Chapter 83: Mixed births, their callings and conduct

अर्थाश्रयाद्वा कामाद्वा वर्णानां चाप्यनिश्चयात् ।
अज्ञानाद्वापि वर्णानां जायते वर्णसङ्करः

arthāśrayādvā kāmādvā varṇānāṃ cāpyaniścayāt |
ajñānādvāpi varṇānāṃ jāyate varṇasaṅkaraḥ

तेषामेतेन विधिना जातानां वर्णसङ्करे ।
को धर्मः कानि कर्माणि तन्मे ब्रूहि पितामह

teṣāmetena vidhinā jātānāṃ varṇasaṅkare |
ko dharmaḥ kāni karmāṇi tanme brūhi pitāmaha

चातुर्वर्ण्यस्य कर्माणि चातुर्वर्ण्यं च केवलम् ।
असृजत्स हि यज्ञार्थे पूर्वमेव प्रजापतिः

cāturvarṇyasya karmāṇi cāturvarṇyaṃ ca kevalam |
asṛjatsa hi yajñārthe pūrvameva prajāpatiḥ

भार्याश्चतस्नो विप्रस्य द्वयोरात्मा प्रजायते ।
आनुपूर्व्याद्द्वयोर्हीनौ मातृजात्यौ प्रसूयतः

bhāryāścatasno viprasya dvayorātmā prajāyate |
ānupūrvyāddvayorhīnau mātṛjātyau prasūyataḥ

परं शवाद्ब्राह्मणस्यैव पुत्रः
शूद्रापुत्रं पारशवं तमाहुः ।
शुश्रूषकः स्वस्य कुलस्य स स्या-
त्स्वचारित्रं नित्यमथो न जह्यात्

paraṃ śavādbrāhmaṇasyaiva putraḥ
śūdrāputraṃ pāraśavaṃ tamāhuḥ |
śuśrūṣakaḥ svasya kulasya sa syā-
tsvacāritraṃ nityamatho na jahyāt

सर्वानुपायानथ सम्प्रधार्य
समुद्धरेत्स्वस्य कुलस्य तन्त्रम् ।
ज्येष्ठो यवीयानपि यो द्विजस्य
शुश्रूषया दानपरायणः स्यात्

sarvānupāyānatha sampradhārya
samuddharetsvasya kulasya tantram |
jyeṣṭho yavīyānapi yo dvijasya
śuśrūṣayā dānaparāyaṇaḥ syāt

तिस्रः क्षत्रियसम्बन्धाद्द्वयोरात्माऽस्य जायते ।
हीनवर्णास्तृतीयायां शूद्रा उग्रा इति स्मृतिः

tisraḥ kṣatriyasambandhāddvayorātmā'sya jāyate |
hīnavarṇāstṛtīyāyāṃ śūdrā ugrā iti smṛtiḥ

द्वे चापि भार्ये वैश्यस्य द्वयोरात्माऽस्व जायते ।
शूद्रा शूद्रस्य चाप्येका शूद्रमेव प्रजायते

dve cāpi bhārye vaiśyasya dvayorātmā'sva jāyate |
śūdrā śūdrasya cāpyekā śūdrameva prajāyate

अतोऽविशिष्टस्त्वधमो गुरुदारप्रधर्षकः ।
ब्राह्यं वर्णं जनयति चातुर्वर्ण्यविगर्हितम्

ato'viśiṣṭastvadhamo gurudārapradharṣakaḥ |
brāhyaṃ varṇaṃ janayati cāturvarṇyavigarhitam

अयाज्यं क्षत्रियो व्रात्यंक सूतं स्तोत्रक्रियापरम् ।
वैश्यो वैदेहकं चापि मौद्गल्यमपवर्जितम्

ayājyaṃ kṣatriyo vrātyaṃka sūtaṃ stotrakriyāparam |
vaiśyo vaidehakaṃ cāpi maudgalyamapavarjitam

शूद्रश्चण्डालमत्युग्रं वध्यघ्नं बाह्यवासिनम् ।
ब्राह्मण्यां सम्प्रजायन्त इत्येते कुलपांसनाः ।
एते मतिमतांश्रेष्ठ वर्णसङ्करजाः प्रभो

śūdraścaṇḍālamatyugraṃ vadhyaghnaṃ bāhyavāsinam |
brāhmaṇyāṃ samprajāyanta ityete kulapāṃsanāḥ |
ete matimatāṃśreṣṭha varṇasaṅkarajāḥ prabho

