बृ॒हदु॑ गायिषे॒ वचो॑ऽसु॒र्या॑ न॒दीना॑म् ।
सर॑स्वती॒मिन्म॑हया सुवृ॒क्तिभि॒ः स्तोमै॑र्वसिष्ठ॒ रोद॑सी
bṛhadu gāyiṣe vaco'suryā nadīnām |
sarasvatīminmahayā suvṛktibhiḥ stomairvasiṣṭha rodasī
Mandala 7
Sukta 96: Sarasvati and Sarasvan, givers of plenty
Rishi: मैत्रावरुणिर्वसिष्ठः · Devata: सरस्वती, ४-६ सरस्वान् · Metre: १-२ प्रगाथः (विषमा बृहती, समा सतोबृहती), ३ प्रस्तारपङ्क्तिः, ४-६ गायत्री
6 verses · 96 of 104
What happens in this chapter
Sarasvati and Sarasvan, givers of plenty
Vasishtha tells himself to sing a lofty word to Sarasvati, mightiest of rivers, and to honour her with hymns. The Purus dwell on her two banks; let her, friend of the Maruts, wake to help us and stir the bounty of patrons. May gracious Sarasvati do good, praised as Jamadagni praised her and as Vasishtha praises. Verses four to six turn to Sarasvan: wanting wives and sons, we call on him; be our helper with your honeyed waves dripping ghee; may we drink from his swelling breast and gain offspring and food.
उ॒भे यत्ते॑ महि॒ना शु॑भ्रे॒ अन्ध॑सी अधिक्षि॒यन्ति॑ पू॒रव॑ः ।
सा नो॑ बोध्यवि॒त्री म॒रुत्स॑खा॒ चोद॒ राधो॑ म॒घोना॑म्
ubhe yatte mahinā śubhre andhasī adhikṣiyanti pūravaḥ |
sā no bodhyavitrī marutsakhā coda rādho maghonām
भ॒द्रमिद्भ॒द्रा कृ॑णव॒त्सर॑स्व॒त्यक॑वारी चेतति वा॒जिनी॑वती ।
गृ॒णा॒ना ज॑मदग्नि॒वत्स्तु॑वा॒ना च॑ वसिष्ठ॒वत्
bhadramidbhadrā kṛṇavatsarasvatyakavārī cetati vājinīvatī |
gṛṇānā jamadagnivatstuvānā ca vasiṣṭhavat
ज॒नी॒यन्तो॒ न्वग्र॑वः पुत्री॒यन्त॑ः सु॒दान॑वः ।
सर॑स्वन्तं हवामहे
janīyanto nvagravaḥ putrīyantaḥ sudānavaḥ |
sarasvantaṃ havāmahe
ये ते॑ सरस्व ऊ॒र्मयो॒ मधु॑मन्तो घृत॒श्चुत॑ः ।
तेभि॑र्नोऽवि॒ता भ॑व
ye te sarasva ūrmayo madhumanto ghṛtaścutaḥ |
tebhirno'vitā bhava
पी॒पि॒वांसं॒ सर॑स्वत॒ः स्तनं॒ यो वि॒श्वद॑र्शतः ।
भ॒क्षी॒महि॑ प्र॒जामिष॑म्
pīpivāṃsaṃ sarasvataḥ stanaṃ yo viśvadarśataḥ |
bhakṣīmahi prajāmiṣam
Text source: Wikisource · CC BY-SA 4.0 (Wikisource transcription of a public-domain text)