Rishi: वामदेवो गौतमः · Devata: ऋभवः · Metre: त्रिष्टुप्, ५-८ अनुष्टुप्
8 verses · 37 of 58
Vamadeva Gautama calls the Ribhus in trishtubh and anushtubh. Come to our rite, Vajas and Ribhukshan, by the paths the gods travel, as you have taken men's sacrifice on bright days. Let these sacrifices please your heart and mind; the soma juices, full and golden, delight you when drunk. You have fat horses and shining chariots, jaws of bronze and fine ornaments, sons of Indra, children of strength. We call Ribhu, rich in horses and ever-giving. The man whom you and Indra favour wins by his thoughts and by his horse. Show us the paths to sacrifice and grant us wealth in horses.
उप॑ नो वाजा अध्व॒रमृ॑भुक्षा॒ देवा॑ या॒त प॒थिभि॑र्देव॒यानै॑ः ।
यथा॑ य॒ज्ञं मनु॑षो वि॒क्ष्वा॒३॒॑सु द॑धि॒ध्वे र॑ण्वाः सु॒दिने॒ष्वह्ना॑म्
upa no vājā adhvaramṛbhukṣā devā yāta pathibhirdevayānaiḥ |
yathā yajñaṃ manuṣo vikṣvāsu dadhidhve raṇvāḥ sudineṣvahnām
ते वो॑ हृ॒दे मन॑से सन्तु य॒ज्ञा जुष्टा॑सो अ॒द्य घृ॒तनि॑र्णिजो गुः ।
प्र व॑ः सु॒तासो॑ हरयन्त पू॒र्णाः क्रत्वे॒ दक्षा॑य हर्षयन्त पी॒ताः
te vo hṛde manase santu yajñā juṣṭāso adya ghṛtanirṇijo guḥ |
pra vaḥ sutāso harayanta pūrṇāḥ kratve dakṣāya harṣayanta pītāḥ
त्र्यु॒दा॒यं दे॒वहि॑तं॒ यथा॑ व॒ः स्तोमो॑ वाजा ऋभुक्षणो द॒दे व॑ः ।
जु॒ह्वे म॑नु॒ष्वदुप॑रासु वि॒क्षु यु॒ष्मे सचा॑ बृ॒हद्दि॑वेषु॒ सोम॑म्
tryudāyaṃ devahitaṃ yathā vaḥ stomo vājā ṛbhukṣaṇo dade vaḥ |
juhve manuṣvaduparāsu vikṣu yuṣme sacā bṛhaddiveṣu somam
पीवो॑अश्वाः शु॒चद्र॑था॒ हि भू॒ताय॑ःशिप्रा वाजिनः सुनि॒ष्काः ।
इन्द्र॑स्य सूनो शवसो नपा॒तोऽनु॑ वश्चेत्यग्रि॒यं मदा॑य
pīvoaśvāḥ śucadrathā hi bhūtāyaḥśiprā vājinaḥ suniṣkāḥ |
indrasya sūno śavaso napāto'nu vaścetyagriyaṃ madāya
ऋ॒भुमृ॑भुक्षणो र॒यिं वाजे॑ वा॒जिन्त॑मं॒ युज॑म् ।
इन्द्र॑स्वन्तं हवामहे सदा॒सात॑मम॒श्विन॑म्
ṛbhumṛbhukṣaṇo rayiṃ vāje vājintamaṃ yujam |
indrasvantaṃ havāmahe sadāsātamamaśvinam
सेदृ॑भवो॒ यमव॑थ यू॒यमिन्द्र॑श्च॒ मर्त्य॑म् ।
स धी॒भिर॑स्तु॒ सनि॑ता मे॒धसा॑ता॒ सो अर्व॑ता
sedṛbhavo yamavatha yūyamindraśca martyam |
sa dhībhirastu sanitā medhasātā so arvatā
वि नो॑ वाजा ऋभुक्षणः प॒थश्चि॑तन॒ यष्ट॑वे ।
अ॒स्मभ्यं॑ सूरयः स्तु॒ता विश्वा॒ आशा॑स्तरी॒षणि॑
vi no vājā ṛbhukṣaṇaḥ pathaścitana yaṣṭave |
asmabhyaṃ sūrayaḥ stutā viśvā āśāstarīṣaṇi
तं नो॑ वाजा ऋभुक्षण॒ इन्द्र॒ नास॑त्या र॒यिम् ।
समश्वं॑ चर्ष॒णिभ्य॒ आ पु॒रु श॑स्त म॒घत्त॑ये
taṃ no vājā ṛbhukṣaṇa indra nāsatyā rayim |
samaśvaṃ carṣaṇibhya ā puru śasta maghattaye
Text source: Wikisource · CC BY-SA 4.0 (Wikisource transcription of a public-domain text)
