Chapter 32: Arjuna returns and Karna loses three brothers

प्रतिघातं तु सैन्यस्य नामृष्यत वृकोदरः ।
सोऽभ्याहनद्गुरुं षष्ट्या कर्णं च दशभिः शरैः

pratighātaṃ tu sainyasya nāmṛṣyata vṛkodaraḥ |
so'bhyāhanadguruṃ ṣaṣṭyā karṇaṃ ca daśabhiḥ śaraiḥ

तस्य द्रोणः शितैर्बाणैस्तीक्ष्णधारैरजिह्मगैः ।
जीवितान्तमभिप्रेप्सुर्मर्मण्याशु जघान ह

tasya droṇaḥ śitairbāṇaistīkṣṇadhārairajihmagaiḥ |
jīvitāntamabhiprepsurmarmaṇyāśu jaghāna ha

आनन्तर्यमभिप्रेप्सुः षड्विंशत्या शमार्पयत् ।
कर्णो द्वादशभिर्बाणैरश्वत्थामा च सप्तभिः

ānantaryamabhiprepsuḥ ṣaḍviṃśatyā śamārpayat |
karṇo dvādaśabhirbāṇairaśvatthāmā ca saptabhiḥ

षङ्भिर्दुर्योधनो राजा तत एनमथाकिरत् ।
भीमसेनोऽपि तान्सर्वान्प्रत्यविध्यन्महाबलः

ṣaṅbhirduryodhano rājā tata enamathākirat |
bhīmaseno'pi tānsarvānpratyavidhyanmahābalaḥ

द्रोणं पञ्चाशतेषूणां कर्णं च दशभिः शरैः ।
दर्योधनं द्वादशभिर्दौणिमष्टाभिराशुगैः

droṇaṃ pañcāśateṣūṇāṃ karṇaṃ ca daśabhiḥ śaraiḥ |
daryodhanaṃ dvādaśabhirdauṇimaṣṭābhirāśugaiḥ

आरावं तुमुलं कुर्वन्नभ्यवर्तत तान्रणे ।
तस्मिन्सन्त्यति प्रामान्मृत्युसाधारणीकृते

ārāvaṃ tumulaṃ kurvannabhyavartata tānraṇe |
tasminsantyati prāmānmṛtyusādhāraṇīkṛte

अजातशत्रुस्तान्योधान्भीमं त्रातेत्यचोदयत् ।
ते ययुर्भीमसेनस्य समीपममितौजसः

ajātaśatrustānyodhānbhīmaṃ trātetyacodayat |
te yayurbhīmasenasya samīpamamitaujasaḥ

युयुधानप्रभृतयो माद्रीपुत्रौ च पाण्डवौ ।
ते समेत्य सुसंरब्धाः सहिताः पुरुषर्षभाः

yuyudhānaprabhṛtayo mādrīputrau ca pāṇḍavau |
te sametya susaṃrabdhāḥ sahitāḥ puruṣarṣabhāḥ

महेष्वासवरैर्गुप्ता द्रोणानीकं बिभित्सवः ।
समापेतुर्महावीर्या भीमप्रभृतयो रथाः

maheṣvāsavarairguptā droṇānīkaṃ bibhitsavaḥ |
samāpeturmahāvīryā bhīmaprabhṛtayo rathāḥ

तान्प्रत्यगृह्णादव्यग्रो द्रोणोऽपि रथिनां वरः ।
महारथानतिबलान्वीरान्समरयोधिनः

tānpratyagṛhṇādavyagro droṇo'pi rathināṃ varaḥ |
mahārathānatibalānvīrānsamarayodhinaḥ

बाह्यं मृत्युभयं कृत्वा तावकान्पाण्डवा ययुः ।
सादिनः सादिनोऽब्यघ्नंस्तथैव रथिनो रथान्

bāhyaṃ mṛtyubhayaṃ kṛtvā tāvakānpāṇḍavā yayuḥ |
sādinaḥ sādino'byaghnaṃstathaiva rathino rathān

