Mandala 9

Sukta 99: Praised with an ancient gatha

Rishi: रेभसूनू काश्यपौ · Devata: पवमानः सोमः · Metre: अनुष्टुप्, १ बृहती

8 verses · 99 of 114

What happens in this chapter

Praised with an ancient gatha

The two sons of Rebha, of the Kashyapa line, offer eight verses to Soma Pavamana in anushtubh, the first a brihati. For the bold, beloved one they string the manly bow and weave a bright garment. Adorned by night, he plunges towards the prizes when the thoughts of Vivasvat urge the tawny one on. They praise him with an ancient gatha, and the seekers ask him as an envoy for the first thought. Purified in the woollen fleece, he sits in the vessels and lays his seed as in cattle. Pressed for Indra, he settles in the bowls.

99.1

आ ह॑र्य॒ताय॑ धृ॒ष्णवे॒ धनु॑स्तन्वन्ति॒ पौंस्य॑म् ।
शु॒क्रां व॑य॒न्त्यसु॑राय नि॒र्णिजं॑ वि॒पामग्रे॑ मही॒युव॑ः

ā haryatāya dhṛṣṇave dhanustanvanti pauṃsyam |
śukrāṃ vayantyasurāya nirṇijaṃ vipāmagre mahīyuvaḥ

99.2

अध॑ क्ष॒पा परि॑ष्कृतो॒ वाजाँ॑ अ॒भि प्र गा॑हते ।
यदी॑ वि॒वस्व॑तो॒ धियो॒ हरिं॑ हि॒न्वन्ति॒ यात॑वे

adha kṣapā pariṣkṛto vājām̐ abhi pra gāhate |
yadī vivasvato dhiyo hariṃ hinvanti yātave

99.3

तम॑स्य मर्जयामसि॒ मदो॒ य इ॑न्द्र॒पात॑मः ।
यं गाव॑ आ॒सभि॑र्द॒धुः पु॒रा नू॒नं च॑ सू॒रय॑ः

tamasya marjayāmasi mado ya indrapātamaḥ |
yaṃ gāva āsabhirdadhuḥ purā nūnaṃ ca sūrayaḥ

99.4

तं गाथ॑या पुरा॒ण्या पु॑ना॒नम॒भ्य॑नूषत ।
उ॒तो कृ॑पन्त धी॒तयो॑ दे॒वानां॒ नाम॒ बिभ्र॑तीः

taṃ gāthayā purāṇyā punānamabhyanūṣata |
uto kṛpanta dhītayo devānāṃ nāma bibhratīḥ

99.5

तमु॒क्षमा॑णम॒व्यये॒ वारे॑ पुनन्ति धर्ण॒सिम् ।
दू॒तं न पू॒र्वचि॑त्तय॒ आ शा॑सते मनी॒षिण॑ः

tamukṣamāṇamavyaye vāre punanti dharṇasim |
dūtaṃ na pūrvacittaya ā śāsate manīṣiṇaḥ

99.6

स पु॑ना॒नो म॒दिन्त॑म॒ः सोम॑श्च॒मूषु॑ सीदति ।
प॒शौ न रेत॑ आ॒दध॒त्पति॑र्वचस्यते धि॒यः

sa punāno madintamaḥ somaścamūṣu sīdati |
paśau na reta ādadhatpatirvacasyate dhiyaḥ

99.7

स मृ॑ज्यते सु॒कर्म॑भिर्दे॒वो दे॒वेभ्य॑ः सु॒तः ।
वि॒दे यदा॑सु संद॒दिर्म॒हीर॒पो वि गा॑हते

sa mṛjyate sukarmabhirdevo devebhyaḥ sutaḥ |
vide yadāsu saṃdadirmahīrapo vi gāhate

99.8

सु॒त इ॑न्दो प॒वित्र॒ आ नृभि॑र्य॒तो वि नी॑यसे ।
इन्द्रा॑य मत्स॒रिन्त॑मश्च॒मूष्वा नि षी॑दसि

suta indo pavitra ā nṛbhiryato vi nīyase |
indrāya matsarintamaścamūṣvā ni ṣīdasi

Text source: Wikisource · CC BY-SA 4.0 (Wikisource transcription of a public-domain text)