Rishi: सुमित्रो वाध्र्यश्वःऐन्द्रो विमदः, प्राजापत्यो वा,वासुक्रो वसुकृद्वा · Devata: आप्रीसूक्तं (१ इध्मः समिद्धोऽग्निर्वा, २ नराशंसः, ३ इळा, ४ बर्हिः, ५ देवीर्द्वारः, ६ उषासानक्ता, ७ दैव्यौ होतारौ प्रचेतसौ, ८ तिस्रो देव्यः सरस्वतीळाभारत्यः, ९ त्वष्टा, १० वनस्पतिः, ११ स्वाहाकृतयः) · Metre: त्रिष्टुप्
11 verses · 70 of 191
An Apri sukta by Sumitra Vadhryashva in Trishtubh, each verse inviting one member of the rite in fixed order. Agni is asked to accept the kindling stick and rise high on earth's summit. Narashamsa comes first among the devas with horses of every form. The barhis is spread wide and fragrant, the divine doors open for the chariot, Night and Dawn, daughters of heaven, sit in their place. The two divine hotars, the three goddesses with Ila of the ghee-dripping foot, Tvashta, and Vanaspati the post follow. The last verse calls Varuna, Indra and the Maruts to sit on the barhis and rejoice at the svaha.
इ॒मां मे॑ अग्ने स॒मिधं॑ जुषस्वे॒ळस्प॒दे प्रति॑ हर्या घृ॒ताची॑म् ।
वर्ष्म॑न्पृथि॒व्याः सु॑दिन॒त्वे अह्ना॑मू॒र्ध्वो भ॑व सुक्रतो देवय॒ज्या
imāṃ me agne samidhaṃ juṣasveḻaspade prati haryā ghṛtācīm |
varṣmanpṛthivyāḥ sudinatve ahnāmūrdhvo bhava sukrato devayajyā
आ दे॒वाना॑मग्र॒यावे॒ह या॑तु॒ नरा॒शंसो॑ वि॒श्वरू॑पेभि॒रश्वै॑ः ।
ऋ॒तस्य॑ प॒था नम॑सा मि॒येधो॑ दे॒वेभ्यो॑ दे॒वत॑मः सुषूदत्
ā devānāmagrayāveha yātu narāśaṃso viśvarūpebhiraśvaiḥ |
ṛtasya pathā namasā miyedho devebhyo devatamaḥ suṣūdat
श॒श्व॒त्त॒ममी॑ळते दू॒त्या॑य ह॒विष्म॑न्तो मनु॒ष्या॑सो अ॒ग्निम् ।
वहि॑ष्ठै॒रश्वै॑ः सु॒वृता॒ रथे॒ना दे॒वान्व॑क्षि॒ नि ष॑दे॒ह होता॑
śaśvattamamīḻate dūtyāya haviṣmanto manuṣyāso agnim |
vahiṣṭhairaśvaiḥ suvṛtā rathenā devānvakṣi ni ṣadeha hotā
वि प्र॑थतां दे॒वजु॑ष्टं तिर॒श्चा दी॒र्घं द्रा॒घ्मा सु॑र॒भि भू॑त्व॒स्मे ।
अहे॑ळता॒ मन॑सा देव बर्हि॒रिन्द्र॑ज्येष्ठाँ उश॒तो य॑क्षि दे॒वान्
vi prathatāṃ devajuṣṭaṃ tiraścā dīrghaṃ drāghmā surabhi bhūtvasme |
aheḻatā manasā deva barhirindrajyeṣṭhām̐ uśato yakṣi devān
दि॒वो वा॒ सानु॑ स्पृ॒शता॒ वरी॑यः पृथि॒व्या वा॒ मात्र॑या॒ वि श्र॑यध्वम् ।
उ॒श॒तीर्द्वा॑रो महि॒ना म॒हद्भि॑र्दे॒वं रथं॑ रथ॒युर्धा॑रयध्वम्
divo vā sānu spṛśatā varīyaḥ pṛthivyā vā mātrayā vi śrayadhvam |
uśatīrdvāro mahinā mahadbhirdevaṃ rathaṃ rathayurdhārayadhvam
दे॒वी दि॒वो दु॑हि॒तरा॑ सुशि॒ल्पे उ॒षासा॒नक्ता॑ सदतां॒ नि योनौ॑ ।
आ वां॑ दे॒वास॑ उशती उ॒शन्त॑ उ॒रौ सी॑दन्तु सुभगे उ॒पस्थे॑
devī divo duhitarā suśilpe uṣāsānaktā sadatāṃ ni yonau |
ā vāṃ devāsa uśatī uśanta urau sīdantu subhage upasthe
ऊ॒र्ध्वो ग्रावा॑ बृ॒हद॒ग्निः समि॑द्धः प्रि॒या धामा॒न्यदि॑तेरु॒पस्थे॑ ।
पु॒रोहि॑तावृत्विजा य॒ज्ञे अ॒स्मिन्वि॒दुष्ट॑रा॒ द्रवि॑ण॒मा य॑जेथाम्
ūrdhvo grāvā bṛhadagniḥ samiddhaḥ priyā dhāmānyaditerupasthe |
purohitāvṛtvijā yajñe asminviduṣṭarā draviṇamā yajethām
तिस्रो॑ देवीर्ब॒र्हिरि॒दं वरी॑य॒ आ सी॑दत चकृ॒मा व॑ः स्यो॒नम् ।
म॒नु॒ष्वद्य॒ज्ञं सुधि॑ता ह॒वींषीळा॑ दे॒वी घृ॒तप॑दी जुषन्त
tisro devīrbarhiridaṃ varīya ā sīdata cakṛmā vaḥ syonam |
manuṣvadyajñaṃ sudhitā havīṃṣīḻā devī ghṛtapadī juṣanta
देव॑ त्वष्ट॒र्यद्ध॑ चारु॒त्वमान॒ड्यदङ्गि॑रसा॒मभ॑वः सचा॒भूः ।
स दे॒वानां॒ पाथ॒ उप॒ प्र वि॒द्वाँ उ॒शन्य॑क्षि द्रविणोदः सु॒रत्न॑ः
deva tvaṣṭaryaddha cārutvamānaḍyadaṅgirasāmabhavaḥ sacābhūḥ |
sa devānāṃ pātha upa pra vidvām̐ uśanyakṣi draviṇodaḥ suratnaḥ
वन॑स्पते रश॒नया॑ नि॒यूया॑ दे॒वानां॒ पाथ॒ उप॑ वक्षि वि॒द्वान् ।
स्वदा॑ति दे॒वः कृ॒णव॑द्ध॒वींष्यव॑तां॒ द्यावा॑पृथि॒वी हवं॑ मे
vanaspate raśanayā niyūyā devānāṃ pātha upa vakṣi vidvān |
svadāti devaḥ kṛṇavaddhavīṃṣyavatāṃ dyāvāpṛthivī havaṃ me
आग्ने॑ वह॒ वरु॑णमि॒ष्टये॑ न॒ इन्द्रं॑ दि॒वो म॒रुतो॑ अ॒न्तरि॑क्षात् ।
सीद॑न्तु ब॒र्हिर्विश्व॒ आ यज॑त्रा॒ः स्वाहा॑ दे॒वा अ॒मृता॑ मादयन्ताम्
āgne vaha varuṇamiṣṭaye na indraṃ divo maruto antarikṣāt |
sīdantu barhirviśva ā yajatrāḥ svāhā devā amṛtā mādayantām
Text source: Wikisource · CC BY-SA 4.0 (Wikisource transcription of a public-domain text)