असिशक्त्यृष्टिसङ्घातैर्युद्धमासीत्परश्वथैः ।
प्रकृष्टमसियुद्धं च बभूव कटुकोदयम्

asiśaktyṛṣṭisaṅghātairyuddhamāsītparaśvathaiḥ |
prakṛṣṭamasiyuddhaṃ ca babhūva kaṭukodayam

कुञ्जराणां च सम्पाते युद्धमासीत्सुदारुणम् ।
अपतत्कुञ्जरादन्यो हयादन्यस्त्ववाक्शिराः

kuñjarāṇāṃ ca sampāte yuddhamāsītsudāruṇam |
apatatkuñjarādanyo hayādanyastvavākśirāḥ

नरो बाणविनिर्भिन्नो रथादन्यश्च मारिष ।
तत्रान्यस्य च सम्पर्दे पतितस्य विवर्मणः

naro bāṇavinirbhinno rathādanyaśca māriṣa |
tatrānyasya ca samparde patitasya vivarmaṇaḥ

शिरः प्रध्वंसयामास वक्षस्याक्रम्य कुञ्जरः ।
अपरांश्चापरेऽमृद्रन्वारणाः पतितान्नरान्

śiraḥ pradhvaṃsayāmāsa vakṣasyākramya kuñjaraḥ |
aparāṃścāpare'mṛdranvāraṇāḥ patitānnarān

विषाणैश्चावनिं गत्वा व्यभिन्दन्रथिनो बहून् ।
नरान्त्रैः केचिदपरे विषाणालग्नसंश्रयैः

viṣāṇaiścāvaniṃ gatvā vyabhindanrathino bahūn |
narāntraiḥ kecidapare viṣāṇālagnasaṃśrayaiḥ

बभ्रमुः समरे नागा मृद्रन्तः शतशो नरान् ।
कार्ष्णायसतनुत्राणान्नराश्वरथकुञ्जरान्

babhramuḥ samare nāgā mṛdrantaḥ śataśo narān |
kārṣṇāyasatanutrāṇānnarāśvarathakuñjarān

पतितान्पोथयाञ्चक्रुर्द्विपाः स्थूलनलानिव ।
गृध्रपत्राधिवासांसि शयनानि नारधिपाः

patitānpothayāñcakrurdvipāḥ sthūlanalāniva |
gṛdhrapatrādhivāsāṃsi śayanāni nāradhipāḥ

हीमन्तः कालसम्पर्कात्सुदुःस्वान्यनुशेरते ।
हन्ति स्मात्र पिता पुत्रं रथेनाभ्येत्य संयुगे

hīmantaḥ kālasamparkātsuduḥsvānyanuśerate |
hanti smātra pitā putraṃ rathenābhyetya saṃyuge

पुत्रश्च पितरं मोहान्निर्मर्यादमवर्तत ।
रथो भग्नो ध्वजश्छिन्नश्छत्रमुर्व्यों निपातितम्

putraśca pitaraṃ mohānnirmaryādamavartata |
ratho bhagno dhvajaśchinnaśchatramurvyoṃ nipātitam

युगार्धं च्छिन्नमादाय प्रदुद्राव तथा हयः ।
सासिर्बाहुर्निपतितः शिरश्छिन्नं सकुण्डलम्

yugārdhaṃ cchinnamādāya pradudrāva tathā hayaḥ |
sāsirbāhurnipatitaḥ śiraśchinnaṃ sakuṇḍalam

गजेनाक्षिप्य बलिना रथः सञ्चूर्णितः क्षितौ ।
रथिना ताडितो नागो नाराचेनापतत्क्षितौ

gajenākṣipya balinā rathaḥ sañcūrṇitaḥ kṣitau |
rathinā tāḍito nāgo nārācenāpatatkṣitau

सारोहश्चापतद्वाजी गेजेनाभ्याहतो भृशम् ।
निर्मर्यादं महद्युद्धमवर्तत सुदारुणम्

sārohaścāpatadvājī gejenābhyāhato bhṛśam |
nirmaryādaṃ mahadyuddhamavartata sudāruṇam

