Rishi: कुत्स आङ्गिरसः · Devata: ऋभवः · Metre: जगती, ५ त्रिष्टुप्
5 verses · 111 of 191
With skill the Ribhus shaped a well-turning chariot and the two bay horses that carry Indra; they shaped youth for their parents and a mother to stand by her calf. Kutsa Angirasa praises them in jagati. Shape for us too, he asks, vigour for the yajna, food rich in offspring, gain for chariot and horse, a victory that overcomes kin and stranger in battle. He calls Indra lord of the Ribhus, the Maruts, Mitra-Varuna and the Ashvins to speed us to the prize.
तक्ष॒न्रथं॑ सु॒वृतं॑ विद्म॒नाप॑स॒स्तक्ष॒न्हरी॑ इन्द्र॒वाहा॒ वृष॑ण्वसू ।
तक्ष॑न्पि॒तृभ्या॑मृ॒भवो॒ युव॒द्वय॒स्तक्ष॑न्व॒त्साय॑ मा॒तरं॑ सचा॒भुव॑म्
takṣanrathaṃ suvṛtaṃ vidmanāpasastakṣanharī indravāhā vṛṣaṇvasū |
takṣanpitṛbhyāmṛbhavo yuvadvayastakṣanvatsāya mātaraṃ sacābhuvam
आ नो॑ य॒ज्ञाय॑ तक्षत ऋभु॒मद्वय॒ः क्रत्वे॒ दक्षा॑य सुप्र॒जाव॑ती॒मिष॑म् ।
यथा॒ क्षया॑म॒ सर्व॑वीरया वि॒शा तन्न॒ः शर्धा॑य धासथा॒ स्वि॑न्द्रि॒यम्
ā no yajñāya takṣata ṛbhumadvayaḥ kratve dakṣāya suprajāvatīmiṣam |
yathā kṣayāma sarvavīrayā viśā tannaḥ śardhāya dhāsathā svindriyam
आ त॑क्षत सा॒तिम॒स्मभ्य॑मृभवः सा॒तिं रथा॑य सा॒तिमर्व॑ते नरः ।
सा॒तिं नो॒ जैत्रीं॒ सं म॑हेत वि॒श्वहा॑ जा॒मिमजा॑मिं॒ पृत॑नासु स॒क्षणि॑म्
ā takṣata sātimasmabhyamṛbhavaḥ sātiṃ rathāya sātimarvate naraḥ |
sātiṃ no jaitrīṃ saṃ maheta viśvahā jāmimajāmiṃ pṛtanāsu sakṣaṇim
ऋ॒भु॒क्षण॒मिन्द्र॒मा हु॑व ऊ॒तय॑ ऋ॒भून्वाजा॑न्म॒रुत॒ः सोम॑पीतये ।
उ॒भा मि॒त्रावरु॑णा नू॒नम॒श्विना॒ ते नो॑ हिन्वन्तु सा॒तये॑ धि॒ये जि॒षे
ṛbhukṣaṇamindramā huva ūtaya ṛbhūnvājānmarutaḥ somapītaye |
ubhā mitrāvaruṇā nūnamaśvinā te no hinvantu sātaye dhiye jiṣe
ऋ॒भुर्भरा॑य॒ सं शि॑शातु सा॒तिं स॑मर्य॒जिद्वाजो॑ अ॒स्माँ अ॑विष्टु ।
तन्नो॑ मि॒त्रो वरु॑णो मामहन्ता॒मदि॑ति॒ः सिन्धु॑ः पृथि॒वी उ॒त द्यौः
ṛbhurbharāya saṃ śiśātu sātiṃ samaryajidvājo asmām̐ aviṣṭu |
tanno mitro varuṇo māmahantāmaditiḥ sindhuḥ pṛthivī uta dyauḥ
Text source: Wikisource · CC BY-SA 4.0 (Wikisource transcription of a public-domain text)
