Chapter 97: Dhritarashtra recalls the Pandavas for another game

शृणु राजन्पुराऽचिन्त्यानर्जुनस्य च साहसान् ।
अर्जुनो धन्विनां श्रेष्ठो दुष्करं कृतवान्पुरा

śṛṇu rājanpurā'cintyānarjunasya ca sāhasān |
arjuno dhanvināṃ śreṣṭho duṣkaraṃ kṛtavānpurā

द्रुपदस्य पुरे राजन्द्रौपद्याश्च स्वयंवर ॥
आबालवृद्धसङ्क्षोभे सर्वक्षत्रसमागमे ।
क्षिप्रकारी जले मत्स्यं दुर्निरीक्ष्यं ससर्ज ह

drupadasya pure rājandraupadyāśca svayaṃvara ||
ābālavṛddhasaṅkṣobhe sarvakṣatrasamāgame |
kṣiprakārī jale matsyaṃ durnirīkṣyaṃ sasarja ha

सर्वैर्नृपैरसाध्यं तत्कार्मुकप्रवरं च वै ।
क्षणेन सज्यमकरोत्सर्वक्षत्रस्य पश्यतः

sarvairnṛpairasādhyaṃ tatkārmukapravaraṃ ca vai |
kṣaṇena sajyamakarotsarvakṣatrasya paśyataḥ

ततो यन्त्रमयं विध्वा विसारं फल्गुनो बली ।
कृष्णया हेममाल्येन स्कन्धे स परिवेष्टितः

tato yantramayaṃ vidhvā visāraṃ phalguno balī |
kṛṣṇayā hemamālyena skandhe sa pariveṣṭitaḥ

ततस्तया वृतं पार्थं दृष्ट्वा सर्वे नृपास्तदा ।
रोषात्सर्वायुधान्गृह्य क्रुद्धा वीरा महौजसः ।
वैकर्तनं पुरस्कृत्य सर्वे पार्थमुपाद्रवन्

tatastayā vṛtaṃ pārthaṃ dṛṣṭvā sarve nṛpāstadā |
roṣātsarvāyudhāngṛhya kruddhā vīrā mahaujasaḥ |
vaikartanaṃ puraskṛtya sarve pārthamupādravan

स सर्वान्पार्थिवान्दृष्ट्वा क्रुद्धान्पार्थो महाबलः ।
वारयित्वा शरैस्तीक्ष्णैरजयत्तत्र स स्वयम्

sa sarvānpārthivāndṛṣṭvā kruddhānpārtho mahābalaḥ |
vārayitvā śaraistīkṣṇairajayattatra sa svayam

जित्वा तु तान्महीपालान्सर्वान्कर्णपुरोगमान् ।
लेभे कृष्णां शुभां पार्थो युध्वा वीर्यबलात्तदा

jitvā tu tānmahīpālānsarvānkarṇapurogamān |
lebhe kṛṣṇāṃ śubhāṃ pārtho yudhvā vīryabalāttadā

सर्वक्षत्रसमूहेषु अम्बां भीष्मो यथा पुरा ।
ततः कदाचिद्बीभत्सुस्तीर्ययात्रां ययौ स्वयम्

sarvakṣatrasamūheṣu ambāṃ bhīṣmo yathā purā |
tataḥ kadācidbībhatsustīryayātrāṃ yayau svayam

अथोलूपीं शुभां तात नागराजसतां तदा ।
नागेष्वाप वराग्र्येषु प्रार्थितोऽथ यथा तथा

atholūpīṃ śubhāṃ tāta nāgarājasatāṃ tadā |
nāgeṣvāpa varāgryeṣu prārthito'tha yathā tathā

ततो गोदावरीं कृष्णां कावेरीं चावगाहत ।
तत्र पाण्ड्यं समासाद्य तस्य कन्यामवाप सः

tato godāvarīṃ kṛṣṇāṃ kāverīṃ cāvagāhata |
tatra pāṇḍyaṃ samāsādya tasya kanyāmavāpa saḥ

लब्ध्वा जिष्णुर्मुदं तत्र ततो याम्यां दिशं ययौ

labdhvā jiṣṇurmudaṃ tatra tato yāmyāṃ diśaṃ yayau

स दक्षिणं समुद्रान्तं गत्वा चाप्सरसां च वै ।
कुमारतीर्थमासाद्य मोक्षयामास चार्जुनः

sa dakṣiṇaṃ samudrāntaṃ gatvā cāpsarasāṃ ca vai |
kumāratīrthamāsādya mokṣayāmāsa cārjunaḥ

