Chapter 10: Dhritarashtra asks who checked each Pandava hero

एवं पृष्ट्वा सूतपुत्रं हृच्छोकेनार्दितो भृशम् ।
जये निराशः पुत्राणां धृतराष्ट्रोऽपतत्क्षितौ

evaṃ pṛṣṭvā sūtaputraṃ hṛcchokenārdito bhṛśam |
jaye nirāśaḥ putrāṇāṃ dhṛtarāṣṭro'patatkṣitau

तं विसंज्ञं निपतिन्त सिषिचुः परिचारिकाः ।
जलेनात्यर्थशीतेन जीवन्त्यः पुण्यगन्धिना

taṃ visaṃjñaṃ nipatinta siṣicuḥ paricārikāḥ |
jalenātyarthaśītena jīvantyaḥ puṇyagandhinā

पतितं चैनमालोक्य समस्ता भरतस्त्रियः ।
परिवव्रुर्महाराजमस्पृशंश्चैव पाणिभिः

patitaṃ cainamālokya samastā bharatastriyaḥ |
parivavrurmahārājamaspṛśaṃścaiva pāṇibhiḥ

उत्थाप्य चैनं शनकै राजानं पृथिवीतलात् ।
आसनं प्रापयामासुर्बाष्पकण्ठ्यो वराननाः

utthāpya cainaṃ śanakai rājānaṃ pṛthivītalāt |
āsanaṃ prāpayāmāsurbāṣpakaṇṭhyo varānanāḥ

आसनं प्राप्य राजा तु मूर्च्छयाऽभिपरिप्लुतः ।
निश्चेष्टोऽतिष्ठत तदा वीज्यमानः समन्ततः

āsanaṃ prāpya rājā tu mūrcchayā'bhipariplutaḥ |
niśceṣṭo'tiṣṭhata tadā vījyamānaḥ samantataḥ

स लब्ध्वा शनकैः संज्ञां वेपमानो महीपतिः ।
पुनर्गावल्गणिं सूतं पर्यपृच्छद्यथातथम्

sa labdhvā śanakaiḥ saṃjñāṃ vepamāno mahīpatiḥ |
punargāvalgaṇiṃ sūtaṃ paryapṛcchadyathātatham

यः स उद्यन्निवादित्यो ज्योतिषा प्रणुदंस्तमः ।
अजातशत्रुमायान्तं कस्तं द्रोणादवारयत्

yaḥ sa udyannivādityo jyotiṣā praṇudaṃstamaḥ |
ajātaśatrumāyāntaṃ kastaṃ droṇādavārayat

प्रभिन्नमिव मातङ्गं यथा क्रुद्धं तरस्विनम् ।
प्रसन्नवदनं दृष्ट्वा प्रतिद्विरदगामिनम्

prabhinnamiva mātaṅgaṃ yathā kruddhaṃ tarasvinam |
prasannavadanaṃ dṛṣṭvā pratidviradagāminam

वासितासङ्गमे यद्वदजय्यं प्रतियूथपैः ।
निजघान रणे वीरान्वीरः पुरुषसत्तमः

vāsitāsaṅgame yadvadajayyaṃ pratiyūthapaiḥ |
nijaghāna raṇe vīrānvīraḥ puruṣasattamaḥ

यो ह्येको हि महावीर्यो निर्दहेद्धोरचक्षुषा ।
कृत्स्नं दुर्योधनबलं धृतिमान्सत्यसङ्गरः

yo hyeko hi mahāvīryo nirdaheddhoracakṣuṣā |
kṛtsnaṃ duryodhanabalaṃ dhṛtimānsatyasaṅgaraḥ

चक्षुर्हणं जये सक्तमिष्वासधरमच्युतम् ।
दान्तं बहुमतं लोके के शूराः पर्यवारयन्

cakṣurhaṇaṃ jaye saktamiṣvāsadharamacyutam |
dāntaṃ bahumataṃ loke ke śūrāḥ paryavārayan

के दुष्प्रधर्षं राजानमिष्वासधरमच्युतम् ।
समासेदुर्नरव्याघ्रं कौन्तेयं तत्र मामकाः

ke duṣpradharṣaṃ rājānamiṣvāsadharamacyutam |
samāsedurnaravyāghraṃ kaunteyaṃ tatra māmakāḥ

