अध्याय 47: ऋषि तण्डि की महादेव-स्तुति

ऋषिरासीत्कृते तात तण्डिरित्येव विश्रुतः ।
दशवर्षसहस्राणि तेन देवः समाधिना

ṛṣirāsītkṛte tāta taṇḍirityeva viśrutaḥ |
daśavarṣasahasrāṇi tena devaḥ samādhinā

आराधितोऽभूद्भक्तेन तस्योदर्कं निशामय ।
स दृष्टवान्महादेवमस्तौषीच्च स्तवैर्विभुम्

ārādhito'bhūdbhaktena tasyodarkaṃ niśāmaya |
sa dṛṣṭavānmahādevamastauṣīcca stavairvibhum

[इति तण्डिस्तपोयोगात्परमात्मानमव्ययम् ।
चिन्तयित्वा महात्मानमिदमाह सुविस्मितः

[iti taṇḍistapoyogātparamātmānamavyayam |
cintayitvā mahātmānamidamāha suvismitaḥ

यं पठन्ति सदा साङ्ख्याश्चिन्तयन्ति च योगिनः ।
परं प्रधानं पुरुषमधिष्ठातारमीश्वरम् ।

yaṃ paṭhanti sadā sāṅkhyāścintayanti ca yoginaḥ |
paraṃ pradhānaṃ puruṣamadhiṣṭhātāramīśvaram |

उत्पत्तौ च विनाशे च कारणं यं विदुर्बुधाः ।
देवासुरमुनीनां च परं यस्मान्न विद्यते

utpattau ca vināśe ca kāraṇaṃ yaṃ vidurbudhāḥ |
devāsuramunīnāṃ ca paraṃ yasmānna vidyate

अजं तमहमीशानमनादिनिधनं प्रभुम् ।
अत्यन्तसुखिनं देवमनघं शरणं व्रजे

ajaṃ tamahamīśānamanādinidhanaṃ prabhum |
atyantasukhinaṃ devamanaghaṃ śaraṇaṃ vraje

एवं ब्रुवन्नेव तदा ददर्श तपसान्निधिम् ।
तमव्ययमनौपम्यमचिन्त्यं शाश्वतं ध्रुवम्

evaṃ bruvanneva tadā dadarśa tapasānnidhim |
tamavyayamanaupamyamacintyaṃ śāśvataṃ dhruvam

निष्कलं सकलं ब्रह्म निर्गुणं गुणगोचरम् ।
योगिनां परमानन्दमक्षरं मोक्षसंज्ञितम्

niṣkalaṃ sakalaṃ brahma nirguṇaṃ guṇagocaram |
yogināṃ paramānandamakṣaraṃ mokṣasaṃjñitam

मनोरिन्द्राग्निमरुतां विश्वस्य ब्रह्मणो गतिम्‌ ।
अग्राह्यमचलं शुद्धं बुद्धिग्राह्यं मनोमयम्

manorindrāgnimarutāṃ viśvasya brahmaṇo gatim‌ |
agrāhyamacalaṃ śuddhaṃ buddhigrāhyaṃ manomayam

दुर्विज्ञेयमसङ्ख्ये दुष्प्रापमकृतात्मभिः ।
योनि विश्वस्य जगतस्तमसः परतः परम्

durvijñeyamasaṅkhye duṣprāpamakṛtātmabhiḥ |
yoni viśvasya jagatastamasaḥ parataḥ param

यः प्राणवन्तमात्मानं ज्योतिर्जीवस्थितं मनः ।
तं देवं दर्शनाकाङ्क्षी बहून्वर्षगणानृषिः ।
तपस्युग्रे स्थितो भूत्वा दृष्ट्वा तुष्टाव चेश्वरम् ॥]

yaḥ prāṇavantamātmānaṃ jyotirjīvasthitaṃ manaḥ |
taṃ devaṃ darśanākāṅkṣī bahūnvarṣagaṇānṛṣiḥ |
tapasyugre sthito bhūtvā dṛṣṭvā tuṣṭāva ceśvaram ||]

पवित्राणां पवित्रस्त्वं गतिर्गतिमतांवर

pavitrāṇāṃ pavitrastvaṃ gatirgatimatāṃvara

अत्युग्रं तेजसां तेजस्तपसां परमं तपः ।
विश्वावसुहिरण्याक्षपुरुहूतनमस्तृत

atyugraṃ tejasāṃ tejastapasāṃ paramaṃ tapaḥ |
viśvāvasuhiraṇyākṣapuruhūtanamastṛta