ग्राहरूपाश्च ताः पञ्च अतिशौर्येण वै बलात् ।
कन्यातीर्थं समभ्येत्य ततो द्वारवतीं ययौ ॥ ।

grāharūpāśca tāḥ pañca atiśauryeṇa vai balāt |
kanyātīrthaṃ samabhyetya tato dvāravatīṃ yayau || |

तत्र कृष्णनिदेशात्स सुभद्रां प्राप्य फल्गुनः ।
तामारोप्य रथोपस्थे प्रययौ स्वपुरीं प्रति

tatra kṛṣṇanideśātsa subhadrāṃ prāpya phalgunaḥ |
tāmāropya rathopasthe prayayau svapurīṃ prati

अथादाय गते पार्थे ते श्रुत्वा सर्वयादवाः ।
तमभ्यधावन्त्सङ्क्रुद्धाः सिंहव्याघ्रगणा इव

athādāya gate pārthe te śrutvā sarvayādavāḥ |
tamabhyadhāvantsaṅkruddhāḥ siṃhavyāghragaṇā iva

प्रद्युम्नः कृतवर्मा च गदः सारणसात्यकी ।
आहुकश्चैव साम्बश्च चारुदेष्णो विदूरथः

pradyumnaḥ kṛtavarmā ca gadaḥ sāraṇasātyakī |
āhukaścaiva sāmbaśca cārudeṣṇo vidūrathaḥ

अन्ये च यादवाः सर्वे बलदेवपुरोगमाः ।
एकमेव परे कृष्णं गजवाजिरथैर्युताः

anye ca yādavāḥ sarve baladevapurogamāḥ |
ekameva pare kṛṣṇaṃ gajavājirathairyutāḥ

अथासाद्य वने यान्तं परिवार्य धनञ्जयम् ।
चक्रुर्युद्धं सुसङ्क्रुद्धा बहुकोट्यश्च यादवाः

athāsādya vane yāntaṃ parivārya dhanañjayam |
cakruryuddhaṃ susaṅkruddhā bahukoṭyaśca yādavāḥ

एक एव तु पार्थस्तैर्युद्धं चक्रे सुदारुणम् ।
तेन तेषां समं युद्धं मुहूर्तं प्रबभूव ह

eka eva tu pārthastairyuddhaṃ cakre sudāruṇam |
tena teṣāṃ samaṃ yuddhaṃ muhūrtaṃ prababhūva ha

ततः पार्थो रणे सर्वान्वारयित्वा शितैः शरैः ।
बलाद्विजित्य राजेन्द्र वीरस्तान्सर्वयादवान् ।
तां सुभद्रामथादाय शक्रप्रस्थं विवेश ह

tataḥ pārtho raṇe sarvānvārayitvā śitaiḥ śaraiḥ |
balādvijitya rājendra vīrastānsarvayādavān |
tāṃ subhadrāmathādāya śakraprasthaṃ viveśa ha

भूयः शृणु महाराज फल्गुनस्य च साहसम् ।
ददौ स वह्नेर्बिभत्सुः प्रार्थितं खाण्डवं वनम्

bhūyaḥ śṛṇu mahārāja phalgunasya ca sāhasam |
dadau sa vahnerbibhatsuḥ prārthitaṃ khāṇḍavaṃ vanam

लब्धमात्रे तु तेनाथ भगवान्हव्यवाहनः ।
भक्षितुं खाण्डवं राजंस्तत्रस्थानुपचक्रमे

labdhamātre tu tenātha bhagavānhavyavāhanaḥ |
bhakṣituṃ khāṇḍavaṃ rājaṃstatrasthānupacakrame

ततस्तं भक्षयन्तं वै सव्यसाची विभावसुम् ।
रथा धन्वी शरान्गृह्य स कलापयुतः प्रभुः ।
पालयामास राजेन्द्र स्ववीर्येण महाबलः

tatastaṃ bhakṣayantaṃ vai savyasācī vibhāvasum |
rathā dhanvī śarāngṛhya sa kalāpayutaḥ prabhuḥ |
pālayāmāsa rājendra svavīryeṇa mahābalaḥ

ततः श्रुत्वा महेनद्रस्तु मेघांस्तान्सन्दिदेश ह ।
तेनोक्ता मेघसङ्घास्ते ववर्षुरतिवृष्टिभिः

tataḥ śrutvā mahenadrastu meghāṃstānsandideśa ha |
tenoktā meghasaṅghāste vavarṣurativṛṣṭibhiḥ

