अध्याय 221: विकलांगता, उन्माद, निःसन्तानता और अन्य जन्म

भगवन्देवदेवेश भूतपाल नमोस्तु ते ।
ह्रस्वाङ्गाश्चैव वक्राङ्गाः कुब्जा वामनकास्तथा

bhagavandevadeveśa bhūtapāla namostu te |
hrasvāṅgāścaiva vakrāṅgāḥ kubjā vāmanakāstathā

अपरे मानुषा देव दृश्यन्ते कुणिबाहवः ।
केन कर्मविपाकेन तन्मे शंसितुमर्हसि

apare mānuṣā deva dṛśyante kuṇibāhavaḥ |
kena karmavipākena tanme śaṃsitumarhasi

ये पुरा मनुजा देवि लोभमोहसमन्विताः ।
धान्यमानान्विकुर्वन्ति क्रयविक्रयकारणात्

ye purā manujā devi lobhamohasamanvitāḥ |
dhānyamānānvikurvanti krayavikrayakāraṇāt

कुलदोषं तदा देवि धृतमानेषु नित्यशः ।
अर्धापकर्षणं चैव सर्वेषां क्रयविक्रये

kuladoṣaṃ tadā devi dhṛtamāneṣu nityaśaḥ |
ardhāpakarṣaṇaṃ caiva sarveṣāṃ krayavikraye

अङ्गदोषकरा ये तु परेषां कोपकारणात् ।
मांसादाश्चैव ये मूर्खा अयथावत्प्रथाः सदा

aṅgadoṣakarā ye tu pareṣāṃ kopakāraṇāt |
māṃsādāścaiva ye mūrkhā ayathāvatprathāḥ sadā

एवंयुक्तसमाचाराः पुनर्जन्मनि शोभने ।
ह्रस्वाङ्गा वामनाश्चैव कुब्जाश्चैव भवन्ति ते

evaṃyuktasamācārāḥ punarjanmani śobhane |
hrasvāṅgā vāmanāścaiva kubjāścaiva bhavanti te

भगवन्मानुषाः केचिद्दृश्यन्ते मानुषेषु वै ।
उन्मत्ताश्च पिशाचाश्च पर्यटन्तो यतस्ततः ।
केन कर्मविपाकेन तन्मे शंसितुमर्हसि

bhagavanmānuṣāḥ keciddṛśyante mānuṣeṣu vai |
unmattāśca piśācāśca paryaṭanto yatastataḥ |
kena karmavipākena tanme śaṃsitumarhasi

ये पुरा मनुजा देवि दर्पाहंकारसंयुताः ।
बहुधा प्रलपन्त्येव हसन्ति च परान्भृशम्

ye purā manujā devi darpāhaṃkārasaṃyutāḥ |
bahudhā pralapantyeva hasanti ca parānbhṛśam

मोहयन्ति परान्भोगैर्मदनैर्लोभकारणात् ।
वृद्धान्गुरूंश्च ये मूर्खा वृथैवापहसन्ति च ।
शौण्डा विदग्धाः शास्त्रेषु सदैवानृतवादिनः

mohayanti parānbhogairmadanairlobhakāraṇāt |
vṛddhāngurūṃśca ye mūrkhā vṛthaivāpahasanti ca |
śauṇḍā vidagdhāḥ śāstreṣu sadaivānṛtavādinaḥ

एवंयुक्तसमाचाराः पुनर्जन्मनि शोभने ।
उन्मत्ताश्च पिशाचाश्च भवन्त्येव न संशयः

evaṃyuktasamācārāḥ punarjanmani śobhane |
unmattāśca piśācāśca bhavantyeva na saṃśayaḥ

भगवन्मानुषाः केचिन्निरपत्याः सुदुःखिताः ।
यतन्तो न लभन्त्येव अपत्यानि यतस्ततः ।
केन कर्मविपाकेन तन्मे शंसितुमर्हसि

bhagavanmānuṣāḥ kecinnirapatyāḥ suduḥkhitāḥ |
yatanto na labhantyeva apatyāni yatastataḥ |
kena karmavipākena tanme śaṃsitumarhasi

ये पुरा मनुजा देवि सर्वप्राणिषु निर्दयाः ।
घ्नन्ति बालांश्च भुञ्जन्ते मृगाणां पक्षिणामपि

ye purā manujā devi sarvaprāṇiṣu nirdayāḥ |
ghnanti bālāṃśca bhuñjante mṛgāṇāṃ pakṣiṇāmapi

