर्षति ।
तदा वैश्रवणो राजा लोके भवति भूमिपः

śriyaṃ dadāti kasmaicitkasmāccidapakarṣati |
tadā vaiśravaṇo rājā loke bhavati bhūmipaḥ

नास्यापवादे स्थातव्यं दक्षेणाक्लिष्टकर्मणा ।
धर्ममाकाङ्क्षता लोके ईश्वरस्यानसूयता

nāsyāpavāde sthātavyaṃ dakṣeṇākliṣṭakarmaṇā |
dharmamākāṅkṣatā loke īśvarasyānasūyatā

न हि राज्ञः प्रतीपानि कुर्वन्सुखमवाप्नुयात् ।
पुत्रो भ्राता वयस्यो वा यद्यप्यात्मसमो भवेत्

na hi rājñaḥ pratīpāni kurvansukhamavāpnuyāt |
putro bhrātā vayasyo vā yadyapyātmasamo bhavet

कुर्यात्कृष्णगतिः शेषं ज्वलितोऽनिलसारथिः ।
न तु राज्ञाऽभिपन्नस्य शेषं क्वचन विद्यते

kuryātkṛṣṇagatiḥ śeṣaṃ jvalito'nilasārathiḥ |
na tu rājñā'bhipannasya śeṣaṃ kvacana vidyate

तस्य सर्वाणि रक्ष्याणि दूरतः परिवर्जयेत् ।
मृत्योरिव जुगुप्सेत राजस्वहरणान्नरः

tasya sarvāṇi rakṣyāṇi dūrataḥ parivarjayet |
mṛtyoriva jugupseta rājasvaharaṇānnaraḥ

वध्येतभिमृशन्सद्यो मृगः कूटमिव स्पृशन् ।
आत्मस्वमिव संरक्षेद्राजस्वमिह बुद्धिमान्

vadhyetabhimṛśansadyo mṛgaḥ kūṭamiva spṛśan |
ātmasvamiva saṃrakṣedrājasvamiha buddhimān

महान्तं नरकं घोरमप्रतिष्ठमचेतसः ।
पतन्ति चिररात्राय राजवित्तापहारिणः

mahāntaṃ narakaṃ ghoramapratiṣṭhamacetasaḥ |
patanti cirarātrāya rājavittāpahāriṇaḥ

राजा भोजो विराट् सम्राट् क्षत्रियो भूपतिर्नृपः ।
य एभिः स्तूयते शब्दैः कस्तं नार्चितुमर्हति

rājā bhojo virāṭ samrāṭ kṣatriyo bhūpatirnṛpaḥ |
ya ebhiḥ stūyate śabdaiḥ kastaṃ nārcitumarhati

तस्माद्बुभूषुर्नियतो जितात्मा संयतेन्द्रियः ।
मेधावी धृतिमान्दक्षः संश्रयेत् महीपतिम्

tasmādbubhūṣurniyato jitātmā saṃyatendriyaḥ |
medhāvī dhṛtimāndakṣaḥ saṃśrayet mahīpatim

कृतज्ञं प्राज्ञमक्षुद्रं दृढभक्तिं जितेन्द्रियम् ।
धर्मनित्यं स्थितं स्थाने मन्त्रिणं पूजयेन्नृपः

kṛtajñaṃ prājñamakṣudraṃ dṛḍhabhaktiṃ jitendriyam |
dharmanityaṃ sthitaṃ sthāne mantriṇaṃ pūjayennṛpaḥ

दृढभक्तिं कृतप्रज्ञं धर्मज्ञं संयतेन्द्रियम् ।
शूरमक्षुद्रकर्माणं प्रसिद्धं जनमाश्रयेत्

dṛḍhabhaktiṃ kṛtaprajñaṃ dharmajñaṃ saṃyatendriyam |
śūramakṣudrakarmāṇaṃ prasiddhaṃ janamāśrayet

राजा प्रगल्भं पुरुषं करोति
राजा भृशं बृंहयते मनुष्यम् ।
राजाभिपन्नस्य कुतः सुखानि
राजाऽभ्युपेतं सुखिनं करोति

rājā pragalbhaṃ puruṣaṃ karoti
rājā bhṛśaṃ bṛṃhayate manuṣyam |
rājābhipannasya kutaḥ sukhāni
rājā'bhyupetaṃ sukhinaṃ karoti

राजा प्रजानां प्रथमं शरीरं
प्रजाश्च राज्ञोऽप्रतिमं शरीरम् ।
राज्ञा विहीना न भवन्ति देशा
देशैर्विहीना न नृपा भवन्ति

rājā prajānāṃ prathamaṃ śarīraṃ
prajāśca rājño'pratimaṃ śarīram |
rājñā vihīnā na bhavanti deśā
deśairvihīnā na nṛpā bhavanti

राजा प्रजानां हृदयं गरीयो
गतिः प्रतिष्ठा सुखमुत्तमं च ।
समाश्रिता लोकमिमं परं च
जयन्ति सम्यक्पुरुषा नरेन्द्र

rājā prajānāṃ hṛdayaṃ garīyo
gatiḥ pratiṣṭhā sukhamuttamaṃ ca |
samāśritā lokamimaṃ paraṃ ca
jayanti samyakpuruṣā narendra

नराधिपश्चाप्यनुशिष्य मेदिनीं
दमेन सत्येन च सौहृदेन ।
महद्भिरिष्ट्वा क्रतुभिर्महायशा
स्त्रिविष्टपे स्थानमुपैति शाश्वतम्

narādhipaścāpyanuśiṣya medinīṃ
damena satyena ca sauhṛdena |
mahadbhiriṣṭvā kratubhirmahāyaśā
striviṣṭape sthānamupaiti śāśvatam

स एवमुक्तोऽङ्गिरसा कौसल्यो राजसत्तमः ।
प्रयत्नात्कृतवान्वीरः प्रजापालनमुत्तमम्

sa evamukto'ṅgirasā kausalyo rājasattamaḥ |
prayatnātkṛtavānvīraḥ prajāpālanamuttamam