सूक्त 54: पूषा, खोई वस्तु लौटा दो

सं पू॑षन्वि॒दुषा॑ नय॒ यो अञ्ज॑सानु॒शास॑ति ।
य ए॒वेदमिति॒ ब्रव॑त्

saṃ pūṣanviduṣā naya yo añjasānuśāsati |
ya evedamiti bravat

समु॑ पू॒ष्णा ग॑मेमहि॒ यो गृ॒हाँ अ॑भि॒शास॑ति ।
इ॒म ए॒वेति॑ च॒ ब्रव॑त्

samu pūṣṇā gamemahi yo gṛhām̐ abhiśāsati |
ima eveti ca bravat

पू॒ष्णश्च॒क्रं न रि॑ष्यति॒ न कोशोऽव॑ पद्यते ।
नो अ॑स्य व्यथते प॒विः

pūṣṇaścakraṃ na riṣyati na kośo'va padyate |
no asya vyathate paviḥ

यो अ॑स्मै ह॒विषावि॑ध॒न्न तं पू॒षापि॑ मृष्यते ।
प्र॒थ॒मो वि॑न्दते॒ वसु॑

yo asmai haviṣāvidhanna taṃ pūṣāpi mṛṣyate |
prathamo vindate vasu

पू॒षा गा अन्वे॑तु नः पू॒षा र॑क्ष॒त्वर्व॑तः ।
पू॒षा वाजं॑ सनोतु नः

pūṣā gā anvetu naḥ pūṣā rakṣatvarvataḥ |
pūṣā vājaṃ sanotu naḥ

पूष॒न्ननु॒ प्र गा इ॑हि॒ यज॑मानस्य सुन्व॒तः ।
अ॒स्माकं॑ स्तुव॒तामु॒त

pūṣannanu pra gā ihi yajamānasya sunvataḥ |
asmākaṃ stuvatāmuta

माकि॑र्नेश॒न्माकीं॑ रिष॒न्माकीं॒ सं शा॑रि॒ केव॑टे ।
अथारि॑ष्टाभि॒रा ग॑हि

mākirneśanmākīṃ riṣanmākīṃ saṃ śāri kevaṭe |
athāriṣṭābhirā gahi

शृ॒ण्वन्तं॑ पू॒षणं॑ व॒यमिर्य॒मन॑ष्टवेदसम् ।
ईशा॑नं रा॒य ई॑महे

śṛṇvantaṃ pūṣaṇaṃ vayamiryamanaṣṭavedasam |
īśānaṃ rāya īmahe

पूष॒न्तव॑ व्र॒ते व॒यं न रि॑ष्येम॒ कदा॑ च॒न ।
स्तो॒तार॑स्त इ॒ह स्म॑सि

pūṣantava vrate vayaṃ na riṣyema kadā cana |
stotārasta iha smasi

परि॑ पू॒षा प॒रस्ता॒द्धस्तं॑ दधातु॒ दक्षि॑णम् ।
पुन॑र्नो न॒ष्टमाज॑तु

pari pūṣā parastāddhastaṃ dadhātu dakṣiṇam |
punarno naṣṭamājatu