ततो मेघगाणान्पार्थः शरव्रातैः समान्ततः ।
खगमैर्वारयामास तदाश्चर्यमिवाभवत्

tato meghagāṇānpārthaḥ śaravrātaiḥ samāntataḥ |
khagamairvārayāmāsa tadāścaryamivābhavat

वारितान्मेघसङ्घांश्च श्रुत्वा क्रुद्धः पुरन्दरः ।
पाण्डरं गजमास्थाय सर्वदेवगणैर्वृतः ।
ययौ पार्थेन संयोद्धुं रक्षार्थं खाण्डवस्य च

vāritānmeghasaṅghāṃśca śrutvā kruddhaḥ purandaraḥ |
pāṇḍaraṃ gajamāsthāya sarvadevagaṇairvṛtaḥ |
yayau pārthena saṃyoddhuṃ rakṣārthaṃ khāṇḍavasya ca

रुद्राश्च मरुतश्चैव वसवश्चाश्विनौ तदा ।
आदित्याश्चैव साध्याश्च निश्वेदेवाश्च भारत ।
गन्धर्वाश्चैव सहिता अन्ये देवगणाश्च ये

rudrāśca marutaścaiva vasavaścāśvinau tadā |
ādityāścaiva sādhyāśca niśvedevāśca bhārata |
gandharvāścaiva sahitā anye devagaṇāśca ye

ते सर्वे शस्त्रसम्पन्ना दीप्यमानाः स्वतेजसा ।
धनञ्जयं जिघांसन्तः प्रपेतुर्विबुधाधिपाः

te sarve śastrasampannā dīpyamānāḥ svatejasā |
dhanañjayaṃ jighāṃsantaḥ prapeturvibudhādhipāḥ

युगान्ते यानि दृश्यन्ते निमित्तानि महान्त्यपि ।
सर्वाणि तत्र दृश्यन्ते निमित्तानि महीपते

yugānte yāni dṛśyante nimittāni mahāntyapi |
sarvāṇi tatra dṛśyante nimittāni mahīpate

ततो देवगमाः सर्वे पार्थं समभिदुद्रुवुः ।
असम्भ्रान्तस्तु तान्दृष्ट्वा स तां देवमयीं चमूम्

tato devagamāḥ sarve pārthaṃ samabhidudruvuḥ |
asambhrāntastu tāndṛṣṭvā sa tāṃ devamayīṃ camūm

त्वरितः फल्गुनो गृह्य तीक्ष्णांस्तानाशुगांस्तदा ।
इन्द्रं देवांश्च सम्प्रेक्ष्य तस्थौ काल इवात्यये

tvaritaḥ phalguno gṛhya tīkṣṇāṃstānāśugāṃstadā |
indraṃ devāṃśca samprekṣya tasthau kāla ivātyaye

ततो देवगणाः सर्वे बीभत्सुं सपुरन्दराः ।
अवाकिरञ्छरव्रातैर्मानुषं तं महीपते

tato devagaṇāḥ sarve bībhatsuṃ sapurandarāḥ |
avākirañcharavrātairmānuṣaṃ taṃ mahīpate

ततः पार्थो महातेजा गाण्डिवं गृह्य सत्वरः ।
वारयामास देवानां शरव्रातैः शरांस्तदा

tataḥ pārtho mahātejā gāṇḍivaṃ gṛhya satvaraḥ |
vārayāmāsa devānāṃ śaravrātaiḥ śarāṃstadā

पुनः क्रुद्धाः सुराः सर्वे मर्त्यं तं सुभहाबलाः ।
नानाशस्त्रैर्ववर्षुस्तं सव्यसाची महीपते

punaḥ kruddhāḥ surāḥ sarve martyaṃ taṃ subhahābalāḥ |
nānāśastrairvavarṣustaṃ savyasācī mahīpate

तान्पार्थः शस्त्रवर्षान्वै विसृष्टान्विबुधैस्तदा ।
द्विधा त्रिधा स चिच्छेद स एव निशितैः शरैः

tānpārthaḥ śastravarṣānvai visṛṣṭānvibudhaistadā |
dvidhā tridhā sa ciccheda sa eva niśitaiḥ śaraiḥ

पुनश्च पार्थः सङ्क्रुद्धो मण्डलीकृतकार्मुकः ।
देवसङ्घाञ्छरैस्तीक्ष्णैरर्पयन्वै समन्ततः

punaśca pārthaḥ saṅkruddho maṇḍalīkṛtakārmukaḥ |
devasaṅghāñcharaistīkṣṇairarpayanvai samantataḥ

