ममा॑ग्ने॒ वर्चो॑ विह॒वेष्व॑स्तु व॒यं त्वेन्धा॑नास्त॒न्वं॑ पुषेम ।
मह्यं॑ नमन्तां प्र॒दिश॒श्चत॑स्र॒स्त्वयाध्य॑क्षेण॒ पृत॑ना जयेम
mamāgne varco vihaveṣvastu vayaṃ tvendhānāstanvaṃ puṣema |
mahyaṃ namantāṃ pradiśaścatasrastvayādhyakṣeṇa pṛtanā jayema
Mandala 10
Sukta 128: May my lustre shine in the contest
Rishi: विहव्य आङ्गिरसः · Devata: विश्वे देवाः · Metre: त्रिष्टुप्, ९ जगती
9 verses · 128 of 191
What happens in this chapter
May my lustre shine in the contest
Vihavya Angirasa calls the Vishvedevas in trishtubh and jagati at a contest of rival invocations. Agni, may my lustre prevail; kindling you, may we nourish our bodies; may the four quarters bow to me. May all the Devas be on my side, Indra with the Maruts, Vishnu and Agni; may the wind blow for my wish. May the Devas bring wealth to me, may my mind's intention be true, may I fall into no sin. Six wide goddesses are asked to make room. Agni is asked to turn back the rivals' wrath; Dhatar, Brihaspati and the Ashvins to guard the yajamana. Through Indra and Agni the rival is driven off.
मम॑ दे॒वा वि॑ह॒वे स॑न्तु॒ सर्व॒ इन्द्र॑वन्तो म॒रुतो॒ विष्णु॑र॒ग्निः ।
ममा॒न्तरि॑क्षमु॒रुलो॑कमस्तु॒ मह्यं॒ वात॑ः पवतां॒ कामे॑ अ॒स्मिन्
mama devā vihave santu sarva indravanto maruto viṣṇuragniḥ |
mamāntarikṣamurulokamastu mahyaṃ vātaḥ pavatāṃ kāme asmin
मयि॑ दे॒वा द्रवि॑ण॒मा य॑जन्तां॒ मय्या॒शीर॑स्तु॒ मयि॑ दे॒वहू॑तिः ।
दैव्या॒ होता॑रो वनुषन्त॒ पूर्वेऽरि॑ष्टाः स्याम त॒न्वा॑ सु॒वीरा॑ः
mayi devā draviṇamā yajantāṃ mayyāśīrastu mayi devahūtiḥ |
daivyā hotāro vanuṣanta pūrve'riṣṭāḥ syāma tanvā suvīrāḥ
मह्यं॑ यजन्तु॒ मम॒ यानि॑ ह॒व्याकू॑तिः स॒त्या मन॑सो मे अस्तु ।
एनो॒ मा नि गां॑ कत॒मच्च॒नाहं विश्वे॑ देवासो॒ अधि॑ वोचता नः
mahyaṃ yajantu mama yāni havyākūtiḥ satyā manaso me astu |
eno mā ni gāṃ katamaccanāhaṃ viśve devāso adhi vocatā naḥ
देवी॑ः षळुर्वीरु॒रु न॑ः कृणोत॒ विश्वे॑ देवास इ॒ह वी॑रयध्वम् ।
मा हा॑स्महि प्र॒जया॒ मा त॒नूभि॒र्मा र॑धाम द्विष॒ते सो॑म राजन्
devīḥ ṣaḻurvīruru naḥ kṛṇota viśve devāsa iha vīrayadhvam |
mā hāsmahi prajayā mā tanūbhirmā radhāma dviṣate soma rājan
अग्ने॑ म॒न्युं प्र॑तिनु॒दन्परे॑षा॒मद॑ब्धो गो॒पाः परि॑ पाहि न॒स्त्वम् ।
प्र॒त्यञ्चो॑ यन्तु नि॒गुत॒ः पुन॒स्ते॒३॒॑ऽमैषां॑ चि॒त्तं प्र॒बुधां॒ वि ने॑शत्
agne manyuṃ pratinudanpareṣāmadabdho gopāḥ pari pāhi nastvam |
pratyañco yantu nigutaḥ punaste'maiṣāṃ cittaṃ prabudhāṃ vi neśat
धा॒ता धा॑तॄ॒णां भुव॑नस्य॒ यस्पति॑र्दे॒वं त्रा॒तार॑मभिमातिषा॒हम् ।
इ॒मं य॒ज्ञम॒श्विनो॒भा बृह॒स्पति॑र्दे॒वाः पा॑न्तु॒ यज॑मानं न्य॒र्थात्
dhātā dhātṝṇāṃ bhuvanasya yaspatirdevaṃ trātāramabhimātiṣāham |
imaṃ yajñamaśvinobhā bṛhaspatirdevāḥ pāntu yajamānaṃ nyarthāt
उ॒रु॒व्यचा॑ नो महि॒षः शर्म॑ यंसद॒स्मिन्हवे॑ पुरुहू॒तः पु॑रु॒क्षुः ।
स न॑ः प्र॒जायै॑ हर्यश्व मृळ॒येन्द्र॒ मा नो॑ रीरिषो॒ मा परा॑ दाः
uruvyacā no mahiṣaḥ śarma yaṃsadasminhave puruhūtaḥ purukṣuḥ |
sa naḥ prajāyai haryaśva mṛḻayendra mā no rīriṣo mā parā dāḥ
ये न॑ः स॒पत्ना॒ अप॒ ते भ॑वन्त्विन्द्रा॒ग्निभ्या॒मव॑ बाधामहे॒ तान् ।
वस॑वो रु॒द्रा आ॑दि॒त्या उ॑परि॒स्पृशं॑ मो॒ग्रं चेत्ता॑रमधिरा॒जम॑क्रन्
ye naḥ sapatnā apa te bhavantvindrāgnibhyāmava bādhāmahe tān |
vasavo rudrā ādityā uparispṛśaṃ mograṃ cettāramadhirājamakran
Text source: Wikisource · CC BY-SA 4.0 (Wikisource transcription of a public-domain text)