भूरिकल्याणद विभो परं सत्यं नमोस्तु ते ।
जातीमरणभीरूणां यतीनां यततां विभो

bhūrikalyāṇada vibho paraṃ satyaṃ namostu te |
jātīmaraṇabhīrūṇāṃ yatīnāṃ yatatāṃ vibho

निर्वाणद सहस्रांशो नमस्तेऽस्तु सुखाश्रय ।
ब्रह्मा शतक्रतुर्विष्णुर्विश्वेदेवा महर्षयः

nirvāṇada sahasrāṃśo namaste'stu sukhāśraya |
brahmā śatakraturviṣṇurviśvedevā maharṣayaḥ

न विदुस्त्वां तु तत्त्वेन कुतो वेत्स्यामहे वयम् ।
त्वत्तः प्रवर्तते सर्वं त्वयि सर्वं प्रतिष्ठितम्

na vidustvāṃ tu tattvena kuto vetsyāmahe vayam |
tvattaḥ pravartate sarvaṃ tvayi sarvaṃ pratiṣṭhitam

कालाख्यः पुरुषाख्यश्च ब्रह्माख्यश्च त्वमेव हि ।
तनवस्ते स्मृतास्तिस्रः पुराणज्ञैः सुरर्षिभिः

kālākhyaḥ puruṣākhyaśca brahmākhyaśca tvameva hi |
tanavaste smṛtāstisraḥ purāṇajñaiḥ surarṣibhiḥ

अधिपौरुषमध्यात्ममधिभूताधिदैवतम् ।
अधिलोकाधिविज्ञानमधियज्ञस्त्वमेव हि

adhipauruṣamadhyātmamadhibhūtādhidaivatam |
adhilokādhivijñānamadhiyajñastvameva hi

त्वां विदित्वाऽऽत्मदेवस्थं दुर्विदं दैवतैरपि ।
विद्वांसो यान्ति निर्मुक्ताः परं भावमनामयम्

tvāṃ viditvā''tmadevasthaṃ durvidaṃ daivatairapi |
vidvāṃso yānti nirmuktāḥ paraṃ bhāvamanāmayam

अनिच्छतस्तव विभो जन्ममृत्युरनेकतः ।
द्वारं तु स्वर्गमोक्षाणामाक्षेप्ता त्वं ददासि च

anicchatastava vibho janmamṛtyuranekataḥ |
dvāraṃ tu svargamokṣāṇāmākṣeptā tvaṃ dadāsi ca

त्वं वै स्वर्गश्च मोक्षश्च कामः क्रोधस्त्वमेव च ।
सत्वं रजस्ममश्चैव अधश्चोर्ध्वं त्वमेव हि

tvaṃ vai svargaśca mokṣaśca kāmaḥ krodhastvameva ca |
satvaṃ rajasmamaścaiva adhaścordhvaṃ tvameva hi

ब्रह्मा भवश्च विष्णुश्च स्कन्देन्द्रौ सविता यमः ।
वरुणेन्दू मनुर्धाता विधाता त्वं धनेश्वरः

brahmā bhavaśca viṣṇuśca skandendrau savitā yamaḥ |
varuṇendū manurdhātā vidhātā tvaṃ dhaneśvaraḥ

भूर्वायुः सलिलाग्निश्च खं वाग्बुद्धिः स्थितिर्मतिः ।
कर्म सत्यानृते चोभे त्वमेवास्ति च नास्ति च

bhūrvāyuḥ salilāgniśca khaṃ vāgbuddhiḥ sthitirmatiḥ |
karma satyānṛte cobhe tvamevāsti ca nāsti ca

इन्द्रियाणीन्द्रियार्थाश्च प्रकृतिभ्यः परं ध्रुवम् ।
विश्वाविश्वपरो भावश्चिन्त्याचिन्त्यस्त्वमेव हि

indriyāṇīndriyārthāśca prakṛtibhyaḥ paraṃ dhruvam |
viśvāviśvaparo bhāvaścintyācintyastvameva hi

यच्चैतत्परमं ब्रह्म यच्च तत्परमं पदम् ।
या गतिः साङ्ख्ययोगानां स भवान्नात्र संशयः

yaccaitatparamaṃ brahma yacca tatparamaṃ padam |
yā gatiḥ sāṅkhyayogānāṃ sa bhavānnātra saṃśayaḥ