तरसैवाभिपद्याथ यो वै द्रोणमुपाद्रवत् ।
यः करोति महत्कर्म शत्रूणां वै महाबलः

tarasaivābhipadyātha yo vai droṇamupādravat |
yaḥ karoti mahatkarma śatrūṇāṃ vai mahābalaḥ

महाकायो महोत्साहो नागायुतसमो बले ।
तं भीमसेनमायान्तं के शूराः पर्यवारयन्

mahākāyo mahotsāho nāgāyutasamo bale |
taṃ bhīmasenamāyāntaṃ ke śūrāḥ paryavārayan

यदायाज्जलदप्रख्यो रथः परमवीर्यवान् ।
पर्जन्य इव बीभत्सुस्तुमुलामशनीं सृजन्

yadāyājjaladaprakhyo rathaḥ paramavīryavān |
parjanya iva bībhatsustumulāmaśanīṃ sṛjan

विसृजञ्छरजालानि वर्षाणि मघवानिव ।
अवस्फूर्जन्दिशः सर्वास्तलनेमिस्वनेन च

visṛjañcharajālāni varṣāṇi maghavāniva |
avasphūrjandiśaḥ sarvāstalanemisvanena ca

चापविद्युत्प्रभो घोरो रथगुल्मवलाहकः ।
सनेमिघोषस्तनितः शरशब्दातिबन्धुरः

cāpavidyutprabho ghoro rathagulmavalāhakaḥ |
sanemighoṣastanitaḥ śaraśabdātibandhuraḥ

रोषनिर्जितजीमूतो मनोभिप्रायशीघ्रगः ।
मर्मातिगो बाणधरस्तुमुलः शोणितोदकैः

roṣanirjitajīmūto manobhiprāyaśīghragaḥ |
marmātigo bāṇadharastumulaḥ śoṇitodakaiḥ

सम्प्लावयन्दिशः सर्वा मानवैरास्तरन्महीम् ।
भीमनिःस्वनितो रौद्रो दुर्योधनपुरोगमान्

samplāvayandiśaḥ sarvā mānavairāstaranmahīm |
bhīmaniḥsvanito raudro duryodhanapurogamān

युद्धेऽभ्यषिञ्चद्विजयो गार्ध्रपत्रैः शिलाशितैः ।
गाण्डीवं धारयन्धीमान्कीदृशं वो मनस्तदा

yuddhe'bhyaṣiñcadvijayo gārdhrapatraiḥ śilāśitaiḥ |
gāṇḍīvaṃ dhārayandhīmānkīdṛśaṃ vo manastadā

इषुसम्बाधमाकाशं कुर्वन्कपिवरध्वजः ।
यदायात्कथमासीत्तु तदा पार्थं समीक्षताम्

iṣusambādhamākāśaṃ kurvankapivaradhvajaḥ |
yadāyātkathamāsīttu tadā pārthaṃ samīkṣatām

कच्चिद्गाण्डीवशब्देन न प्रणश्यति वै बलम् ।
यद्वः सभैरवं कुर्वन्नर्जुनो भृशमन्वयात्

kaccidgāṇḍīvaśabdena na praṇaśyati vai balam |
yadvaḥ sabhairavaṃ kurvannarjuno bhṛśamanvayāt

कच्चिन्नापानुदत्प्रामानिषुभिर्वो धनञ्जयः ।
वातो वेगादिवाविध्यन्मेघाञ्शरगणैर्नृपान्

kaccinnāpānudatprāmāniṣubhirvo dhanañjayaḥ |
vāto vegādivāvidhyanmeghāñśaragaṇairnṛpān

को हि गाण्डीवधन्वानं रणे सोढुं नरोऽर्हति ।
यमुषश्चुत्य सेनाग्रे जनः सर्वो विदीर्यते

ko hi gāṇḍīvadhanvānaṃ raṇe soḍhuṃ naro'rhati |
yamuṣaścutya senāgre janaḥ sarvo vidīryate

यत्सेनाः समकम्पन्त यद्वीरानस्पृशद्भयम् ।
के तत्र नाजहुर्द्रोणं के क्षुद्राः प्राद्रवन्भयात्

yatsenāḥ samakampanta yadvīrānaspṛśadbhayam |
ke tatra nājahurdroṇaṃ ke kṣudrāḥ prādravanbhayāt

के वा तत्र तनूस्त्यक्त्वा प्रतीपं मृत्युमाव्रजन् ।
अमानुषाणां जेतारं युद्धेष्वपि धनञ्जयम्

ke vā tatra tanūstyaktvā pratīpaṃ mṛtyumāvrajan |
amānuṣāṇāṃ jetāraṃ yuddheṣvapi dhanañjayam