ततो देवगणाः सर्वे युध्वा पार्थेन वै मुहुः ।
रणे जेतुमशक्यं तं ज्ञात्वा ते भरतर्षभ

tato devagaṇāḥ sarve yudhvā pārthena vai muhuḥ |
raṇe jetumaśakyaṃ taṃ jñātvā te bharatarṣabha

शान्तास्ते विबुधाः सर्वे पार्थबाणाभिपीडिताः ।
सद्विपं वासवं त्यक्त्वा दुद्रुवुः सर्वतो दिशम्

śāntāste vibudhāḥ sarve pārthabāṇābhipīḍitāḥ |
sadvipaṃ vāsavaṃ tyaktvā dudruvuḥ sarvato diśam

प्राचीं रुद्राः सगन्धर्वा दक्षिणां मरुतो ययुः ।
दिशं प्रतीचीं भीतास्ते वसवश्च तथाऽश्विनौ

prācīṃ rudrāḥ sagandharvā dakṣiṇāṃ maruto yayuḥ |
diśaṃ pratīcīṃ bhītāste vasavaśca tathā'śvinau

आदित्याश्चैव विश्वे च दुद्रुवुर्वा उदङ्मुखाः ।
साध्याश्चोर्ध्वमुखा भीताश्चिन्तयन्तोऽस्य सायकान्

ādityāścaiva viśve ca dudruvurvā udaṅmukhāḥ |
sādhyāścordhvamukhā bhītāścintayanto'sya sāyakān

एवं सुरगणाः सर्वे प्राद्रवन्त्सर्वतो दिशम् ।
मुहुर्मुहुः प्रेक्षमाणाः पार्थमेव सकार्मुकम्

evaṃ suragaṇāḥ sarve prādravantsarvato diśam |
muhurmuhuḥ prekṣamāṇāḥ pārthameva sakārmukam

विद्रुतान्देवसङ्घांस्तान्रणे दृष्ट्वा पुरन्दरः ।
ततः क्रुद्धो महातेजाः पार्थं बाणैरवाकिरत्

vidrutāndevasaṅghāṃstānraṇe dṛṣṭvā purandaraḥ |
tataḥ kruddho mahātejāḥ pārthaṃ bāṇairavākirat

पार्थोऽपि शक्रं विव्याथ मानुषो विबुधाधिपम्

pārtho'pi śakraṃ vivyātha mānuṣo vibudhādhipam

ततः सोऽश्ममयं वर्षं व्यसृजद्विबुधाधिपः ।
तच्छरैरर्जुनो वर्षं प्रतिजाघ्नेऽत्यमर्षणः

tataḥ so'śmamayaṃ varṣaṃ vyasṛjadvibudhādhipaḥ |
taccharairarjuno varṣaṃ pratijāghne'tyamarṣaṇaḥ

अथ संवर्धयामास तद्वर्षं देवराडपि ।
भूय एव महावीर्यं जिज्ञासुः सव्यसाचिनः

atha saṃvardhayāmāsa tadvarṣaṃ devarāḍapi |
bhūya eva mahāvīryaṃ jijñāsuḥ savyasācinaḥ

सोऽश्मवर्षं महावेगमिषुभिः पाण्डवोऽपि च ।
विलयं गमयामास हर्षयन्पाकशासनम्

so'śmavarṣaṃ mahāvegamiṣubhiḥ pāṇḍavo'pi ca |
vilayaṃ gamayāmāsa harṣayanpākaśāsanam

उपादाय तु पाणिभ्यामङ्गदं नाम पर्वतम् ।
सद्रुमं व्यसृजच्छक्रो जिघांसुः श्वेतवाहनम्

upādāya tu pāṇibhyāmaṅgadaṃ nāma parvatam |
sadrumaṃ vyasṛjacchakro jighāṃsuḥ śvetavāhanam

ततोऽर्जुनो वेगवद्भिर्ज्वलमानैरजिह्यगैः ।
बाणैर्विध्वंसयामास गिरिराजं सहस्रधा

tato'rjuno vegavadbhirjvalamānairajihyagaiḥ |
bāṇairvidhvaṃsayāmāsa girirājaṃ sahasradhā

शक्रं च पातयामास शरैः पार्थो महान्युधि ।
ततः शक्रो महाराज रणे वीरं धनञ्जयम्

śakraṃ ca pātayāmāsa śaraiḥ pārtho mahānyudhi |
tataḥ śakro mahārāja raṇe vīraṃ dhanañjayam

ज्ञात्वा जेतुमशक्यं तं तेजोबलसमन्वितम् ।
परां प्रीति ययौ तत्र पुत्रशौर्येण वासवः

jñātvā jetumaśakyaṃ taṃ tejobalasamanvitam |
parāṃ prīti yayau tatra putraśauryeṇa vāsavaḥ

