सूक्त 66: धन जैसे, सूर्य जैसे अग्नि

र॒यिर्न चि॒त्रा सूरो॒ न सं॒दृगायु॒र्न प्रा॒णो नित्यो॒ न सू॒नुः

rayirna citrā sūro na saṃdṛgāyurna prāṇo nityo na sūnuḥ

तक्वा॒ न भूर्णि॒र्वना॑ सिषक्ति॒ पयो॒ न धे॒नुः शुचि॑र्वि॒भावा॑

takvā na bhūrṇirvanā siṣakti payo na dhenuḥ śucirvibhāvā

दा॒धार॒ क्षेम॒मोको॒ न र॒ण्वो यवो॒ न प॒क्वो जेता॒ जना॑नाम्

dādhāra kṣemamoko na raṇvo yavo na pakvo jetā janānām

ऋषि॒र्न स्तुभ्वा॑ वि॒क्षु प्र॑श॒स्तो वा॒जी न प्री॒तो वयो॑ दधाति

ṛṣirna stubhvā vikṣu praśasto vājī na prīto vayo dadhāti

दु॒रोक॑शोचि॒ः क्रतु॒र्न नित्यो॑ जा॒येव॒ योना॒वरं॒ विश्व॑स्मै

durokaśociḥ kraturna nityo jāyeva yonāvaraṃ viśvasmai

चि॒त्रो यदभ्रा॑ट् छ्वे॒तो न वि॒क्षु रथो॒ न रु॒क्मी त्वे॒षः स॒मत्सु॑

citro yadabhrāṭ chveto na vikṣu ratho na rukmī tveṣaḥ samatsu

सेने॑व सृ॒ष्टामं॑ दधा॒त्यस्तु॒र्न दि॒द्युत्त्वे॒षप्र॑तीका

seneva sṛṣṭāmaṃ dadhātyasturna didyuttveṣapratīkā

य॒मो ह॑ जा॒तो य॒मो जनि॑त्वं जा॒रः क॒नीनां॒ पति॒र्जनी॑नाम्

yamo ha jāto yamo janitvaṃ jāraḥ kanīnāṃ patirjanīnām

तं व॑श्च॒राथा॑ व॒यं व॑स॒त्यास्तं॒ न गावो॒ नक्ष॑न्त इ॒द्धम्

taṃ vaścarāthā vayaṃ vasatyāstaṃ na gāvo nakṣanta iddham

सिन्धु॒र्न क्षोद॒ः प्र नीची॑रैनो॒न्नव॑न्त॒ गाव॒ः स्व१॒॑र्दृशी॑के

sindhurna kṣodaḥ pra nīcīrainonnavanta gāvaḥ svardṛśīke