न च वेगं सिताश्वस्य विसहिष्यन्ति मामकाः ।
गाण्डीवस्य च निर्घोषं प्रावृड्‌जलदनिःस्वनम्

na ca vegaṃ sitāśvasya visahiṣyanti māmakāḥ |
gāṇḍīvasya ca nirghoṣaṃ prāvṛḍ‌jaladaniḥsvanam

विष्वक्सेनो यस्य यन्ता यस्य योद्धा धनञ्चयः ।
अशक्यः स रथो जेतुं मन्ये देवासुरैरपि

viṣvakseno yasya yantā yasya yoddhā dhanañcayaḥ |
aśakyaḥ sa ratho jetuṃ manye devāsurairapi

सुकुमारो युवा शूरो दर्शनीयश्च पाण्डवः ।
मेधावी निपुणो धीमान्युधि सत्यपराक्रमः

sukumāro yuvā śūro darśanīyaśca pāṇḍavaḥ |
medhāvī nipuṇo dhīmānyudhi satyaparākramaḥ

आरावं विपुलं कुर्वन्व्यथयन्सर्वसैनिकान् ।
यदायान्नकुलो द्रोणं के शूराः पर्यवारयन्

ārāvaṃ vipulaṃ kurvanvyathayansarvasainikān |
yadāyānnakulo droṇaṃ ke śūrāḥ paryavārayan

आशीविष इव क्रुद्धः सहदेवो यदाऽभ्ययात् ।
कदनं करिष्यञ्शत्रूणां तेजसा दुर्जयो युधि

āśīviṣa iva kruddhaḥ sahadevo yadā'bhyayāt |
kadanaṃ kariṣyañśatrūṇāṃ tejasā durjayo yudhi

आर्यव्रतममोघेषुं हीमन्तमपराजितम् ।
सहदेवं तमायान्तं के शूराः पर्यवारयन्

āryavratamamogheṣuṃ hīmantamaparājitam |
sahadevaṃ tamāyāntaṃ ke śūrāḥ paryavārayan

यस्तु सौवीरराजस्य प्रमथ्य महतीं चमूम् ।
आदत्त महिषीं भोजां काम्यां सर्वाङ्गशोभनाम्

yastu sauvīrarājasya pramathya mahatīṃ camūm |
ādatta mahiṣīṃ bhojāṃ kāmyāṃ sarvāṅgaśobhanām

सत्यं धृतिश्च शौर्यं च ब्रह्मचर्यं च केवलम् ।
सर्वाणि युयुधानेऽस्मिन्नित्यानि पुरुषर्षभे

satyaṃ dhṛtiśca śauryaṃ ca brahmacaryaṃ ca kevalam |
sarvāṇi yuyudhāne'sminnityāni puruṣarṣabhe

बलिनं सत्यकर्माणमदीनमपराजितम् ।
वासुदेवसमं युद्धे वासुदेवादनन्तरम्

balinaṃ satyakarmāṇamadīnamaparājitam |
vāsudevasamaṃ yuddhe vāsudevādanantaram

धनञ्जयोपदेशेन श्रेष्ठमिष्वस्त्रकर्मणि ।
पार्थेन सममस्त्रेषु कस्तं द्रोणादवारयत्

dhanañjayopadeśena śreṣṭhamiṣvastrakarmaṇi |
pārthena samamastreṣu kastaṃ droṇādavārayat

वृष्णीनां प्रवरं वीरं शूरं सर्वधनुष्मताम् ।
रामेण सममस्त्रेषु यशसा विक्रमेण च

vṛṣṇīnāṃ pravaraṃ vīraṃ śūraṃ sarvadhanuṣmatām |
rāmeṇa samamastreṣu yaśasā vikrameṇa ca

सत्यं धृतिर्मतिः शौर्यं ब्राह्मं चास्त्रमनुत्तमम् ।
सात्वते तानि सर्वाणि त्रैलोक्यमिव केशवे

satyaṃ dhṛtirmatiḥ śauryaṃ brāhmaṃ cāstramanuttamam |
sātvate tāni sarvāṇi trailokyamiva keśave

तमेवङ्गुणसम्पन्नं दुर्वारमपि दैवतैः ।
समासाद्य महेष्वासं के शूराः पर्यवारयन्

tamevaṅguṇasampannaṃ durvāramapi daivataiḥ |
samāsādya maheṣvāsaṃ ke śūrāḥ paryavārayan