हा तात हा पुत्र सखे क्वासि तिष्ठ क्व धावसि ।
प्रहराहर जह्मेनं स्मितश्वेडितगर्जितैः ।
इत्येवमुच्चैरत्यर्थं श्रूयन्ते विविधा गिरः

hā tāta hā putra sakhe kvāsi tiṣṭha kva dhāvasi |
praharāhara jahmenaṃ smitaśveḍitagarjitaiḥ |
ityevamuccairatyarthaṃ śrūyante vividhā giraḥ

नरस्याश्वस्य नाग्स्य समसञ्जत शोणितम् ।
उपाशाम्यद्रजो भौमं भीरून्कश्मलमाविशत्

narasyāśvasya nāgsya samasañjata śoṇitam |
upāśāmyadrajo bhaumaṃ bhīrūnkaśmalamāviśat

चक्रेण चक्रमासाद्य वीरो वीरस्य संयुगे ।
अतीतेषुपथे काले जहार गदया सिरः

cakreṇa cakramāsādya vīro vīrasya saṃyuge |
atīteṣupathe kāle jahāra gadayā siraḥ

असीत्केशपरामर्शो मुष्टियुद्धं च दारुणम् ।
नखैर्दन्तैश्च सूराणामद्वीपे द्वीपमिच्छताम्

asītkeśaparāmarśo muṣṭiyuddhaṃ ca dāruṇam |
nakhairdantaiśca sūrāṇāmadvīpe dvīpamicchatām

तत्राच्छिद्यत शूरस्य सखङ्गो बाहुरुद्यतः ।
सधुनश्चापरस्यापि सशरः साङ्कुशस्तथा

tatrācchidyata śūrasya sakhaṅgo bāhurudyataḥ |
sadhunaścāparasyāpi saśaraḥ sāṅkuśastathā

आक्रोशदन्यमन्योऽत्र तथाऽन्यो विमुखोऽद्रवत् ।
अन्यः प्राप्तस्य चान्यस्य शिरः कायादपाहरत्

ākrośadanyamanyo'tra tathā'nyo vimukho'dravat |
anyaḥ prāptasya cānyasya śiraḥ kāyādapāharat

सशब्दमद्रवच्चान्यः शब्दादन्योऽत्रसद्भृशम् ।
स्वानन्योऽथ परानन्यो जघान निशितैः शरैः

saśabdamadravaccānyaḥ śabdādanyo'trasadbhṛśam |
svānanyo'tha parānanyo jaghāna niśitaiḥ śaraiḥ

गिरिशृङ्गोपमश्चात्र नाराचेन निपातितः ।
मातङ्गो न्यपतद्भूमौ नदीरोध इवोष्णगे

giriśṛṅgopamaścātra nārācena nipātitaḥ |
mātaṅgo nyapatadbhūmau nadīrodha ivoṣṇage

तथैव रथिनं नागः क्षरन्गिरिरिवारुजन् ।
अभ्यतिष्ठत्पदा भूमौ सहाश्वं सहसारथिम्

tathaiva rathinaṃ nāgaḥ kṣarangiririvārujan |
abhyatiṣṭhatpadā bhūmau sahāśvaṃ sahasārathim

शूरान्प्रहरतो दृष्ट्वा कृताश्स्त्रान्रुधिरोक्षितान् ।
बहूनप्याविशन्मोहो भीरून्हृदयदुर्बलान्

śūrānpraharato dṛṣṭvā kṛtāśstrānrudhirokṣitān |
bahūnapyāviśanmoho bhīrūnhṛdayadurbalān

सर्वमाविग्नमभवन्न प्राज्ञायत किञ्चन ।
सैन्येन रजसा ध्वस्तं निर्मर्यादमवर्तत

sarvamāvignamabhavanna prājñāyata kiñcana |
sainyena rajasā dhvastaṃ nirmaryādamavartata

ततः सेनापतिः शीघ्रमयं क्राल इति ब्रुवन् ।
नित्याभित्वरितानेव त्वरयामास पाण्डवान्

tataḥ senāpatiḥ śīghramayaṃ krāla iti bruvan |
nityābhitvaritāneva tvarayāmāsa pāṇḍavān

