Rishi: श्यावाश्व आत्रेयः · Devata: इन्द्रः · Metre: महापङ्क्तिः, १ अतिजगती
7 verses · 37 of 103
A second hymn of Shyavashva Atreya to Indra, lord of Shachi, in mahapankti. The refrain asks the Vritra-slayer, wielder of the vajra, to drink the Soma of the midday pressing and to come with all his aids. Indra overpowers hostile hosts, rules as sole king over the world, shakes apart even those who stand firm together, and is master of both rest and effort. He guards the ruling power. The closing verse repeats the prayer of the previous sukta: hear the singer Shyavashva as you heard Atri; you alone helped Trasadasyu and made the kshatra grow.
प्रेदं ब्रह्म॑ वृत्र॒तूर्ये॑ष्वाविथ॒ प्र सु॑न्व॒तः श॑चीपत॒ इन्द्र॒ विश्वा॑भिरू॒तिभि॑ः ।
माध्यं॑दिनस्य॒ सव॑नस्य वृत्रहन्ननेद्य॒ पिबा॒ सोम॑स्य वज्रिवः
predaṃ brahma vṛtratūryeṣvāvitha pra sunvataḥ śacīpata indra viśvābhirūtibhiḥ |
mādhyaṃdinasya savanasya vṛtrahannanedya pibā somasya vajrivaḥ
से॒हा॒न उ॑ग्र॒ पृत॑ना अ॒भि द्रुह॑ः शचीपत॒ इन्द्र॒ विश्वा॑भिरू॒तिभि॑ः ।
माध्यं॑दिनस्य॒ सव॑नस्य वृत्रहन्ननेद्य॒ पिबा॒ सोम॑स्य वज्रिवः
sehāna ugra pṛtanā abhi druhaḥ śacīpata indra viśvābhirūtibhiḥ |
mādhyaṃdinasya savanasya vṛtrahannanedya pibā somasya vajrivaḥ
ए॒क॒राळ॒स्य भुव॑नस्य राजसि शचीपत॒ इन्द्र॒ विश्वा॑भिरू॒तिभि॑ः ।
माध्यं॑दिनस्य॒ सव॑नस्य वृत्रहन्ननेद्य॒ पिबा॒ सोम॑स्य वज्रिवः
ekarāḻasya bhuvanasya rājasi śacīpata indra viśvābhirūtibhiḥ |
mādhyaṃdinasya savanasya vṛtrahannanedya pibā somasya vajrivaḥ
स॒स्थावा॑ना यवयसि॒ त्वमेक॒ इच्छ॑चीपत॒ इन्द्र॒ विश्वा॑भिरू॒तिभि॑ः ।
माध्यं॑दिनस्य॒ सव॑नस्य वृत्रहन्ननेद्य॒ पिबा॒ सोम॑स्य वज्रिवः
sasthāvānā yavayasi tvameka icchacīpata indra viśvābhirūtibhiḥ |
mādhyaṃdinasya savanasya vṛtrahannanedya pibā somasya vajrivaḥ
क्षेम॑स्य च प्र॒युज॑श्च॒ त्वमी॑शिषे शचीपत॒ इन्द्र॒ विश्वा॑भिरू॒तिभि॑ः ।
माध्यं॑दिनस्य॒ सव॑नस्य वृत्रहन्ननेद्य॒ पिबा॒ सोम॑स्य वज्रिवः
kṣemasya ca prayujaśca tvamīśiṣe śacīpata indra viśvābhirūtibhiḥ |
mādhyaṃdinasya savanasya vṛtrahannanedya pibā somasya vajrivaḥ
क्ष॒त्राय॑ त्व॒मव॑सि॒ न त्व॑माविथ शचीपत॒ इन्द्र॒ विश्वा॑भिरू॒तिभि॑ः ।
माध्यं॑दिनस्य॒ सव॑नस्य वृत्रहन्ननेद्य॒ पिबा॒ सोम॑स्य वज्रिवः
kṣatrāya tvamavasi na tvamāvitha śacīpata indra viśvābhirūtibhiḥ |
mādhyaṃdinasya savanasya vṛtrahannanedya pibā somasya vajrivaḥ
श्या॒वाश्व॑स्य॒ रेभ॑त॒स्तथा॑ शृणु॒ यथाशृ॑णो॒रत्रे॒ः कर्मा॑णि कृण्व॒तः ।
प्र त्र॒सद॑स्युमाविथ॒ त्वमेक॒ इन्नृ॒षाह्य॒ इन्द्र॑ क्ष॒त्राणि॑ व॒र्धय॑न्
śyāvāśvasya rebhatastathā śṛṇu yathāśṛṇoratreḥ karmāṇi kṛṇvataḥ |
pra trasadasyumāvitha tvameka innṛṣāhya indra kṣatrāṇi vardhayan
Text source: Wikisource · CC BY-SA 4.0 (Wikisource transcription of a public-domain text)