नूनमद्य कृतार्थाः स्म नूनं प्राप्ताः सतां गतिम् ।
यां गतिं प्रार्तयन्तीह ज्ञाननिर्मलबुद्धयः

nūnamadya kṛtārthāḥ sma nūnaṃ prāptāḥ satāṃ gatim |
yāṃ gatiṃ prārtayantīha jñānanirmalabuddhayaḥ

अयो मूढाः स्म सुचिरमिमं कालमचेतसा ।
यन्न विद्मः परं देवं शाश्वतं यं विदुर्बुधाः

ayo mūḍhāḥ sma suciramimaṃ kālamacetasā |
yanna vidmaḥ paraṃ devaṃ śāśvataṃ yaṃ vidurbudhāḥ

सेयमासादिता साक्षात्त्वद्भक्तिर्जन्मभिर्मया ।
भक्तानुग्रहकृद्देवो यं ज्ञात्वाऽमृतमश्नुते

seyamāsāditā sākṣāttvadbhaktirjanmabhirmayā |
bhaktānugrahakṛddevo yaṃ jñātvā'mṛtamaśnute

देवासुरमुनीनां तु यच्च गुह्यं सनातनम् ।
गुहायां निहितं ब्रह्मि दुर्विज्ञेयं मुनेरपि

devāsuramunīnāṃ tu yacca guhyaṃ sanātanam |
guhāyāṃ nihitaṃ brahmi durvijñeyaṃ munerapi

स एष भगवान्देवः सर्वकृत्सर्वतोमुखः ।
सर्वात्मा सर्वदर्शी च सर्वगः सर्ववेदिता

sa eṣa bhagavāndevaḥ sarvakṛtsarvatomukhaḥ |
sarvātmā sarvadarśī ca sarvagaḥ sarvaveditā

देहकृद्देहभृद्देही देहभुग्देहिनां गतिः ।
प्राणकृत्प्राणभृत्प्राणी प्राणदः प्राणिनां गतिः

dehakṛddehabhṛddehī dehabhugdehināṃ gatiḥ |
prāṇakṛtprāṇabhṛtprāṇī prāṇadaḥ prāṇināṃ gatiḥ

अध्यात्मगतिरिष्टानां ध्यायिनामात्मवेदिनाम् ।
अपुनर्भवकामानां या गतिः सोऽयमीश्वरः

adhyātmagatiriṣṭānāṃ dhyāyināmātmavedinām |
apunarbhavakāmānāṃ yā gatiḥ so'yamīśvaraḥ

अयं च सर्वभूतानां शुभाशुभगतिप्रदः ।
अयं च जन्ममरणे विदध्यात्सर्वजन्तुषु ।
अयं संसिद्धिकामानां या गतिः सोयमीस्वरः ।

ayaṃ ca sarvabhūtānāṃ śubhāśubhagatipradaḥ |
ayaṃ ca janmamaraṇe vidadhyātsarvajantuṣu |
ayaṃ saṃsiddhikāmānāṃ yā gatiḥ soyamīsvaraḥ |

भूराद्यान्सर्वभुवनानुत्पाद्य सदिवौकसः ।
दधाति देवस्तनुभिरष्टाभिर्यो बिभर्ति च

bhūrādyānsarvabhuvanānutpādya sadivaukasaḥ |
dadhāti devastanubhiraṣṭābhiryo bibharti ca

अतः प्रवर्तते सर्वमस्मिन्सर्वं प्रतिष्ठितम् ।
अस्मिंश्च प्रलयं याति अयमेकः सनातनः

ataḥ pravartate sarvamasminsarvaṃ pratiṣṭhitam |
asmiṃśca pralayaṃ yāti ayamekaḥ sanātanaḥ

अयं स सत्यकामानां सत्यलोकः परं सताम् ।
अपवर्गश्च मुक्तानां कैवल्यं चात्मवेदिनाम्

ayaṃ sa satyakāmānāṃ satyalokaḥ paraṃ satām |
apavargaśca muktānāṃ kaivalyaṃ cātmavedinām

अयं ब्रह्मादिभिः सिद्धैर्गुहायां गोपितः प्रुभुः ।
देवासुरमनुष्याणामप्रकाशो भवेदिति

ayaṃ brahmādibhiḥ siddhairguhāyāṃ gopitaḥ prubhuḥ |
devāsuramanuṣyāṇāmaprakāśo bhavediti