तदा तत्र न तस्यास्ति दिवि कश्चिन्महायशाः ।
समर्थो निर्जये राजन्नपि साक्षात्प्रजापतिः

tadā tatra na tasyāsti divi kaścinmahāyaśāḥ |
samartho nirjaye rājannapi sākṣātprajāpatiḥ

ततः पार्थः शरैर्हत्वा यक्षराक्षसपन्नगान् ।
दीप्ते चाग्नौ महातेजाः पातयामास सन्ततम्

tataḥ pārthaḥ śarairhatvā yakṣarākṣasapannagān |
dīpte cāgnau mahātejāḥ pātayāmāsa santatam

प्रतिषेधयितुं पार्थं न शेकुस्तत्र केचन ।
दृष्ट्वा निवारितं शक्रं दिवि देवगणैः सह

pratiṣedhayituṃ pārthaṃ na śekustatra kecana |
dṛṣṭvā nivāritaṃ śakraṃ divi devagaṇaiḥ saha

यथा सुपर्णः सोमार्थं विबुधानजयत्पुरा ।
तथा जित्वा सुरान्पार्थस्तर्पयामास पावकम्

yathā suparṇaḥ somārthaṃ vibudhānajayatpurā |
tathā jitvā surānpārthastarpayāmāsa pāvakam

ततोऽर्जुनः स्ववीर्येण तर्पयित्वा विभावसुम् ।
रथं ध्वजं च सहयं दिव्यानस्त्रांश्च पाण्डवः

tato'rjunaḥ svavīryeṇa tarpayitvā vibhāvasum |
rathaṃ dhvajaṃ ca sahayaṃ divyānastrāṃśca pāṇḍavaḥ

गाण्डीवं च धनुः श्रेष्ठं तूणी चाक्षयसायकौ ।
एतान्यपि च बीभत्सुर्लेभे कीर्ति च भारत

gāṇḍīvaṃ ca dhanuḥ śreṣṭhaṃ tūṇī cākṣayasāyakau |
etānyapi ca bībhatsurlebhe kīrti ca bhārata

भूयोऽपि शृणु राजेन्द्र पार्थो गत्वोत्तरां दिशम् ।
विजित्य नववर्षांश्च सपुरांश्च सपर्वतान्

bhūyo'pi śṛṇu rājendra pārtho gatvottarāṃ diśam |
vijitya navavarṣāṃśca sapurāṃśca saparvatān

जम्बुद्वीपं वशे कृत्वा सर्वं तद्भरतर्षभ ।
बलाज्जित्वा नृपान्सर्वान्करे चविनिवेश्य च

jambudvīpaṃ vaśe kṛtvā sarvaṃ tadbharatarṣabha |
balājjitvā nṛpānsarvānkare caviniveśya ca

रत्नान्यादाय सर्वाणि गत्वा चैव पुनः पुरीम् ।
ततो ज्येष्ठं महात्मानं धर्मराजं युधिष्ठिरम् ।
राजसूयं क्रतुश्रेष्ठं कारयामास भारत

ratnānyādāya sarvāṇi gatvā caiva punaḥ purīm |
tato jyeṣṭhaṃ mahātmānaṃ dharmarājaṃ yudhiṣṭhiram |
rājasūyaṃ kratuśreṣṭhaṃ kārayāmāsa bhārata

स तान्यन्यानि कर्माणि कृतवानर्जुनः पुरा ।
अर्जुनेन समो वीर्ये त्रिषु लोकेषु न क्वचित्

sa tānyanyāni karmāṇi kṛtavānarjunaḥ purā |
arjunena samo vīrye triṣu lokeṣu na kvacit

देवदानवयक्षाश्च पिशाचोरगराक्षसाः ।
भीष्मद्रोणादयः सर्वे कुरवश्च महारथाः

devadānavayakṣāśca piśācoragarākṣasāḥ |
bhīṣmadroṇādayaḥ sarve kuravaśca mahārathāḥ

लोके सर्वनृपाश्चैव वीराश्चान्ये धनुर्धराः ।
एते पार्थं रणे युक्ताः प्रतियोद्धुं न शक्नुयुः

loke sarvanṛpāścaiva vīrāścānye dhanurdharāḥ |
ete pārthaṃ raṇe yuktāḥ pratiyoddhuṃ na śaknuyuḥ

