Rishi: सव्य आङ्गिरसः · Devata: इन्द्रः · Metre: जगती
6 verses · 57 of 191
Savya Angirasa brings his thought to Indra, most generous and of true strength, in six jagati verses. His gifts run like water down a slope and cannot be held back. All offerings go to him as waters to a hollow. His golden vajra never sleeps. We who hold on to you are yours, the singers say; no one else receives our words. Heaven and earth bow to his power. With the vajra he cut the great mountain joint by joint and let loose the penned waters to flow.
प्र मंहि॑ष्ठाय बृह॒ते बृ॒हद्र॑ये स॒त्यशु॑ष्माय त॒वसे॑ म॒तिं भ॑रे ।
अ॒पामि॑व प्रव॒णे यस्य॑ दु॒र्धरं॒ राधो॑ वि॒श्वायु॒ शव॑से॒ अपा॑वृतम्
pra maṃhiṣṭhāya bṛhate bṛhadraye satyaśuṣmāya tavase matiṃ bhare |
apāmiva pravaṇe yasya durdharaṃ rādho viśvāyu śavase apāvṛtam
अध॑ ते॒ विश्व॒मनु॑ हासदि॒ष्टय॒ आपो॑ नि॒म्नेव॒ सव॑ना ह॒विष्म॑तः ।
यत्पर्व॑ते॒ न स॒मशी॑त हर्य॒त इन्द्र॑स्य॒ वज्र॒ः श्नथि॑ता हिर॒ण्यय॑ः
adha te viśvamanu hāsadiṣṭaya āpo nimneva savanā haviṣmataḥ |
yatparvate na samaśīta haryata indrasya vajraḥ śnathitā hiraṇyayaḥ
अ॒स्मै भी॒माय॒ नम॑सा॒ सम॑ध्व॒र उषो॒ न शु॑भ्र॒ आ भ॑रा॒ पनी॑यसे ।
यस्य॒ धाम॒ श्रव॑से॒ नामे॑न्द्रि॒यं ज्योति॒रका॑रि ह॒रितो॒ नाय॑से
asmai bhīmāya namasā samadhvara uṣo na śubhra ā bharā panīyase |
yasya dhāma śravase nāmendriyaṃ jyotirakāri harito nāyase
इ॒मे त॑ इन्द्र॒ ते व॒यं पु॑रुष्टुत॒ ये त्वा॒रभ्य॒ चरा॑मसि प्रभूवसो ।
न॒हि त्वद॒न्यो गि॑र्वणो॒ गिर॒ः सघ॑त्क्षो॒णीरि॑व॒ प्रति॑ नो हर्य॒ तद्वच॑ः
ime ta indra te vayaṃ puruṣṭuta ye tvārabhya carāmasi prabhūvaso |
nahi tvadanyo girvaṇo giraḥ saghatkṣoṇīriva prati no harya tadvacaḥ
भूरि॑ त इन्द्र वी॒र्यं१॒॑ तव॑ स्मस्य॒स्य स्तो॒तुर्म॑घव॒न्काम॒मा पृ॑ण ।
अनु॑ ते॒ द्यौर्बृ॑ह॒ती वी॒र्यं॑ मम इ॒यं च॑ ते पृथि॒वी ने॑म॒ ओज॑से
bhūri ta indra vīryaṃ tava smasyasya stoturmaghavankāmamā pṛṇa |
anu te dyaurbṛhatī vīryaṃ mama iyaṃ ca te pṛthivī nema ojase
त्वं तमि॑न्द्र॒ पर्व॑तं म॒हामु॒रुं वज्रे॑ण वज्रिन्पर्व॒शश्च॑कर्तिथ ।
अवा॑सृजो॒ निवृ॑ता॒ः सर्त॒वा अ॒पः स॒त्रा विश्वं॑ दधिषे॒ केव॑लं॒ सह॑ः
tvaṃ tamindra parvataṃ mahāmuruṃ vajreṇa vajrinparvaśaścakartitha |
avāsṛjo nivṛtāḥ sartavā apaḥ satrā viśvaṃ dadhiṣe kevalaṃ sahaḥ
Text source: Wikisource · CC BY-SA 4.0 (Wikisource transcription of a public-domain text)