तं त्वां देवासुरनरास्तत्त्वेन न विदुर्भवम् ।
मोहिताः खल्वनेनैव हृदिस्थेनाप्रकाशिना

taṃ tvāṃ devāsuranarāstattvena na vidurbhavam |
mohitāḥ khalvanenaiva hṛdisthenāprakāśinā

ये चैनं प्रतिपद्यन्ते भक्तियोगेन भाविताः ।
तेषामेवात्मनात्मानं दर्शयत्येष हृच्छयः

ye cainaṃ pratipadyante bhaktiyogena bhāvitāḥ |
teṣāmevātmanātmānaṃ darśayatyeṣa hṛcchayaḥ

यं ज्ञात्वा न पुनर्जन्म मरणं चापि विद्यते ।
यं विदित्वा परं वेद्यं वेदितव्यं न विद्यते

yaṃ jñātvā na punarjanma maraṇaṃ cāpi vidyate |
yaṃ viditvā paraṃ vedyaṃ veditavyaṃ na vidyate

यं लब्ध्वा परमं लाभं नाधिकं मन्यते बुधः ।
यां सूक्ष्मां परमां प्राप्तिं गच्छन्नव्ययमक्षयम्

yaṃ labdhvā paramaṃ lābhaṃ nādhikaṃ manyate budhaḥ |
yāṃ sūkṣmāṃ paramāṃ prāptiṃ gacchannavyayamakṣayam

यं साङ्ख्या गुणतत्त्वज्ञाः साङ्ख्यशास्त्रविशारदाः ।
सूक्ष्मज्ञानतराः सूक्ष्मं ज्ञात्वा मुच्यन्ति बन्धनैः

yaṃ sāṅkhyā guṇatattvajñāḥ sāṅkhyaśāstraviśāradāḥ |
sūkṣmajñānatarāḥ sūkṣmaṃ jñātvā mucyanti bandhanaiḥ

यं च वेदविदो वेद्यं वेदान्ते च प्रतिष्ठितम् ।
प्राणायामपरा नित्यं यं विशन्ति जपन्ति च

yaṃ ca vedavido vedyaṃ vedānte ca pratiṣṭhitam |
prāṇāyāmaparā nityaṃ yaṃ viśanti japanti ca

ओंकाररथमारुह्य ते विशन्ति महेश्वरम् ।
अयं स देवयानानामादित्यो द्वारमुच्यते

oṃkārarathamāruhya te viśanti maheśvaram |
ayaṃ sa devayānānāmādityo dvāramucyate

अयं च पितृयानानां चन्द्रमा द्वारमुच्यते ।
एष काष्ठा दिशश्चैव संवत्सरयुगादि च

ayaṃ ca pitṛyānānāṃ candramā dvāramucyate |
eṣa kāṣṭhā diśaścaiva saṃvatsarayugādi ca

दिव्यादिव्यः परो लाभ अयने दक्षिणोत्तरे ।
एनं प्रजापतिः पूर्वमाराध्य बहुभिः स्तवैः

divyādivyaḥ paro lābha ayane dakṣiṇottare |
enaṃ prajāpatiḥ pūrvamārādhya bahubhiḥ stavaiḥ

प्रजार्थं वरयामास नीललोहितसंज्ञितम् ।
क्रग्भिर्यमनुशासन्ति तत्त्वे कर्मणि बह्वृचाः

prajārthaṃ varayāmāsa nīlalohitasaṃjñitam |
kragbhiryamanuśāsanti tattve karmaṇi bahvṛcāḥ

यजुर्भिर्यत्त्रिधा वेद्यं जुह्वत्यध्वर्यवोऽध्वरे ।
सामभिर्यं च गायन्ति सामगाः शुद्धबुद्धयः

yajurbhiryattridhā vedyaṃ juhvatyadhvaryavo'dhvare |
sāmabhiryaṃ ca gāyanti sāmagāḥ śuddhabuddhayaḥ

ऋतं सत्यं परं ब्रह्म स्तुवन्त्याथर्वणा द्विजाः ।
यज्ञस्य परमा योनिः परिश्चायं परः स्मृतः

ṛtaṃ satyaṃ paraṃ brahma stuvantyātharvaṇā dvijāḥ |
yajñasya paramā yoniḥ pariścāyaṃ paraḥ smṛtaḥ

