Rishi: मैत्रावरुणिर्वसिष्ठः · Devata: अग्नीन्द्रमित्रावरुणाश्विभगपूषब्रह्मणस्पतिसोमरुद्राः, २-६ भगः, ७ उषसः · Metre: त्रिष्टुप्, १ जगती
7 verses · 41 of 104
This is the Pratah sukta, the dawn prayer still recited at daybreak. Vasishtha calls at morning on Agni, Indra, Mitra-Varuna, the Ashvins, Bhaga, Pushan, Brahmanaspati, Soma and Rudra. Then he turns wholly to Bhaga, the son of Aditi who apportions: the weak man and the strong, even the king, say 'give me a share'. 'Bhaga, leader, Bhaga of true bounty, lift this prayer and give to us; make us rich in cattle, horses and men.' He asks to be fortunate now, at midday and at sunset. 'Let Bhaga himself be our good fortune, O gods.' The dawns are asked to bow to the rite and bring horses, cattle and heroes.
प्रा॒तर॒ग्निं प्रा॒तरिन्द्रं॑ हवामहे प्रा॒तर्मि॒त्रावरु॑णा प्रा॒तर॒श्विना॑ ।
प्रा॒तर्भगं॑ पू॒षणं॒ ब्रह्म॑ण॒स्पतिं॑ प्रा॒तः सोम॑मु॒त रु॒द्रं हु॑वेम
prātaragniṃ prātarindraṃ havāmahe prātarmitrāvaruṇā prātaraśvinā |
prātarbhagaṃ pūṣaṇaṃ brahmaṇaspatiṃ prātaḥ somamuta rudraṃ huvema
प्रा॒त॒र्जितं॒ भग॑मु॒ग्रं हु॑वेम व॒यं पु॒त्रमदि॑ते॒र्यो वि॑ध॒र्ता ।
आ॒ध्रश्चि॒द्यं मन्य॑मानस्तु॒रश्चि॒द्राजा॑ चि॒द्यं भगं॑ भ॒क्षीत्याह॑
prātarjitaṃ bhagamugraṃ huvema vayaṃ putramaditeryo vidhartā |
ādhraścidyaṃ manyamānasturaścidrājā cidyaṃ bhagaṃ bhakṣītyāha
भग॒ प्रणे॑त॒र्भग॒ सत्य॑राधो॒ भगे॒मां धिय॒मुद॑वा॒ दद॑न्नः ।
भग॒ प्र णो॑ जनय॒ गोभि॒रश्वै॒र्भग॒ प्र नृभि॑र्नृ॒वन्त॑ः स्याम
bhaga praṇetarbhaga satyarādho bhagemāṃ dhiyamudavā dadannaḥ |
bhaga pra ṇo janaya gobhiraśvairbhaga pra nṛbhirnṛvantaḥ syāma
उ॒तेदानीं॒ भग॑वन्तः स्यामो॒त प्र॑पि॒त्व उ॒त मध्ये॒ अह्ना॑म् ।
उ॒तोदि॑ता मघव॒न्सूर्य॑स्य व॒यं दे॒वानां॑ सुम॒तौ स्या॑म
utedānīṃ bhagavantaḥ syāmota prapitva uta madhye ahnām |
utoditā maghavansūryasya vayaṃ devānāṃ sumatau syāma
भग॑ ए॒व भग॑वाँ अस्तु देवा॒स्तेन॑ व॒यं भग॑वन्तः स्याम ।
तं त्वा॑ भग॒ सर्व॒ इज्जो॑हवीति॒ स नो॑ भग पुरए॒ता भ॑वे॒ह
bhaga eva bhagavām̐ astu devāstena vayaṃ bhagavantaḥ syāma |
taṃ tvā bhaga sarva ijjohavīti sa no bhaga puraetā bhaveha
सम॑ध्व॒रायो॒षसो॑ नमन्त दधि॒क्रावे॑व॒ शुच॑ये प॒दाय॑ ।
अ॒र्वा॒ची॒नं व॑सु॒विदं॒ भगं॑ नो॒ रथ॑मि॒वाश्वा॑ वा॒जिन॒ आ व॑हन्तु
samadhvarāyoṣaso namanta dadhikrāveva śucaye padāya |
arvācīnaṃ vasuvidaṃ bhagaṃ no rathamivāśvā vājina ā vahantu
अश्वा॑वती॒र्गोम॑तीर्न उ॒षासो॑ वी॒रव॑ती॒ः सद॑मुच्छन्तु भ॒द्राः ।
घृ॒तं दुहा॑ना वि॒श्वत॒ः प्रपी॑ता यू॒यं पा॑त स्व॒स्तिभि॒ः सदा॑ नः
aśvāvatīrgomatīrna uṣāso vīravatīḥ sadamucchantu bhadrāḥ |
ghṛtaṃ duhānā viśvataḥ prapītā yūyaṃ pāta svastibhiḥ sadā naḥ
Text source: Wikisource · CC BY-SA 4.0 (Wikisource transcription of a public-domain text)
