अध्याय 24: हर्षनाद के साथ सेनाएँ भिड़ती हैं

केषां प्रहृष्टास्तत्राग्रे योधा युध्यन्ति सञ्जय ।
उदग्रमनसः के वा के वा दीना विचेतसः

keṣāṃ prahṛṣṭāstatrāgre yodhā yudhyanti sañjaya |
udagramanasaḥ ke vā ke vā dīnā vicetasaḥ

के पूर्वं प्राहरंस्तत्र युद्धे हृदयकम्पने ।
मामकाः पाण्डवेया वा तन्ममाचक्ष्व सञ्जय

ke pūrvaṃ prāharaṃstatra yuddhe hṛdayakampane |
māmakāḥ pāṇḍaveyā vā tanmamācakṣva sañjaya

कस्य सेनासमुदये गन्धो माल्यसमुद्भवः ।
वायुः प्रदक्षिणश्चैव योधानामभिगर्जताम्

kasya senāsamudaye gandho mālyasamudbhavaḥ |
vāyuḥ pradakṣiṇaścaiva yodhānāmabhigarjatām

उभयोः सेनयोस्तत्र योधा जहृषिरे तदा ।
स्रजः समाः सुगन्धानामुभयत्र समुद्भवः

ubhayoḥ senayostatra yodhā jahṛṣire tadā |
srajaḥ samāḥ sugandhānāmubhayatra samudbhavaḥ

संहतानामनीकानां व्यूढानां भरतर्षभ ।
संसर्गात्समुदीर्णानां विमर्दः सुमहानभूत्

saṃhatānāmanīkānāṃ vyūḍhānāṃ bharatarṣabha |
saṃsargātsamudīrṇānāṃ vimardaḥ sumahānabhūt

वादित्रशब्दस्तुमुलः शङ्खभेरीविमिश्रितः ।
शूराणां रणशूराणां गर्जतामितरेतरम्

vāditraśabdastumulaḥ śaṅkhabherīvimiśritaḥ |
śūrāṇāṃ raṇaśūrāṇāṃ garjatāmitaretaram

उभयोः सेनयो राजन्महान्व्यतिकरोऽभवत् ।
अन्योन्यं वीक्षमाणानां योधानां भरतर्षभ ।
कुञ्जराणां च नदतां सैन्यानां च प्रहृष्यताम्

ubhayoḥ senayo rājanmahānvyatikaro'bhavat |
anyonyaṃ vīkṣamāṇānāṃ yodhānāṃ bharatarṣabha |
kuñjarāṇāṃ ca nadatāṃ sainyānāṃ ca prahṛṣyatām