अहं हि नित्यं कौरव्य फल्गुनं हृदि संस्थितम् ।
अपश्यं चिन्तयित्वा तं समुद्विग्नोऽस्मि तद्भयात्

ahaṃ hi nityaṃ kauravya phalgunaṃ hṛdi saṃsthitam |
apaśyaṃ cintayitvā taṃ samudvigno'smi tadbhayāt

गृहे गृहे च पश्यामि तात पार्थमहं सदा ।
शरगाण्डीवसंयुक्तं पाशहस्तमिवान्तकम्

gṛhe gṛhe ca paśyāmi tāta pārthamahaṃ sadā |
śaragāṇḍīvasaṃyuktaṃ pāśahastamivāntakam

अपि पार्थसहस्राणि भीतः पश्यामि भारत ।
पार्थभूतमिदं सर्वं नगरं प्रतिभाति मे

api pārthasahasrāṇi bhītaḥ paśyāmi bhārata |
pārthabhūtamidaṃ sarvaṃ nagaraṃ pratibhāti me

पार्थमेव हि पश्यामि रहिते तात भारत ।
दृष्ट्वा स्वप्नगतं पार्थमुद्धमामि विचेतनः

pārthameva hi paśyāmi rahite tāta bhārata |
dṛṣṭvā svapnagataṃ pārthamuddhamāmi vicetanaḥ

अकारादीनि नामानि अर्जुनग्रस्तचेतसः ।
अश्वाक्षराम्बुजाश्चैव त्रासं सञ्जनयन्ति मे

akārādīni nāmāni arjunagrastacetasaḥ |
aśvākṣarāmbujāścaiva trāsaṃ sañjanayanti me

नास्ति पार्थादृते तात परवीराद्भयं मम ।
प्रह्लादं वा बलिं वापि हन्याद्धि विजयो रणे

nāsti pārthādṛte tāta paravīrādbhayaṃ mama |
prahlādaṃ vā baliṃ vāpi hanyāddhi vijayo raṇe

तस्मात्तेन महाराज युद्धं नस्तात न क्षमम् ।
अहं तस्य प्रभावज्ञो नित्यं दुःखं वहामि च

tasmāttena mahārāja yuddhaṃ nastāta na kṣamam |
ahaṃ tasya prabhāvajño nityaṃ duḥkhaṃ vahāmi ca

पुरा हि दण्डकारण्ये मारीचस्य यथा भयम् ।
भवेद्रामे महावीर्ये तथा पार्थे भयं मम

purā hi daṇḍakāraṇye mārīcasya yathā bhayam |
bhavedrāme mahāvīrye tathā pārthe bhayaṃ mama

जानाम्येव महद्वीयं जिष्णोरेतद्दुरासदम् ।
एतद्वीरस्य पार्थस्य कार्षीस्त्वं तु विप्रियम्

jānāmyeva mahadvīyaṃ jiṣṇoretaddurāsadam |
etadvīrasya pārthasya kārṣīstvaṃ tu vipriyam

द्यूतं वा शस्त्रयुद्धं वा दुवाक्यं वा कथञ्चन ।
एतेष्वेवं कृते तस्य विग्रहश्चैव वो भवेत्

dyūtaṃ vā śastrayuddhaṃ vā duvākyaṃ vā kathañcana |
eteṣvevaṃ kṛte tasya vigrahaścaiva vo bhavet

तस्मात्त्वं पुत्र पार्थेन नित्यं स्नेहेन वर्तय ।
यश्च पार्थेन सम्बन्धो वर्तते चेन्नरो भुवि

tasmāttvaṃ putra pārthena nityaṃ snehena vartaya |
yaśca pārthena sambandho vartate cennaro bhuvi

तस्य नास्ति भयं किञ्चित्रिषु लोकेषु भारत ।
तस्मात्त्वं जिष्णुना वत्स नित्यं स्नेहेन वर्तय

tasya nāsti bhayaṃ kiñcitriṣu lokeṣu bhārata |
tasmāttvaṃ jiṣṇunā vatsa nityaṃ snehena vartaya

द्यूते पार्थस्य कौरव्य मायया निकृतिः कृता ।
तस्माद्वि नो जयस्तात अन्योपायेन नो भवेत्

dyūte pārthasya kauravya māyayā nikṛtiḥ kṛtā |
tasmādvi no jayastāta anyopāyena no bhavet

उपायश्च न कर्तव्यः पाण्डवान्प्रति भारत ।
पार्थान्प्रति पुरा वत्स बहूपायाः कृतास्त्वया

upāyaśca na kartavyaḥ pāṇḍavānprati bhārata |
pārthānprati purā vatsa bahūpāyāḥ kṛtāstvayā

