Rishi: मैत्रावरुणिर्वसिष्ठः · Devata: उषसः · Metre: त्रिष्टुप्
5 verses · 78 of 104
Her first banners are seen and her ornaments spread upward. Maharshi Vasishtha asks Ushas to bring good things on her great shining chariot. The kindled Agni greets her, the poets greet her with hymns, and the goddess comes driving away all darkness and evil. The Dawns, shining in the east, have brought forth the sun, the sacrifice and the fire; the unloved darkness has gone westward. All see the bountiful daughter of heaven mount her chariot. Waking glad today, patrons and singers alike, we ask the Dawns to be kind to us.
प्रति॑ के॒तव॑ः प्रथ॒मा अ॑दृश्रन्नू॒र्ध्वा अ॑स्या अ॒ञ्जयो॒ वि श्र॑यन्ते ।
उषो॑ अ॒र्वाचा॑ बृह॒ता रथे॑न॒ ज्योति॑ष्मता वा॒मम॒स्मभ्यं॑ वक्षि
prati ketavaḥ prathamā adṛśrannūrdhvā asyā añjayo vi śrayante |
uṣo arvācā bṛhatā rathena jyotiṣmatā vāmamasmabhyaṃ vakṣi
प्रति॑ षीम॒ग्निर्ज॑रते॒ समि॑द्ध॒ः प्रति॒ विप्रा॑सो म॒तिभि॑र्गृ॒णन्त॑ः ।
उ॒षा या॑ति॒ ज्योति॑षा॒ बाध॑माना॒ विश्वा॒ तमां॑सि दुरि॒ताप॑ दे॒वी
prati ṣīmagnirjarate samiddhaḥ prati viprāso matibhirgṛṇantaḥ |
uṣā yāti jyotiṣā bādhamānā viśvā tamāṃsi duritāpa devī
ए॒ता उ॒ त्याः प्रत्य॑दृश्रन्पु॒रस्ता॒ज्ज्योति॒र्यच्छ॑न्तीरु॒षसो॑ विभा॒तीः ।
अजी॑जन॒न्सूर्यं॑ य॒ज्ञम॒ग्निम॑पा॒चीनं॒ तमो॑ अगा॒दजु॑ष्टम्
etā u tyāḥ pratyadṛśranpurastājjyotiryacchantīruṣaso vibhātīḥ |
ajījanansūryaṃ yajñamagnimapācīnaṃ tamo agādajuṣṭam
अचे॑ति दि॒वो दु॑हि॒ता म॒घोनी॒ विश्वे॑ पश्यन्त्यु॒षसं॑ विभा॒तीम् ।
आस्था॒द्रथं॑ स्व॒धया॑ यु॒ज्यमा॑न॒मा यमश्वा॑सः सु॒युजो॒ वह॑न्ति
aceti divo duhitā maghonī viśve paśyantyuṣasaṃ vibhātīm |
āsthādrathaṃ svadhayā yujyamānamā yamaśvāsaḥ suyujo vahanti
प्रति॑ त्वा॒द्य सु॒मन॑सो बुधन्ता॒स्माका॑सो म॒घवा॑नो व॒यं च॑ ।
ति॒ल्वि॒ला॒यध्व॑मुषसो विभा॒तीर्यू॒यं पा॑त स्व॒स्तिभि॒ः सदा॑ नः
prati tvādya sumanaso budhantāsmākāso maghavāno vayaṃ ca |
tilvilāyadhvamuṣaso vibhātīryūyaṃ pāta svastibhiḥ sadā naḥ
Text source: Wikisource · CC BY-SA 4.0 (Wikisource transcription of a public-domain text)