कुर्वन्तः शासनं तस्य पाण्डवा बाहुशालिनः ।
सरो हंसा इवापेतुर्घ्नन्तो द्रोणरथं प्रति

kurvantaḥ śāsanaṃ tasya pāṇḍavā bāhuśālinaḥ |
saro haṃsā ivāpeturghnanto droṇarathaṃ prati

गृह्णीताद्रवतान्योन्यं विभीता विनिकृन्तत ।
इत्यासीत्तुमुलः शब्दो दुर्धर्षस्य रथं प्रति

gṛhṇītādravatānyonyaṃ vibhītā vinikṛntata |
ityāsīttumulaḥ śabdo durdharṣasya rathaṃ prati

ततो द्रोणः कृपः कर्णो द्रौणी राजा जयद्रथः ।
विन्दानुविन्दावावन्त्यौ शल्यश्चैतान्न्यवारयन्

tato droṇaḥ kṛpaḥ karṇo drauṇī rājā jayadrathaḥ |
vindānuvindāvāvantyau śalyaścaitānnyavārayan

ते त्वार्यधर्मसंरब्धा दुर्निवारा दुरासदाः ।
शरार्ता न जहुर्द्रोणं पाञ्चालाः पाण्डवै सह

te tvāryadharmasaṃrabdhā durnivārā durāsadāḥ |
śarārtā na jahurdroṇaṃ pāñcālāḥ pāṇḍavai saha

ततो द्रोणोऽतिसंक्रुद्धो विसृजञ्शतशः शरान् ।
चेदिपाञ्चालपाण्डूनामकरोत्कदनं महत्

tato droṇo'tisaṃkruddho visṛjañśataśaḥ śarān |
cedipāñcālapāṇḍūnāmakarotkadanaṃ mahat

तस्य ज्यातलनिर्घोषः शुश्रुवे दिक्षं मारिष ।
वज्रसंह्रादसङ्काशस्त्रासयन्मानवान्बहून्

tasya jyātalanirghoṣaḥ śuśruve dikṣaṃ māriṣa |
vajrasaṃhrādasaṅkāśastrāsayanmānavānbahūn

एतस्मिन्नन्तरे जिष्णुर्जित्वा संशप्तकान्बहून् ।
अभ्ययात्तत्र यत्रासौ द्रोणः पाण्डून्प्रमर्दति

etasminnantare jiṣṇurjitvā saṃśaptakānbahūn |
abhyayāttatra yatrāsau droṇaḥ pāṇḍūnpramardati

ताञ्शरौघान्महावर्ताञ्शोणितोदान्महाहदान् ।
तीर्णः संशप्तकान्हत्वा प्रत्यदृश्यत फल्गुनः

tāñśaraughānmahāvartāñśoṇitodānmahāhadān |
tīrṇaḥ saṃśaptakānhatvā pratyadṛśyata phalgunaḥ

तस्य कीर्तिमतो लक्ष्म सूर्यप्रतिमतेजसः ।
दीप्यमानमपश्याम तेजसा वानरध्वजम्

tasya kīrtimato lakṣma sūryapratimatejasaḥ |
dīpyamānamapaśyāma tejasā vānaradhvajam

संशप्तकसमुद्रं तमुच्छोष्यास्त्रगभस्तिभिः ।
स पाण्डवयुगान्तार्कः कुरूनप्यभ्यतीतपत्

saṃśaptakasamudraṃ tamucchoṣyāstragabhastibhiḥ |
sa pāṇḍavayugāntārkaḥ kurūnapyabhyatītapat

प्रददाह कुरून्सर्वानर्जुनः शस्त्रतेजसा ।
युगान्ते सर्वभूतानि धूमकेतुरिवोत्थितः

pradadāha kurūnsarvānarjunaḥ śastratejasā |
yugānte sarvabhūtāni dhūmaketurivotthitaḥ

तेन बाणसहस्रौधैर्गजाश्वरथयोधिनः ।
ताड्यमानाः क्षितिं जग्मुर्मुक्तकेशाःशरार्दिताः

tena bāṇasahasraudhairgajāśvarathayodhinaḥ |
tāḍyamānāḥ kṣitiṃ jagmurmuktakeśāḥśarārditāḥ