पाञ्चालेषूत्तमं वीरमुत्तमाभिजनप्रियम् ।
नित्यमुत्तमकर्माणमुत्तमौजसमाहवे

pāñcāleṣūttamaṃ vīramuttamābhijanapriyam |
nityamuttamakarmāṇamuttamaujasamāhave

युक्तं धनञ्जयहिते ममानर्थार्थमुत्थितम् ।
यमवैश्रवणादित्यमहेन्द्रवरुणोपमम्

yuktaṃ dhanañjayahite mamānarthārthamutthitam |
yamavaiśravaṇādityamahendravaruṇopamam

महारथं समाख्यातं द्रोणायोद्यतमाहवे ।
त्यजन्तं तुमुले प्राणान्के शूराः समवारयन्

mahārathaṃ samākhyātaṃ droṇāyodyatamāhave |
tyajantaṃ tumule prāṇānke śūrāḥ samavārayan

एकोपसृत्य चेदिभ्यः पाण्डवान्यः समाश्रितः ।
धृष्टकेतुं समायान्तं द्रोणं कस्तं न्यवारयत्

ekopasṛtya cedibhyaḥ pāṇḍavānyaḥ samāśritaḥ |
dhṛṣṭaketuṃ samāyāntaṃ droṇaṃ kastaṃ nyavārayat

योऽवधीत्केतुमान्वीरो राजपुत्रं दुरासदम् ।
अपरान्तगिरिद्वारे द्रोणात्कस्तं न्यवारयत्

yo'vadhītketumānvīro rājaputraṃ durāsadam |
aparāntagiridvāre droṇātkastaṃ nyavārayat

स्त्रीम्पुसयोर्नरव्याघ्रो यः स वेद गुणागुणान् ।
शिखण्डिनं याज्ञसेनिमम्लानमनसं युधि

strīmpusayornaravyāghro yaḥ sa veda guṇāguṇān |
śikhaṇḍinaṃ yājñasenimamlānamanasaṃ yudhi

देवव्रतस्य समरे हेतुं मृत्योर्महात्मनः ।
द्रोणायाभिमुखं यान्तं के शूराः पर्यवारयन्

devavratasya samare hetuṃ mṛtyormahātmanaḥ |
droṇāyābhimukhaṃ yāntaṃ ke śūrāḥ paryavārayan

यस्मिन्नभ्यधिका वीरे गुणाः सर्वे धनञ्जयात् ।
यस्मिन्नस्त्राणि सत्यं च ब्रह्मचर्यं च सर्वदा

yasminnabhyadhikā vīre guṇāḥ sarve dhanañjayāt |
yasminnastrāṇi satyaṃ ca brahmacaryaṃ ca sarvadā

वासुदेवसमं वीर्ये धनञ्जयसमं बले ।
तेजसाऽऽदित्यसदृशं बृहस्पतिसमं मतौ

vāsudevasamaṃ vīrye dhanañjayasamaṃ bale |
tejasā''dityasadṛśaṃ bṛhaspatisamaṃ matau

अभिमन्युं महात्मानं व्यात्ताननमिवान्तकम् ।
द्रोणायाभिमुखं यान्तं के शूराः समवारयन्

abhimanyuṃ mahātmānaṃ vyāttānanamivāntakam |
droṇāyābhimukhaṃ yāntaṃ ke śūrāḥ samavārayan

तरुणस्तरुणप्रज्ञः सौभद्रः परवीरहा ।
यदाभ्यधावद्वै द्रोणं तदाऽऽसीद्वो मनः कथं

taruṇastaruṇaprajñaḥ saubhadraḥ paravīrahā |
yadābhyadhāvadvai droṇaṃ tadā''sīdvo manaḥ kathaṃ

द्रौपदेया नरव्याघ्राः समुद्रमिव सिन्धवः ।
यद्रोणमाद्रवन्सङ्ख्ये के शूरास्तान्न्यवारयन्

draupadeyā naravyāghrāḥ samudramiva sindhavaḥ |
yadroṇamādravansaṅkhye ke śūrāstānnyavārayan

एते द्वादश वर्षाणि क्रीडामुत्सृज्य बालकाः ।
अस्त्रार्थमवसन्भीष्मे बिभ्रतो व्रतमुत्तमम्

ete dvādaśa varṣāṇi krīḍāmutsṛjya bālakāḥ |
astrārthamavasanbhīṣme bibhrato vratamuttamam