गुरुविद्वेषिणश्चैव परपुत्राभ्यसूयकाः ।
पितृपूजां न कुर्वन्ति यथोक्तां चाष्टकादिभिः

guruvidveṣiṇaścaiva paraputrābhyasūyakāḥ |
pitṛpūjāṃ na kurvanti yathoktāṃ cāṣṭakādibhiḥ

एवंयुक्तसमाचाराः पुनर्जन्मनि शोभने ।
मानुष्यं वा चिरात्प्राप्य निरपत्या भवन्ति ते ।
पुत्रशोकयुताश्चापि नास्ति तत्र विचारणा

evaṃyuktasamācārāḥ punarjanmani śobhane |
mānuṣyaṃ vā cirātprāpya nirapatyā bhavanti te |
putraśokayutāścāpi nāsti tatra vicāraṇā

भगवन्मानुषाः केचित्प्रदृश्यन्ते सुदुःखिताः ।
उद्वेगवासनिरताः सोद्वेगाश्च यतव्रताः

bhagavanmānuṣāḥ kecitpradṛśyante suduḥkhitāḥ |
udvegavāsaniratāḥ sodvegāśca yatavratāḥ

नित्यं शोकसमाविष्टा दुर्गताश्च तथैव च ।
केन कर्मविपाकेन तन्मे शंसितुमर्हसि

nityaṃ śokasamāviṣṭā durgatāśca tathaiva ca |
kena karmavipākena tanme śaṃsitumarhasi

ये पुरा मनुजा नित्यमुत्क्रोशनपरायणाः ।
भीषयन्ति परानित्यं विकुर्वन्ति तथैव च

ye purā manujā nityamutkrośanaparāyaṇāḥ |
bhīṣayanti parānityaṃ vikurvanti tathaiva ca

ऋणवृद्धिकराश्चैव दरिद्रेभ्यो यथेष्टतः ।
ऋणार्थमभिगच्छन्ति सततं वृद्धिरूपकाः

ṛṇavṛddhikarāścaiva daridrebhyo yatheṣṭataḥ |
ṛṇārthamabhigacchanti satataṃ vṛddhirūpakāḥ

उद्विजन्ते हि तान्दृष्ट्वा धारकाः स्वार्थकारणात् ।
अतिवृद्धिर्न कर्तव्या दरिद्रेभ्यो यथेष्टतः

udvijante hi tāndṛṣṭvā dhārakāḥ svārthakāraṇāt |
ativṛddhirna kartavyā daridrebhyo yatheṣṭataḥ

ये श्वभिः क्रीडमानाश्च त्रासयन्ति वने मृगान् ।
प्राणिहिंसां तथा देवि कुर्वन्ति च यतस्ततः

ye śvabhiḥ krīḍamānāśca trāsayanti vane mṛgān |
prāṇihiṃsāṃ tathā devi kurvanti ca yatastataḥ

येषां गृहेषु वै श्वानस्त्रासयन्ति वृथा नरान् ।
एवंयुक्तसमाचाराः कालधर्मगताः पुनः

yeṣāṃ gṛheṣu vai śvānastrāsayanti vṛthā narān |
evaṃyuktasamācārāḥ kāladharmagatāḥ punaḥ

पीडिता यमदण्डेन निरयस्थाश्चिरं प्रिये ।
कथञ्चित्प्राप्य मानुष्यं तत्र ते दुःखसंयुताः

pīḍitā yamadaṇḍena nirayasthāściraṃ priye |
kathañcitprāpya mānuṣyaṃ tatra te duḥkhasaṃyutāḥ

कुदेशे दुःखभूयिष्ठे व्याघातशतसङ्कुले ।
जायन्ते तत्र शोचन्तः सोद्वेगाश्च यतस्ततः

kudeśe duḥkhabhūyiṣṭhe vyāghātaśatasaṅkule |
jāyante tatra śocantaḥ sodvegāśca yatastataḥ

भगवन्मानुषाः केचिदैश्वर्यज्ञानसंयुताः ।
म्लेच्छभूमिषु दृश्यन्ते म्लेच्छैश्वर्यसमन्विताः ।
केन कर्मविपाकेन तन्मे शंसितुमर्हसि

bhagavanmānuṣāḥ kecidaiśvaryajñānasaṃyutāḥ |
mlecchabhūmiṣu dṛśyante mlecchaiśvaryasamanvitāḥ |
kena karmavipākena tanme śaṃsitumarhasi