तानुपायान्हि कौन्तेया बहुशो व्यतिचक्रमुः ।
तस्माद्वितं जीविताय नः कुलस्य जनस्य च

tānupāyānhi kaunteyā bahuśo vyaticakramuḥ |
tasmādvitaṃ jīvitāya naḥ kulasya janasya ca

त्वं चिकीर्षसि चेद्वत्स समित्रः सहबान्धवः ।
सभ्रातृकस्त्वं पार्थेन नित्यं स्नेहेन वर्तय

tvaṃ cikīrṣasi cedvatsa samitraḥ sahabāndhavaḥ |
sabhrātṛkastvaṃ pārthena nityaṃ snehena vartaya

धृतराष्ट्रवचः श्रुत्वा राजा दुर्योधनस्तदा ।
चिन्तयित्वा मुहूर्तं तु विधिना चोदितोऽब्रवीत्

dhṛtarāṣṭravacaḥ śrutvā rājā duryodhanastadā |
cintayitvā muhūrtaṃ tu vidhinā codito'bravīt

पुनर्दीव्याम भद्रं ते वनवासाय पाण्डवैः ।
एवमेतान्वशे कर्तुं शक्ष्यामः पुरुषर्षभ ॥ष

punardīvyāma bhadraṃ te vanavāsāya pāṇḍavaiḥ |
evametānvaśe kartuṃ śakṣyāmaḥ puruṣarṣabha ||ṣa

ते वा द्वादश वर्षाणि वयं वा द्यूतनिर्जिताः ।
प्रविशेम महारण्यमजिनैः प्रतिवासिताः

te vā dvādaśa varṣāṇi vayaṃ vā dyūtanirjitāḥ |
praviśema mahāraṇyamajinaiḥ prativāsitāḥ

त्रयोदशं च स्वजनैरज्ञाताः परिवत्सरम् ।
ज्ञाताश्च पुनरन्यानि वने वर्षाणि द्वादश

trayodaśaṃ ca svajanairajñātāḥ parivatsaram |
jñātāśca punaranyāni vane varṣāṇi dvādaśa

निवसेम वयं ते वा तथा द्यूतं प्रवर्तताम् ।
अक्षानुप्त्वा पुनर्द्यूतमिदं कुर्वन्तु पाण्डवः

nivasema vayaṃ te vā tathā dyūtaṃ pravartatām |
akṣānuptvā punardyūtamidaṃ kurvantu pāṇḍavaḥ

एतत्कृत्यतमं राजन्नस्माकं भरतर्षभ ।
अयं हि शकुनिर्वेद सविद्यामक्षसम्पदम्

etatkṛtyatamaṃ rājannasmākaṃ bharatarṣabha |
ayaṃ hi śakunirveda savidyāmakṣasampadam

दृढमूलं वयं राज्ये मित्राणि परिगृह्य च ।
सारवद्विपुलं सैन्यं सत्कृत्य च दुरासदम्

dṛḍhamūlaṃ vayaṃ rājye mitrāṇi parigṛhya ca |
sāravadvipulaṃ sainyaṃ satkṛtya ca durāsadam

ते च त्रयोदशं वर्षं पारयिष्यन्ति चेद्व्रतम् ।
जेष्यामस्तान्वयं राजत्रोचतां ते परन्तप

te ca trayodaśaṃ varṣaṃ pārayiṣyanti cedvratam |
jeṣyāmastānvayaṃ rājatrocatāṃ te parantapa

तूर्णं प्रत्यानयस्वैतान्कामं व्यध्वगतानपि ।
आगच्छन्तु पुनर्द्यूतमिदं कुर्वन्तु पाण्डवः

tūrṇaṃ pratyānayasvaitānkāmaṃ vyadhvagatānapi |
āgacchantu punardyūtamidaṃ kurvantu pāṇḍavaḥ

ततो द्रोणः सोमदत्तो बाह्लीकश्चैव गौतमः ।
विदुरो द्रोणपुत्रश्च वैश्यापुत्रश्च वीर्यवान्

tato droṇaḥ somadatto bāhlīkaścaiva gautamaḥ |
viduro droṇaputraśca vaiśyāputraśca vīryavān

भूरिश्रवाः शान्तनवो विकर्णश्च महारथः ।
मा द्यूतमित्यभाषन्त शमोऽस्त्विति च सर्वशः

bhūriśravāḥ śāntanavo vikarṇaśca mahārathaḥ |
mā dyūtamityabhāṣanta śamo'stviti ca sarvaśaḥ