रात्र्यहः श्रोत्रनयनः पक्षमासशिरोभुजः ।
ऋतुवीर्यस्तपोधैर्यो ह्यब्दगुह्योरुपादवान्

rātryahaḥ śrotranayanaḥ pakṣamāsaśirobhujaḥ |
ṛtuvīryastapodhairyo hyabdaguhyorupādavān

मृत्युर्यमो हुताशश्च कालः संहारवेगवान् ।
कालस्य परमा योनिः कालश्चायं सनातनः

mṛtyuryamo hutāśaśca kālaḥ saṃhāravegavān |
kālasya paramā yoniḥ kālaścāyaṃ sanātanaḥ

चन्द्रादित्यौ सनक्षत्रौ ग्रहाश्च सह वायुना ।
ध्रुवः सप्तर्षयश्चैव भुवनाः सप्त एव च

candrādityau sanakṣatrau grahāśca saha vāyunā |
dhruvaḥ saptarṣayaścaiva bhuvanāḥ sapta eva ca

प्रधानं महदव्यक्तं विशेषान्तं सवैकृतम् ।
ब्रह्मादिस्तम्बपर्यन्तं भूतादि सदसच्च यत्

pradhānaṃ mahadavyaktaṃ viśeṣāntaṃ savaikṛtam |
brahmādistambaparyantaṃ bhūtādi sadasacca yat

अष्टौ प्रकृतयश्चैव प्रकृतिभ्यश्च यः परः ।
अस्य देवस्य यद्भागं कृत्स्नं सम्परिवर्तते

aṣṭau prakṛtayaścaiva prakṛtibhyaśca yaḥ paraḥ |
asya devasya yadbhāgaṃ kṛtsnaṃ samparivartate

एतत्परममानन्दं यत्तच्छाश्वतमेव च ।
एषा गतिर्विरक्तानामेष भावः परः सताम्

etatparamamānandaṃ yattacchāśvatameva ca |
eṣā gatirviraktānāmeṣa bhāvaḥ paraḥ satām

एतत्पदमनुद्विग्नमेतद्ब्रह्म सनातनम् ।
शास्त्रवेदाङ्गविदुषामेतद्ध्यानं परं पदम्

etatpadamanudvignametadbrahma sanātanam |
śāstravedāṅgaviduṣāmetaddhyānaṃ paraṃ padam

इयं सा परमा काष्ठा इयं सा परमा कला ।
इयं सा परमा सिद्धिरियं सा परमा गतिः

iyaṃ sā paramā kāṣṭhā iyaṃ sā paramā kalā |
iyaṃ sā paramā siddhiriyaṃ sā paramā gatiḥ

इयं सा परमा शान्तिरियं सा निर्वृतिः परा ।
यं प्राप्य कृतकृत्याः स्म इत्यमन्यन्त योगिनः

iyaṃ sā paramā śāntiriyaṃ sā nirvṛtiḥ parā |
yaṃ prāpya kṛtakṛtyāḥ sma ityamanyanta yoginaḥ

इयं तुष्टिरियं सिद्धिरियं श्रुतिरियं स्मृतिः ।
अध्यात्मगतिरिष्टानां विदुषां प्राप्तिरव्यया

iyaṃ tuṣṭiriyaṃ siddhiriyaṃ śrutiriyaṃ smṛtiḥ |
adhyātmagatiriṣṭānāṃ viduṣāṃ prāptiravyayā

यजतां कामयानानां मखैर्विपुलदक्षिणैः ।
या गतिर्यज्ञशीलानां सा गतिस्त्वं न संशयः

yajatāṃ kāmayānānāṃ makhairvipuladakṣiṇaiḥ |
yā gatiryajñaśīlānāṃ sā gatistvaṃ na saṃśayaḥ

सम्यग्योगजपैः शान्तिर्नियमैर्देहतापनैः ।
तप्यतां या गतिर्देव परमा सा गतिर्भवान्

samyagyogajapaiḥ śāntirniyamairdehatāpanaiḥ |
tapyatāṃ yā gatirdeva paramā sā gatirbhavān

कर्मन्यासकृतानां च विरक्तानां ततस्ततः ।
या गतिर्ब्रह्मिसदने सा गतिस्त्वं सनातन

karmanyāsakṛtānāṃ ca viraktānāṃ tatastataḥ |
yā gatirbrahmisadane sā gatistvaṃ sanātana

अपुनर्भवकामानां वैराग्ये वर्ततां च या ।
प्रकृतीनां लयानां च सा गतिस्त्वं सनातन

apunarbhavakāmānāṃ vairāgye vartatāṃ ca yā |
prakṛtīnāṃ layānāṃ ca sā gatistvaṃ sanātana

