सूक्त 19: वव्रि ने माता की गोद में अग्नि देखे

अ॒भ्य॑व॒स्थाः प्र जा॑यन्ते॒ प्र व॒व्रेर्व॒व्रिश्चि॑केत ।
उ॒पस्थे॑ मा॒तुर्वि च॑ष्टे

abhyavasthāḥ pra jāyante pra vavrervavriściketa |
upasthe māturvi caṣṭe

जु॒हु॒रे वि चि॒तय॒न्तोऽनि॑मिषं नृ॒म्णं पा॑न्ति ।
आ दृ॒ळ्हां पुरं॑ विविशुः

juhure vi citayanto'nimiṣaṃ nṛmṇaṃ pānti |
ā dṛḻhāṃ puraṃ viviśuḥ

आ श्वै॑त्रे॒यस्य॑ ज॒न्तवो॑ द्यु॒मद्व॑र्धन्त कृ॒ष्टय॑ः ।
नि॒ष्कग्री॑वो बृ॒हदु॑क्थ ए॒ना मध्वा॒ न वा॑ज॒युः

ā śvaitreyasya jantavo dyumadvardhanta kṛṣṭayaḥ |
niṣkagrīvo bṛhaduktha enā madhvā na vājayuḥ

प्रि॒यं दु॒ग्धं न काम्य॒मजा॑मि जा॒म्योः सचा॑ ।
घ॒र्मो न वाज॑जठ॒रोऽद॑ब्ध॒ः शश्व॑तो॒ दभ॑ः

priyaṃ dugdhaṃ na kāmyamajāmi jāmyoḥ sacā |
gharmo na vājajaṭharo'dabdhaḥ śaśvato dabhaḥ

क्रीळ॑न्नो रश्म॒ आ भु॑व॒ः सं भस्म॑ना वा॒युना॒ वेवि॑दानः ।
ता अ॑स्य सन्धृ॒षजो॒ न ति॒ग्माः सुसं॑शिता व॒क्ष्यो॑ वक्षणे॒स्थाः

krīḻanno raśma ā bhuvaḥ saṃ bhasmanā vāyunā vevidānaḥ |
tā asya sandhṛṣajo na tigmāḥ susaṃśitā vakṣyo vakṣaṇesthāḥ