Rishi: नोधा गौतमः · Devata: अग्निः · Metre: त्रिष्टुप्
5 verses · 60 of 191
Matarishvan brought Agni to Bhrigu as a gift: the carrier, the famous banner of the yajna, the twice-born messenger who goes straight to his goal. In five trishtubh verses Nodha Gautama calls him the lord of the people, the hotar seated before heaven, honey-tongued, the master of the house in every home, lord of riches. A new praise is born from the heart for him. The Gotamas groom him with their thoughts like a swift horse.
वह्निं॑ य॒शसं॑ वि॒दथ॑स्य के॒तुं सु॑प्रा॒व्यं॑ दू॒तं स॒द्योअ॑र्थम् ।
द्वि॒जन्मा॑नं र॒यिमि॑व प्रश॒स्तं रा॒तिं भ॑र॒द्भृग॑वे मात॒रिश्वा॑
vahniṃ yaśasaṃ vidathasya ketuṃ suprāvyaṃ dūtaṃ sadyoartham |
dvijanmānaṃ rayimiva praśastaṃ rātiṃ bharadbhṛgave mātariśvā
अ॒स्य शासु॑रु॒भया॑सः सचन्ते ह॒विष्म॑न्त उ॒शिजो॒ ये च॒ मर्ता॑ः ।
दि॒वश्चि॒त्पूर्वो॒ न्य॑सादि॒ होता॒पृच्छ्यो॑ वि॒श्पति॑र्वि॒क्षु वे॒धाः
asya śāsurubhayāsaḥ sacante haviṣmanta uśijo ye ca martāḥ |
divaścitpūrvo nyasādi hotāpṛcchyo viśpatirvikṣu vedhāḥ
तं नव्य॑सी हृ॒द आ जाय॑मानम॒स्मत्सु॑की॒र्तिर्मधु॑जिह्वमश्याः ।
यमृ॒त्विजो॑ वृ॒जने॒ मानु॑षास॒ः प्रय॑स्वन्त आ॒यवो॒ जीज॑नन्त
taṃ navyasī hṛda ā jāyamānamasmatsukīrtirmadhujihvamaśyāḥ |
yamṛtvijo vṛjane mānuṣāsaḥ prayasvanta āyavo jījananta
उ॒शिक्पा॑व॒को वसु॒र्मानु॑षेषु॒ वरे॑ण्यो॒ होता॑धायि वि॒क्षु ।
दमू॑ना गृ॒हप॑ति॒र्दम॒ आँ अ॒ग्निर्भु॑वद्रयि॒पती॑ रयी॒णाम्
uśikpāvako vasurmānuṣeṣu vareṇyo hotādhāyi vikṣu |
damūnā gṛhapatirdama ām̐ agnirbhuvadrayipatī rayīṇām
तं त्वा॑ व॒यं पति॑मग्ने रयी॒णां प्र शं॑सामो म॒तिभि॒र्गोत॑मासः ।
आ॒शुं न वा॑जम्भ॒रं म॒र्जय॑न्तः प्रा॒तर्म॒क्षू धि॒याव॑सुर्जगम्यात्
taṃ tvā vayaṃ patimagne rayīṇāṃ pra śaṃsāmo matibhirgotamāsaḥ |
āśuṃ na vājambharaṃ marjayantaḥ prātarmakṣū dhiyāvasurjagamyāt
Text source: Wikisource · CC BY-SA 4.0 (Wikisource transcription of a public-domain text)