ज्ञानविज्ञानयुक्तानां निरुपाख्या निरञ्जना ।
कैवल्या या गतिर्देव परमा सा गतिर्भवान्

jñānavijñānayuktānāṃ nirupākhyā nirañjanā |
kaivalyā yā gatirdeva paramā sā gatirbhavān

वेदशास्त्रपुराणोक्ताः पञ्च ता गतयः स्मृताः ।
त्वत्प्रसादाद्धि लभ्यन्ते न लभ्यन्तेऽन्यथा विभो

vedaśāstrapurāṇoktāḥ pañca tā gatayaḥ smṛtāḥ |
tvatprasādāddhi labhyante na labhyante'nyathā vibho

इति तण्डिस्तपोराशिस्तुष्टावेसानमात्मना ।
जगौ च परमं ब्रह्म यत्पुरा लोककृज्जगौ

iti taṇḍistaporāśistuṣṭāvesānamātmanā |
jagau ca paramaṃ brahma yatpurā lokakṛjjagau

एवं स्तुतो महादेवस्तण्डिना ब्रह्मवादिना ।
उवाच भगवान्देव उमया सहितः प्रभुः

evaṃ stuto mahādevastaṇḍinā brahmavādinā |
uvāca bhagavāndeva umayā sahitaḥ prabhuḥ

ब्रह्मा शतक्रतुर्विष्णुर्विश्वेदेवा महर्षयः ।
न विदुस्त्वामिति ततस्तुष्टः प्रोवाच तं शिवः

brahmā śatakraturviṣṇurviśvedevā maharṣayaḥ |
na vidustvāmiti tatastuṣṭaḥ provāca taṃ śivaḥ

अक्षयश्चाव्ययश्चैव भविता दुःखवर्जितः ।
यशस्वी तेजसा युक्तो दिव्यज्ञानसमन्वितः

akṣayaścāvyayaścaiva bhavitā duḥkhavarjitaḥ |
yaśasvī tejasā yukto divyajñānasamanvitaḥ

ऋषीणामभिगम्यश्च सूत्रकर्ता सुतस्तव ।
मत्प्रसादाद्द्विजश्रेष्ठ भविष्यति न संशयः

ṛṣīṇāmabhigamyaśca sūtrakartā sutastava |
matprasādāddvijaśreṣṭha bhaviṣyati na saṃśayaḥ

कं वा कामं ददाम्यद्य ब्रूहि यद्वत्स काङ्क्षसे ।
प्राञ्जलिः स उवाचेदं त्वयि भक्तिर्दृढाऽस्तु मे

kaṃ vā kāmaṃ dadāmyadya brūhi yadvatsa kāṅkṣase |
prāñjaliḥ sa uvācedaṃ tvayi bhaktirdṛḍhā'stu me

एतान्दत्त्वा वरान्देवो वन्द्यमानः सुरर्षिभिः ।
स्तूयमानश्च विबुधैस्तत्रैवान्तरधीयत

etāndattvā varāndevo vandyamānaḥ surarṣibhiḥ |
stūyamānaśca vibudhaistatraivāntaradhīyata

अन्तर्हिते भगवति सानुगे यादवेश्वर ।
ऋषिराश्रममागम्य ममैतत्प्रोक्तवानिह

antarhite bhagavati sānuge yādaveśvara |
ṛṣirāśramamāgamya mamaitatproktavāniha

यानि च प्रथितान्यादौ तण्डिराख्यातवान्मम
मानानि मानवश्रेष्ठ तानि त्वं शृणु सिद्धये

yāni ca prathitānyādau taṇḍirākhyātavānmama
mānāni mānavaśreṣṭha tāni tvaṃ śṛṇu siddhaye

दश नामसहस्राणि देवेष्वाह पितामहः ।
सर्वस्य शास्त्रेषु तथा दश नामशतानि च

daśa nāmasahasrāṇi deveṣvāha pitāmahaḥ |
sarvasya śāstreṣu tathā daśa nāmaśatāni ca

गुह्यानीमानि नामानि तण्डिर्भगवतोऽच्युत ।
देवप्रसादाद्देवेशः पुरा प्राह महात्मने

guhyānīmāni nāmāni taṇḍirbhagavato'cyuta |
devaprasādāddeveśaḥ purā prāha mahātmane