क्षत्रञ्जयः क्षत्रदेवः क्षत्रवर्मा च मानदः ।
धृष्टद्युम्नात्मजा वीराः के तान्द्रोणादवारयन्

kṣatrañjayaḥ kṣatradevaḥ kṣatravarmā ca mānadaḥ |
dhṛṣṭadyumnātmajā vīrāḥ ke tāndroṇādavārayan

शताद्विशिष्टं यं युद्धे सममन्यन्त वृष्णयः ।
चेकितानं महेष्वासं कस्तं द्रोणादवारयत्

śatādviśiṣṭaṃ yaṃ yuddhe samamanyanta vṛṣṇayaḥ |
cekitānaṃ maheṣvāsaṃ kastaṃ droṇādavārayat

वार्धक्षेमिः कलिङ्गानां यः कन्यामाहरद्युधि ।
अनाधृष्टिरदीनात्मा कस्तं द्रोणादवारयत्

vārdhakṣemiḥ kaliṅgānāṃ yaḥ kanyāmāharadyudhi |
anādhṛṣṭiradīnātmā kastaṃ droṇādavārayat

भ्रातरः पञ्च कैकेया धार्मिकाः सत्यविक्रमाः ।
इन्द्रगोपकसङ्काशा रक्तवर्मायुधध्वजाः

bhrātaraḥ pañca kaikeyā dhārmikāḥ satyavikramāḥ |
indragopakasaṅkāśā raktavarmāyudhadhvajāḥ

मातृष्वसुः सुता वीराः पाण्डवानां जयार्थिनः ।
तान्द्रोणं हन्तुमायातान्के वीराः पर्यवारयन्

mātṛṣvasuḥ sutā vīrāḥ pāṇḍavānāṃ jayārthinaḥ |
tāndroṇaṃ hantumāyātānke vīrāḥ paryavārayan

यं योधयन्तो राजानो नाजयन्वारणावते ।
षण्मासानपि संरब्धा जिघांसन्तो युधां पतिं

yaṃ yodhayanto rājāno nājayanvāraṇāvate |
ṣaṇmāsānapi saṃrabdhā jighāṃsanto yudhāṃ patiṃ

धनुष्मतां वरं शूरं सत्यसन्धं महाबलम् ।
द्रोणात्कस्तं नरव्याघ्रं युयुत्सुं पर्यवारयत्

dhanuṣmatāṃ varaṃ śūraṃ satyasandhaṃ mahābalam |
droṇātkastaṃ naravyāghraṃ yuyutsuṃ paryavārayat

यः पुत्रं काशिराजस्य वाराणस्यां महारथम् ।
समरे स्त्रीषु गृध्यन्तं भल्लेनापाहरद्रथात्

yaḥ putraṃ kāśirājasya vārāṇasyāṃ mahāratham |
samare strīṣu gṛdhyantaṃ bhallenāpāharadrathāt

धृष्टद्युम्नं महेष्वासं पार्थानां मन्त्रधारिणम् ।
युक्तं दुर्योधनानर्थे सृष्टं द्रोणवधाय च

dhṛṣṭadyumnaṃ maheṣvāsaṃ pārthānāṃ mantradhāriṇam |
yuktaṃ duryodhanānarthe sṛṣṭaṃ droṇavadhāya ca

निर्दहन्तं रणे योधान्दारयन्तं च सर्वतः ।
द्रोणाभिमुखमायान्तं के शूराः पर्यवारयन्

nirdahantaṃ raṇe yodhāndārayantaṃ ca sarvataḥ |
droṇābhimukhamāyāntaṃ ke śūrāḥ paryavārayan

उत्सङ्ग इव सम्वृद्धं द्रुपदस्यास्त्रवित्तमम् ।
शैखण्डिनं शस्त्रगुप्तं के द्रोणादवारयन्

utsaṅga iva samvṛddhaṃ drupadasyāstravittamam |
śaikhaṇḍinaṃ śastraguptaṃ ke droṇādavārayan

य इमां पृथिवीं कृत्स्नां चर्मवत्समवेष्टयत् ।
महता रथघोषेण मुख्यारिघ्नो महारथः

ya imāṃ pṛthivīṃ kṛtsnāṃ carmavatsamaveṣṭayat |
mahatā rathaghoṣeṇa mukhyārighno mahārathaḥ

