यत्स्थो दी॒र्घप्र॑सद्मनि॒ यद्वा॒दो रो॑च॒ने दि॒वः ।
यद्वा॑ समु॒द्रे अध्याकृ॑ते गृ॒हेऽत॒ आ या॑तमश्विना
yatstho dīrghaprasadmani yadvādo rocane divaḥ |
yadvā samudre adhyākṛte gṛhe'ta ā yātamaśvinā
Mandala 8
Sukta 10: Wherever you are, Ashvins, come
Rishi: प्रगाथो (घौरः) काण्वः · Devata: अश्विनौ · Metre: १ बृहती, २ मध्येज्योतिः (पिंगलमतेन – शंकुमती), ४ आस्तारपङ्क्तिः, ५-६ प्रगाथः (५ बृहती, ६ सतोबृहती)
6 verses · 10 of 103
What happens in this chapter
Wherever you are, Ashvins, come
A short hymn of six verses. Pragatha Ghaura of the Kanva line calls the Ashvins wherever they may be: in a long dwelling, in the bright place of heaven, in a house built on the ocean, beside the Druhyus, Anus, Turvashas and Yadus, flying through the mid-air or riding over heaven and earth. As they once sprinkled the sacrifice for Manu, let them now attend to the Kanva. He also calls Brihaspati, all the Vishvedevas, Indra and Vishnu, and the swift-horsed Ashvins, whose friendship is close among the gods.
यद्वा॑ य॒ज्ञं मन॑वे सम्मिमि॒क्षथु॑रे॒वेत्का॒ण्वस्य॑ बोधतम् ।
बृह॒स्पतिं॒ विश्वा॑न्दे॒वाँ अ॒हं हु॑व॒ इन्द्रा॒विष्णू॑ अ॒श्विना॑वाशु॒हेष॑सा
yadvā yajñaṃ manave sammimikṣathurevetkāṇvasya bodhatam |
bṛhaspatiṃ viśvāndevām̐ ahaṃ huva indrāviṣṇū aśvināvāśuheṣasā
त्या न्व१॒॑श्विना॑ हुवे सु॒दंस॑सा गृ॒भे कृ॒ता ।
ययो॒रस्ति॒ प्र ण॑ः स॒ख्यं दे॒वेष्वध्याप्य॑म्
tyā nvaśvinā huve sudaṃsasā gṛbhe kṛtā |
yayorasti pra ṇaḥ sakhyaṃ deveṣvadhyāpyam
ययो॒रधि॒ प्र य॒ज्ञा अ॑सू॒रे सन्ति॑ सू॒रय॑ः ।
ता य॒ज्ञस्या॑ध्व॒रस्य॒ प्रचे॑तसा स्व॒धाभि॒र्या पिब॑तः सो॒म्यं मधु॑
yayoradhi pra yajñā asūre santi sūrayaḥ |
tā yajñasyādhvarasya pracetasā svadhābhiryā pibataḥ somyaṃ madhu
यद॒द्याश्वि॑ना॒वपा॒ग्यत्प्राक्स्थो वा॑जिनीवसू ।
यद्द्रु॒ह्यव्यन॑वि तु॒र्वशे॒ यदौ॑ हु॒वे वा॒मथ॒ मा ग॑तम्
yadadyāśvināvapāgyatprākstho vājinīvasū |
yaddruhyavyanavi turvaśe yadau huve vāmatha mā gatam
यद॒न्तरि॑क्षे॒ पत॑थः पुरुभुजा॒ यद्वे॒मे रोद॑सी॒ अनु॑ ।
यद्वा॑ स्व॒धाभि॑रधि॒तिष्ठ॑थो॒ रथ॒मत॒ आ या॑तमश्विना
yadantarikṣe patathaḥ purubhujā yadveme rodasī anu |
yadvā svadhābhiradhitiṣṭhatho rathamata ā yātamaśvinā
Text source: Wikisource · CC BY-SA 4.0 (Wikisource transcription of a public-domain text)