केचिदार्तस्वनं चक्रुर्विनेशुरपरे पुनः ।
पार्थबाणहताः केचिन्निपेतुर्विगतासवः

kecidārtasvanaṃ cakrurvineśurapare punaḥ |
pārthabāṇahatāḥ kecinnipeturvigatāsavaḥ

तेषामुत्पतितान्कांश्चित्पतितांश्च पराङ्मुखान् ।
न जघानार्जुनो योधान्योधव्रतमनुस्मरन्

teṣāmutpatitānkāṃścitpatitāṃśca parāṅmukhān |
na jaghānārjuno yodhānyodhavratamanusmaran

ते विकीर्णरथाश्चित्राः प्रायशश्च पराङ्मुखः ।
कुरवः कर्णकर्णेति हाहेति च विचुक्रुशुः

te vikīrṇarathāścitrāḥ prāyaśaśca parāṅmukhaḥ |
kuravaḥ karṇakarṇeti hāheti ca vicukruśuḥ

तमाधिरथिराक्रन्दं विज्ञाय शरणैषिणाम् ।
मा भैष्टेति प्रतिश्रुत्य ययावभिमुखोऽर्जुनम्

tamādhirathirākrandaṃ vijñāya śaraṇaiṣiṇām |
mā bhaiṣṭeti pratiśrutya yayāvabhimukho'rjunam

स भारतरथश्रेष्ठः सर्वभारतहर्षणः ।
प्रादुश्चक्रे तदाग्नेयमस्त्रमस्त्रविदां वारः

sa bhāratarathaśreṣṭhaḥ sarvabhārataharṣaṇaḥ |
prāduścakre tadāgneyamastramastravidāṃ vāraḥ

तस्य दीप्तशरौघस्य दीप्तचापधरस्य च ।
वारुणेन तदस्त्रेण विधूयाथ धनञ्जयः ।
शरौघाञ्शरजालेन विदुधाव धनञ्जयः

tasya dīptaśaraughasya dīptacāpadharasya ca |
vāruṇena tadastreṇa vidhūyātha dhanañjayaḥ |
śaraughāñśarajālena vidudhāva dhanañjayaḥ

तथैवाधिरथिस्तस्य बाणाज्ज्वलिततेजसः ।
अस्त्रमस्त्रेण संवार्य प्राणदद्विसृजञ्शरान्

tathaivādhirathistasya bāṇājjvalitatejasaḥ |
astramastreṇa saṃvārya prāṇadadvisṛjañśarān

धृष्टद्युम्नश्च भीमश्च सात्यकिश्च महारथः ।
विव्यधुः कर्णमासाद्य त्रिभिस्त्रिभिरजिह्मगैः

dhṛṣṭadyumnaśca bhīmaśca sātyakiśca mahārathaḥ |
vivyadhuḥ karṇamāsādya tribhistribhirajihmagaiḥ

अर्जुनास्त्रं तु राधेयः संवार्य शरवृष्टिभिः ।
तेषां त्रयाणां चापानि चिच्छेद विशिखैस्त्रिभिः

arjunāstraṃ tu rādheyaḥ saṃvārya śaravṛṣṭibhiḥ |
teṣāṃ trayāṇāṃ cāpāni ciccheda viśikhaistribhiḥ

ते निकृत्तायुघाः शूरा निर्विषा भुजगा इव ।
रथशक्तीः समुत्क्षिप्य भृशं सिंहा इवानदन्

te nikṛttāyughāḥ śūrā nirviṣā bhujagā iva |
rathaśaktīḥ samutkṣipya bhṛśaṃ siṃhā ivānadan

ता भुजाग्रैर्महावेगा निसृष्टा भुजगोपमाः ।
दीप्यमाना महाशक्त्यो जग्मुराधिरथिं प्रति

tā bhujāgrairmahāvegā nisṛṣṭā bhujagopamāḥ |
dīpyamānā mahāśaktyo jagmurādhirathiṃ prati