बन्दी तु जायते वैश्यान्मागधो वाक्यजीवनः ।
शूद्रान्निषादो मत्स्यघ्नः क्षत्रियायां व्यतिक्रमात्

bandī tu jāyate vaiśyānmāgadho vākyajīvanaḥ |
śūdrānniṣādo matsyaghnaḥ kṣatriyāyāṃ vyatikramāt

शूद्रादायोगवश्चापि वैश्यायां ग्राम्यधर्मिणः ।
ब्राह्मणैरप्रतिग्राह्यस्तक्षा स्वधनजीवनः

śūdrādāyogavaścāpi vaiśyāyāṃ grāmyadharmiṇaḥ |
brāhmaṇairapratigrāhyastakṣā svadhanajīvanaḥ

एतेऽपि सदृशान्वर्णाञ्जनयन्ति स्वयोनिषु ।
मातृजात्या प्रसूयन्ते ह्यवरा हीनयोनिषु

ete'pi sadṛśānvarṇāñjanayanti svayoniṣu |
mātṛjātyā prasūyante hyavarā hīnayoniṣu

यथा चतुर्षु वर्णेषु द्वयोरात्माऽस्य जायते ।
आनन्तर्यात्प्रजायन्ते यथा बाह्या प्रधानतः

yathā caturṣu varṇeṣu dvayorātmā'sya jāyate |
ānantaryātprajāyante yathā bāhyā pradhānataḥ

ते चापि सदृशं वर्णं जनयन्ति स्वयोनिषु ।
परस्परस्य दारेषु जनयन्ति विगर्हितान्

te cāpi sadṛśaṃ varṇaṃ janayanti svayoniṣu |
parasparasya dāreṣu janayanti vigarhitān

यथा शूद्रोऽपि ब्राह्मण्यां जन्तुं बाह्यं प्रसूयते ।
एवं बाह्यतराद्बाह्यश्चातुर्वर्ण्यात्प्रजायते

yathā śūdro'pi brāhmaṇyāṃ jantuṃ bāhyaṃ prasūyate |
evaṃ bāhyatarādbāhyaścāturvarṇyātprajāyate

प्रतिलोमं तु वर्धन्ते बाह्योद्बाह्यतरात्पुनः ।
हीनाद्धीनाः प्रसूयन्ते वर्णाः पञ्चदशैव तु

pratilomaṃ tu vardhante bāhyodbāhyatarātpunaḥ |
hīnāddhīnāḥ prasūyante varṇāḥ pañcadaśaiva tu

अगम्यागमनाच्चैव जायते वर्णसङ्करः ।
बाह्यानामनुजायन्ते सैरन्ध्र्यां मागधेषु च ।
प्रसाधनोपचारज्ञमदासं दासजीवनम्

agamyāgamanāccaiva jāyate varṇasaṅkaraḥ |
bāhyānāmanujāyante sairandhryāṃ māgadheṣu ca |
prasādhanopacārajñamadāsaṃ dāsajīvanam

क्षत्रा ह्यायोगवं सूते वागुराबन्धजीवनम् ।
मैरेयकं च वैदेहः सम्प्रसूतेऽथ माधुकम्

kṣatrā hyāyogavaṃ sūte vāgurābandhajīvanam |
maireyakaṃ ca vaidehaḥ samprasūte'tha mādhukam

निषादो मद्गुरं सूते दासं नावोपजीविनम् ।
मृतपं चापि चाण्डालः श्वपाकमिति विश्रुतम्

niṣādo madguraṃ sūte dāsaṃ nāvopajīvinam |
mṛtapaṃ cāpi cāṇḍālaḥ śvapākamiti viśrutam

चतुरो मागधी सूते क्रूरान्मायोपजीविनः ।
मांसं स्वादुकरं क्षौद्रं सौगन्धमिति विश्रुतम्

caturo māgadhī sūte krūrānmāyopajīvinaḥ |
māṃsaṃ svādukaraṃ kṣaudraṃ saugandhamiti viśrutam

वैदेहकाच्च पापिष्ठा क्रूरं मायोपजीविनम् ।
निषादान्मद्रनाभं च खरयानप्रयायिनम्

vaidehakācca pāpiṣṭhā krūraṃ māyopajīvinam |
niṣādānmadranābhaṃ ca kharayānaprayāyinam

चण्डालात्पुल्कसं चापि खराश्वगजभोजिनम् ।
भृतचैलप्रतिच्छन्नं भिन्नभाजनभोजिनम्

caṇḍālātpulkasaṃ cāpi kharāśvagajabhojinam |
bhṛtacailapraticchannaṃ bhinnabhājanabhojinam