दशाश्वमेधानाजहे स्वन्नपानाप्तदक्षिणान् ।
निरर्गलान्सर्वमेधान्पुत्रवत्पालयन्प्रजाः

daśāśvamedhānājahe svannapānāptadakṣiṇān |
nirargalānsarvamedhānputravatpālayanprajāḥ

विसृष्टा दक्षिणा यस्य गङ्गाजलमवारयत् ।
गङ्गास्रोतसि यावत्यः सिकता अप्यशेषतः ।
तावतीर्गा ददौ वीर उशीनरसुतोऽध्वरे

visṛṣṭā dakṣiṇā yasya gaṅgājalamavārayat |
gaṅgāsrotasi yāvatyaḥ sikatā apyaśeṣataḥ |
tāvatīrgā dadau vīra uśīnarasuto'dhvare

न पूर्वे नापरे चक्रुरिदं केचन मानवाः ।
इतीदं चुक्रुशुर्देवाः कृते कर्मणि दुष्करे

na pūrve nāpare cakruridaṃ kecana mānavāḥ |
itīdaṃ cukruśurdevāḥ kṛte karmaṇi duṣkare

पश्यामस्त्रिषु लोकेषु न तं संस्थास्नुचारिषु ।
जातं चापि जनिष्यन्तं द्वितीयं चापि साम्प्रतम्

paśyāmastriṣu lokeṣu na taṃ saṃsthāsnucāriṣu |
jātaṃ cāpi janiṣyantaṃ dvitīyaṃ cāpi sāmpratam

अन्यमौशीनराच्छेब्याद्धुरो वोढारमित्युत ।
गतिं यस्य न यास्यन्ति मानुषा लोकवासिनः

anyamauśīnarācchebyāddhuro voḍhāramityuta |
gatiṃ yasya na yāsyanti mānuṣā lokavāsinaḥ

तस्य नप्तारमायान्तं शैब्यं कः समवारयत् ।
द्रोणायाभिमुखं यत्तं व्यात्ताननमिवान्तकम्

tasya naptāramāyāntaṃ śaibyaṃ kaḥ samavārayat |
droṇāyābhimukhaṃ yattaṃ vyāttānanamivāntakam

विराटस्य रथानीकं मत्स्यस्यामित्रघातिनः ।
प्रेप्सन्तं समरे द्रोणं के वीराः पर्यवारयन्

virāṭasya rathānīkaṃ matsyasyāmitraghātinaḥ |
prepsantaṃ samare droṇaṃ ke vīrāḥ paryavārayan

सद्यो वृकोदराज्जातो महाबलपराक्रमः ।
मायावी राक्षसो वीरो यस्मान्मम महद्भयम्

sadyo vṛkodarājjāto mahābalaparākramaḥ |
māyāvī rākṣaso vīro yasmānmama mahadbhayam

पार्थानां जयकामं तं तं पुत्राणां मम कण्टकम् ।
घटोत्कचं महात्मानं कस्तं द्रोणादवारयत्

pārthānāṃ jayakāmaṃ taṃ taṃ putrāṇāṃ mama kaṇṭakam |
ghaṭotkacaṃ mahātmānaṃ kastaṃ droṇādavārayat

एते चान्ये च बहवो येषामजितं युधि ।
त्यक्तारः संयुगे प्राणान्किं तेषामजितं युधि

ete cānye ca bahavo yeṣāmajitaṃ yudhi |
tyaktāraḥ saṃyuge prāṇānkiṃ teṣāmajitaṃ yudhi

येषां च पुरुषव्याघ्रः शार्ङ्गधन्वा व्यपाश्रयः ॥
लोकानां गुरुरत्यर्थं लोकनाथः सनातनः ।

yeṣāṃ ca puruṣavyāghraḥ śārṅgadhanvā vyapāśrayaḥ ||
lokānāṃ gururatyarthaṃ lokanāthaḥ sanātanaḥ |

नारायणोरणे नाथो दिव्यो दिव्यात्मकः प्रभुः ॥
यस्य दिव्यानि कर्माणि प्रवदन्ति मनीषिणः ।

nārāyaṇoraṇe nātho divyo divyātmakaḥ prabhuḥ ||
yasya divyāni karmāṇi pravadanti manīṣiṇaḥ |

तान्यहं कीर्तयिष्यामि भक्त्या स्थैर्यार्थमात्मनः

tānyahaṃ kīrtayiṣyāmi bhaktyā sthairyārthamātmanaḥ