ता निकृत्य शरव्रातैस्त्रिभिस्त्रिभिरजिह्मगैः ।
ननाद बलवान्कर्णः पार्थाय विसृजञ्शरान्

tā nikṛtya śaravrātaistribhistribhirajihmagaiḥ |
nanāda balavānkarṇaḥ pārthāya visṛjañśarān

अर्जुनश्चापि राधेयं विद्ध्वा सप्तभिराशुगैः ।
कर्णादवरजं बाणैर्जघान निशितैः शरैः

arjunaścāpi rādheyaṃ viddhvā saptabhirāśugaiḥ |
karṇādavarajaṃ bāṇairjaghāna niśitaiḥ śaraiḥ

ततः शत्रुंजयं हत्वा पार्थः षङ्भिरजिह्मगैः ।
जहार सद्यो भल्लेन विपाटस्य शिरो रथात्

tataḥ śatruṃjayaṃ hatvā pārthaḥ ṣaṅbhirajihmagaiḥ |
jahāra sadyo bhallena vipāṭasya śiro rathāt

पश्यतां धार्तराष्ट्राणामेकेनैव किरीटिना ।
प्रमुखे सूतपुत्रस्य सोदर्या निहतास्त्रयः

paśyatāṃ dhārtarāṣṭrāṇāmekenaiva kirīṭinā |
pramukhe sūtaputrasya sodaryā nihatāstrayaḥ

ततो भीमः समुत्पत्य स्वरथाद्वैनतेयवत् ।
वरासिना कर्णपक्षाञ्जधान दश पञ्च च

tato bhīmaḥ samutpatya svarathādvainateyavat |
varāsinā karṇapakṣāñjadhāna daśa pañca ca

पुनस्तु रथमास्थाय धनुरादाय चापरम् ।
विव्याध दशभिः कर्णं सूतमश्वांश्च पञ्चभिः

punastu rathamāsthāya dhanurādāya cāparam |
vivyādha daśabhiḥ karṇaṃ sūtamaśvāṃśca pañcabhiḥ

धृष्टद्युम्नोऽप्यसिवरं चर्म चादाय भास्वरम् ।
जघान चन्द्रवर्माणं बृहत्क्षत्रं च नैषधम्

dhṛṣṭadyumno'pyasivaraṃ carma cādāya bhāsvaram |
jaghāna candravarmāṇaṃ bṛhatkṣatraṃ ca naiṣadham

ततः स्वरथमास्थाय पाञ्चाल्योऽन्यच्च कार्मुकम् ।
आदाय कर्णं विव्याध त्रिसप्तत्या नदन्रणे

tataḥ svarathamāsthāya pāñcālyo'nyacca kārmukam |
ādāya karṇaṃ vivyādha trisaptatyā nadanraṇe

शैनेयोऽप्यन्यदादाय धनुरिन्दुसमद्युतिः ।
सूतपुत्रं चतुःषष्ट्या विद्ध्वा सिंह इवानदत्

śaineyo'pyanyadādāya dhanurindusamadyutiḥ |
sūtaputraṃ catuḥṣaṣṭyā viddhvā siṃha ivānadat

भल्लाभ्यां साधु मुक्ताभ्यां छित्त्वा कर्णस्य कार्मुकम् ।
पुनः कर्णं त्रिभिर्बाणैर्बाह्वोरुरसि चार्पयत्

bhallābhyāṃ sādhu muktābhyāṃ chittvā karṇasya kārmukam |
punaḥ karṇaṃ tribhirbāṇairbāhvorurasi cārpayat

ततो दुर्योधनो द्रोणो राजा चैव जयद्रथः ।
निम़ज्जमानं राधेयमुज्जह्रुः सात्यकार्णवात्

tato duryodhano droṇo rājā caiva jayadrathaḥ |
nima़jjamānaṃ rādheyamujjahruḥ sātyakārṇavāt

पत्त्यश्वरथमातङ्गास्त्वदीयाः शतशोऽपरे ।
कर्णमेवाभ्यधावन्त त्रास्यमानाः प्रहारिणः

pattyaśvarathamātaṅgāstvadīyāḥ śataśo'pare |
karṇamevābhyadhāvanta trāsyamānāḥ prahāriṇaḥ