आयोगवीषु जायन्ते हीनवर्णास्तु ते त्रयः ।
क्षुद्रो वैदेहकादन्धो बहिर्ग्रामप्रतिश्रयः

āyogavīṣu jāyante hīnavarṇāstu te trayaḥ |
kṣudro vaidehakādandho bahirgrāmapratiśrayaḥ

कारावरो निषाद्यां तु चर्मकारः प्रसूयते ।
चाण्डालात्पाण्डुसौपाकस्त्वक्सारव्यवहारवान्

kārāvaro niṣādyāṃ tu carmakāraḥ prasūyate |
cāṇḍālātpāṇḍusaupākastvaksāravyavahāravān

आहिण्कों निषादेन वैदेह्यां सम्प्रसूयते ।
चण्डालेन तु सौपाकश्चण्डालसमवृत्तिमान्

āhiṇkoṃ niṣādena vaidehyāṃ samprasūyate |
caṇḍālena tu saupākaścaṇḍālasamavṛttimān

निषादी चापि चण्डालात्पुत्रमन्तेवसायिनम् ।
श्मशानगोचरं सूते बाह्यैरपि बहिष्कृतम्

niṣādī cāpi caṇḍālātputramantevasāyinam |
śmaśānagocaraṃ sūte bāhyairapi bahiṣkṛtam

इत्येते सङ्करे जाताः पितृमातृव्यतिक्रमात् ।
प्रच्छन्नान्वा प्रकाशा वा वेदितव्याः स्वकर्मभिः

ityete saṅkare jātāḥ pitṛmātṛvyatikramāt |
pracchannānvā prakāśā vā veditavyāḥ svakarmabhiḥ

चतुर्णामेव वर्णानां धर्मो नान्यस्य विद्यते ।
वर्णानां धर्महीनेषु सङ्ख्या नास्तीह कस्यचित्

caturṇāmeva varṇānāṃ dharmo nānyasya vidyate |
varṇānāṃ dharmahīneṣu saṅkhyā nāstīha kasyacit

यदृच्छयोपसम्पन्नैर्यज्ञसाधुबहिष्कृतैः ।
बाह्या बाह्यैश्च जायन्ते यथावृत्ति यथाश्रयम्

yadṛcchayopasampannairyajñasādhubahiṣkṛtaiḥ |
bāhyā bāhyaiśca jāyante yathāvṛtti yathāśrayam

चतुष्पथश्मशानानि शैलांश्चान्यान्वनस्पतीन् ।
कार्ष्णायसमलङ्कारं परिगृह्य च नित्यशः ।
वसेयुरेते विज्ञाता वर्तयन्तः स्वकर्मभिः

catuṣpathaśmaśānāni śailāṃścānyānvanaspatīn |
kārṣṇāyasamalaṅkāraṃ parigṛhya ca nityaśaḥ |
vaseyurete vijñātā vartayantaḥ svakarmabhiḥ

युञ्जन्तो वाऽप्यलङ्कारांस्तथोपकरणानि च ।
गोब्राह्मणाय साहय्यं कुर्वाणा वै न संशयः

yuñjanto vā'pyalaṅkārāṃstathopakaraṇāni ca |
gobrāhmaṇāya sāhayyaṃ kurvāṇā vai na saṃśayaḥ

आनृशंस्यमनुक्रोशः सत्यवाक्यं तथा क्षमा ।
स्वशरीरैरपि त्राणं बाह्यानां सिद्धिकारणम् ।
भवन्ति मनुजव्याघ्र तत्र मे नास्ति संशयः

ānṛśaṃsyamanukrośaḥ satyavākyaṃ tathā kṣamā |
svaśarīrairapi trāṇaṃ bāhyānāṃ siddhikāraṇam |
bhavanti manujavyāghra tatra me nāsti saṃśayaḥ

यथोपदेशं परिकीर्तितासु
नरः प्रजायेत विचार्य बुद्धिमान् ।
निहीनयोनिर्हि सुतोऽवसादये-
त्तितीर्षमाणं हि यथोपलो जले

yathopadeśaṃ parikīrtitāsu
naraḥ prajāyeta vicārya buddhimān |
nihīnayonirhi suto'vasādaye-
ttitīrṣamāṇaṃ hi yathopalo jale

अविद्वांसमलं लोके विद्वांसमपि वा पुनः ।
नयन्ति ह्यपथं नार्यः कामक्रोधवशानुगम्

avidvāṃsamalaṃ loke vidvāṃsamapi vā punaḥ |
nayanti hyapathaṃ nāryaḥ kāmakrodhavaśānugam