ये पुरा मनुजा देवि धनधान्यसमन्विताः ।
अयथावत्प्रयच्छन्ति श्रद्धावर्जितमेव वा

ye purā manujā devi dhanadhānyasamanvitāḥ |
ayathāvatprayacchanti śraddhāvarjitameva vā

अपात्रेभ्यश्च ये दानं शौचमङ्गलवर्जिताः ।
ददत्येव च ये मूर्खाः श्लाघयाऽवज्ञयाऽपि वा

apātrebhyaśca ye dānaṃ śaucamaṅgalavarjitāḥ |
dadatyeva ca ye mūrkhāḥ ślāghayā'vajñayā'pi vā

एवंयुक्तसमाचाराः पुनर्जन्मनि शोभने ।
कुदेशे म्लेच्छभूयिष्ठे दुर्गमे वनसंकटे ।
म्लेच्छाधिपत्यं सम्प्राप्य जायन्ते तत्रतत्र वै

evaṃyuktasamācārāḥ punarjanmani śobhane |
kudeśe mlecchabhūyiṣṭhe durgame vanasaṃkaṭe |
mlecchādhipatyaṃ samprāpya jāyante tatratatra vai

भगवन्भगनेत्रघ्न मानुषेषु च केचन ।
क्लीबा नपुंसकाश्चैव दृश्यन्ते षण्डकास्तथा

bhagavanbhaganetraghna mānuṣeṣu ca kecana |
klībā napuṃsakāścaiva dṛśyante ṣaṇḍakāstathā

नीचकर्मरता नीचा नीचसक्यास्तथा भुवि ।
केन कर्मविपाकेन तन्मे शंसितुमर्हसि

nīcakarmaratā nīcā nīcasakyāstathā bhuvi |
kena karmavipākena tanme śaṃsitumarhasi

तदहं ते प्रवक्ष्यामि शृणु कल्याणि कारणम्

tadahaṃ te pravakṣyāmi śṛṇu kalyāṇi kāraṇam

ये पुरा मनुजा भूत्वा घोरकर्मरतास्तथा ।
पशुपंस्त्वोपगातेन जीवन्ति च रमन्ति च

ye purā manujā bhūtvā ghorakarmaratāstathā |
paśupaṃstvopagātena jīvanti ca ramanti ca

पुंस्त्वोपघातिनश्चैव नराणां कोपकारणात् ।
ये धूर्ताः स्त्रीषु गच्छन्ति अयथावद्यथेष्टतः

puṃstvopaghātinaścaiva narāṇāṃ kopakāraṇāt |
ye dhūrtāḥ strīṣu gacchanti ayathāvadyatheṣṭataḥ

कामविघ्नकरा ये तु द्वेषपैशुन्यकारणात् ।
एवंयुक्तसमाचाराः कालधर्मं गतास्तु ते ।
दण्डिता यमदण्डेन निरयस्थाश्चिरं प्रिये

kāmavighnakarā ye tu dveṣapaiśunyakāraṇāt |
evaṃyuktasamācārāḥ kāladharmaṃ gatāstu te |
daṇḍitā yamadaṇḍena nirayasthāściraṃ priye

यदि चेन्मानुषं जन्म लभेरंस्ते तथाविधाः ।
क्लीबा वर्षवराश्चैव षण्डकाश्च भवन्ति ते

yadi cenmānuṣaṃ janma labheraṃste tathāvidhāḥ |
klībā varṣavarāścaiva ṣaṇḍakāśca bhavanti te

नीचकर्मपरा लोके निर्लज्जा वीतसम्भ्रमाः ।
परान्दीनान्बहिष्कृत्य ते भवन्ति स्वकर्मणा

nīcakarmaparā loke nirlajjā vītasambhramāḥ |
parāndīnānbahiṣkṛtya te bhavanti svakarmaṇā

यदि चेत्सम्प्रपश्येरंस्ते मुच्यन्ते हि कल्मषात् ।
अत्रापि ते प्रमाद्येयुः पतन्ति नरकालये

yadi cetsamprapaśyeraṃste mucyante hi kalmaṣāt |
atrāpi te pramādyeyuḥ patanti narakālaye

स्त्रीणामपि तथा देवि यथा पुंसां तु कर्मजम् ।
इति ते कथितं देवि भूयः श्रोतुं किमिच्छसि

strīṇāmapi tathā devi yathā puṃsāṃ tu karmajam |
iti te kathitaṃ devi bhūyaḥ śrotuṃ kimicchasi