अकामानां च सर्वेषां सुहृदामर्थदर्शिनाम् ।
अकरोत्पाण्डवाह्वानं धृतराष्ट्रः सुतप्रियः

akāmānāṃ ca sarveṣāṃ suhṛdāmarthadarśinām |
akarotpāṇḍavāhvānaṃ dhṛtarāṣṭraḥ sutapriyaḥ

अथाब्रवीन्महाराज धृतराष्ट्रं जनेश्वरम् ।
पुत्रहार्दाद्धर्मयुक्ता गान्धारी शोककर्शिता

athābravīnmahārāja dhṛtarāṣṭraṃ janeśvaram |
putrahārdāddharmayuktā gāndhārī śokakarśitā

जाते दुर्योधने क्षत्ता महामतिरभाषत ।
नीयतां परलोकाय साध्वयं कुलपांसनः

jāte duryodhane kṣattā mahāmatirabhāṣata |
nīyatāṃ paralokāya sādhvayaṃ kulapāṃsanaḥ

व्यनदज्जातमात्रो हि गोमायुरिव भारत ।
अन्तो नूनं कुलस्यास्य कुरवस्तन्निबोधत

vyanadajjātamātro hi gomāyuriva bhārata |
anto nūnaṃ kulasyāsya kuravastannibodhata

मा निमज्जीः स्वदोषेण महाप्सु त्वं हि भारत ।
मा बालानामशिष्टानामभिमंस्था मतिं प्रभो

mā nimajjīḥ svadoṣeṇa mahāpsu tvaṃ hi bhārata |
mā bālānāmaśiṣṭānāmabhimaṃsthā matiṃ prabho

मा कुलस्य क्षये घोरे कारणं त्वं भविष्यसि ।
बद्धं सेतुं को नु भिन्द्याद्धमेच्छान्तं च पावकम्

mā kulasya kṣaye ghore kāraṇaṃ tvaṃ bhaviṣyasi |
baddhaṃ setuṃ ko nu bhindyāddhamecchāntaṃ ca pāvakam

शमे स्थितान्को नु पार्थान्कोपयेद्भरतर्षभ ।
स्मरन्तं त्वामाजमीढं स्मारयिष्याम्यहं पुनः

śame sthitānko nu pārthānkopayedbharatarṣabha |
smarantaṃ tvāmājamīḍhaṃ smārayiṣyāmyahaṃ punaḥ

शास्त्रं न शास्ति दुर्बुद्धिं श्रेयसे चेतराय च ।
न वै वृद्धो बालमतिर्भवेद्राजन्कथञ्चन

śāstraṃ na śāsti durbuddhiṃ śreyase cetarāya ca |
na vai vṛddho bālamatirbhavedrājankathañcana

त्वन्नेत्राः सन्तु ते पुत्रा मा त्वां दीर्णाः प्रहासिषुः ।
तस्मादयं मद्वचनात्त्यज्यतां कुलपांसनः

tvannetrāḥ santu te putrā mā tvāṃ dīrṇāḥ prahāsiṣuḥ |
tasmādayaṃ madvacanāttyajyatāṃ kulapāṃsanaḥ

तथा ते न कृतं राजन्पुत्रस्नेहान्नराधिप ।
तस्य प्राप्तं फलं विद्धि कुलान्तकरणाय यत्

tathā te na kṛtaṃ rājanputrasnehānnarādhipa |
tasya prāptaṃ phalaṃ viddhi kulāntakaraṇāya yat

शमेन धर्मेण नयेन युक्ता
या ते बुद्धिः साऽस्तु ते मा प्रमादीः ।
प्रध्वंसिनी क्रूरसमाहिता श्री-
र्मृदुप्रौढा गच्छति पुत्रपौत्रान्

śamena dharmeṇa nayena yuktā
yā te buddhiḥ sā'stu te mā pramādīḥ |
pradhvaṃsinī krūrasamāhitā śrī-
rmṛduprauḍhā gacchati putrapautrān

अथाब्रवीन्महाराजो गान्धारीं धर्मदर्शिनीम् ।
अन्तः कामं कुलस्यास्तु न शक्नोमि निवारितुम्

athābravīnmahārājo gāndhārīṃ dharmadarśinīm |
antaḥ kāmaṃ kulasyāstu na śaknomi nivāritum

यथेच्छन्ति तथैवास्तु प्रत्यागच्छन्तु पाण्डवाः ।
पुनर्द्यूतं च कुर्वन्तु मामकाः पाण्डवैः सह

yathecchanti tathaivāstu pratyāgacchantu pāṇḍavāḥ |
punardyūtaṃ ca kurvantu māmakāḥ pāṇḍavaiḥ saha