स्वभावश्चैव नारीणां नराणामिह दूषणम् ।
अत्यर्थं न प्रसज्जन्ते प्रमदासु विपश्चितः

svabhāvaścaiva nārīṇāṃ narāṇāmiha dūṣaṇam |
atyarthaṃ na prasajjante pramadāsu vipaścitaḥ

वर्णापेतमविज्ञाय नरं कलुषयोनिजम् ।
आर्यरूपमिवानार्यं कथं विद्यामहे वयम्

varṇāpetamavijñāya naraṃ kaluṣayonijam |
āryarūpamivānāryaṃ kathaṃ vidyāmahe vayam

योनिसङ्कलुषे जातं नानाभावसमन्वितम् ।
कर्मभिः सज्जनाचीर्णैर्विज्ञेयाः शुद्धयोनिकाः

yonisaṅkaluṣe jātaṃ nānābhāvasamanvitam |
karmabhiḥ sajjanācīrṇairvijñeyāḥ śuddhayonikāḥ

अनार्यत्वमनाचारः क्रूरत्वं निष्क्रियात्मता ।
पुरुषं व्यञ्जयन्तीह लोके कलुषयोनिजम्

anāryatvamanācāraḥ krūratvaṃ niṣkriyātmatā |
puruṣaṃ vyañjayantīha loke kaluṣayonijam

पित्र्यं वा भजते शीलं मातृजं वा तथोभयम् ।
न कथञ्च सङ्कीर्णः प्रवृतिं स्वां नियच्छति

pitryaṃ vā bhajate śīlaṃ mātṛjaṃ vā tathobhayam |
na kathañca saṅkīrṇaḥ pravṛtiṃ svāṃ niyacchati

यथैव सदृसो रूपे मातावित्रोर्हि जायते ।
व्याघ्रबिन्दोस्तथा योनिं पुरुषः स्वां नियच्छति

yathaiva sadṛso rūpe mātāvitrorhi jāyate |
vyāghrabindostathā yoniṃ puruṣaḥ svāṃ niyacchati

कुले स्रोतसि संच्छन्ने यस्य स्याद्योनिसङ्करः ।
संश्रयत्येव तच्छीलं नरोऽल्पमथवा बहु

kule srotasi saṃcchanne yasya syādyonisaṅkaraḥ |
saṃśrayatyeva tacchīlaṃ naro'lpamathavā bahu

आर्यरूपसमाचारं चरन्तं कृतके पथि ।
सवर्णमन्यवर्णं वा स्वशीलं सास्ति निश्चये

āryarūpasamācāraṃ carantaṃ kṛtake pathi |
savarṇamanyavarṇaṃ vā svaśīlaṃ sāsti niścaye

नानावृत्तेषु भूतेषु नानाक्रमरतेषु च ।
जन्मवृत्तसमं लोके सुश्लिष्टं न विरज्यते

nānāvṛtteṣu bhūteṣu nānākramarateṣu ca |
janmavṛttasamaṃ loke suśliṣṭaṃ na virajyate

शरीरमिह सत्वेन न तस्य परिकृष्यते ।
ज्येष्ठमध्यावरं सत्वं तुल्यसत्वं प्रमोदते

śarīramiha satvena na tasya parikṛṣyate |
jyeṣṭhamadhyāvaraṃ satvaṃ tulyasatvaṃ pramodate

ज्यायांसमपि शीलेन विहीनं नैव पूजयेत् ।
अपि शूद्रं च धर्मज्ञं सद्वृत्तमभिपूजयेत्

jyāyāṃsamapi śīlena vihīnaṃ naiva pūjayet |
api śūdraṃ ca dharmajñaṃ sadvṛttamabhipūjayet

आत्मानमाख्याति हि कर्मभिर्नरः
सुशीलचारित्रकुलैः शुभाशुभैः ।
प्रनष्टमप्यात्मकुलं तथा नरः
पुनः प्रकाशं कुरुते स्वकर्मतः

ātmānamākhyāti hi karmabhirnaraḥ
suśīlacāritrakulaiḥ śubhāśubhaiḥ |
pranaṣṭamapyātmakulaṃ tathā naraḥ
punaḥ prakāśaṃ kurute svakarmataḥ

योनिष्वेतासु सर्वासु सङ्कीर्णास्वितरासु च ।
यत्रात्मानं न जनयेद्बुधस्तां परिवर्जयेत्

yoniṣvetāsu sarvāsu saṅkīrṇāsvitarāsu ca |
yatrātmānaṃ na janayedbudhastāṃ parivarjayet