धृष्टद्युम्नश्च भीमश्च सौभद्रोऽर्जुन एव च ।
नकुलः सहदेवश्च सात्यकिं जुगुपू रणे

dhṛṣṭadyumnaśca bhīmaśca saubhadro'rjuna eva ca |
nakulaḥ sahadevaśca sātyakiṃ jugupū raṇe

एवमेष महारौद्रः क्षयार्थं सर्वधन्विनाम् ।
तावकानां परेषां च त्यक्त्वा प्राणानभूद्रणः ॥
पदातिरथनागाश्वा गजाश्वरथपत्तिभिः ।
रथिनो नागपत्त्यश्वैरथ पत्तीरथ द्विपैः

evameṣa mahāraudraḥ kṣayārthaṃ sarvadhanvinām |
tāvakānāṃ pareṣāṃ ca tyaktvā prāṇānabhūdraṇaḥ ||
padātirathanāgāśvā gajāśvarathapattibhiḥ |
rathino nāgapattyaśvairatha pattīratha dvipaiḥ

अश्वैरश्वा गजैर्नागा रथिनो रथिभिः सह ।
संयुक्ताः समदृश्यन्त पत्तयश्चापि पत्तिभिः ॥
एवं सुकलिलं युद्धमासीत्क्रव्यादहर्षणम् ।
महद्भिस्तैरभीतानां यमराष्ट्रविवर्धनम्

aśvairaśvā gajairnāgā rathino rathibhiḥ saha |
saṃyuktāḥ samadṛśyanta pattayaścāpi pattibhiḥ ||
evaṃ sukalilaṃ yuddhamāsītkravyādaharṣaṇam |
mahadbhistairabhītānāṃ yamarāṣṭravivardhanam

ततो हता नररथवाजिकुञ्जरै
रनेकशो द्विपरथपत्तिवाजिनः ।
गजैर्गजा रथिभिरुदायुधा रथा ।
हयैर्हयाः पत्तिगणैश्च पत्तयः

tato hatā nararathavājikuñjarai
ranekaśo dviparathapattivājinaḥ |
gajairgajā rathibhirudāyudhā rathā |
hayairhayāḥ pattigaṇaiśca pattayaḥ

रथैर्द्विपा द्विरदवरैर्महाहया
हयैर्नरा वररथिभिश्च वाजिनः ।
निरस्तजिह्वादशनेक्षणाः क्षितौ
क्षयं गताः प्रमथितवर्मभूषणाः

rathairdvipā dviradavarairmahāhayā
hayairnarā vararathibhiśca vājinaḥ |
nirastajihvādaśanekṣaṇāḥ kṣitau
kṣayaṃ gatāḥ pramathitavarmabhūṣaṇāḥ

तथा परैर्बहुकरणैर्वरायुधै-
र्हता गताः प्रतिभयदर्शनाः क्षितिम् ।
विपोथिता हयगजपादताडिता
भृशाकुला रथमुखनेमिभिः क्षताः

tathā parairbahukaraṇairvarāyudhai-
rhatā gatāḥ pratibhayadarśanāḥ kṣitim |
vipothitā hayagajapādatāḍitā
bhṛśākulā rathamukhanemibhiḥ kṣatāḥ

प्रमोदने श्वापदपक्षिरक्षसां
जनक्षये वर्तति तत्र दारुणे ।
महाबलास्ते कुपिताः परस्परं
निषूदयन्तः प्रविचेरुरोजसा

pramodane śvāpadapakṣirakṣasāṃ
janakṣaye vartati tatra dāruṇe |
mahābalāste kupitāḥ parasparaṃ
niṣūdayantaḥ pravicerurojasā

ततो बले भृशलुलिते परस्परं
निरीक्षमाणे रुधिरौघसम्प्लुते ।
दिवाकरेऽस्तंगिरिमास्थिते शनै
रुभे प्रयाते शिबिराय भारत

tato bale bhṛśalulite parasparaṃ
nirīkṣamāṇe rudhiraughasamplute |
divākare'staṃgirimāsthite śanai
rubhe prayāte śibirāya bhārata